II Tim 4 - Sơ̆p Hlabơar Nơ̆r 'Bok Kei-Dei

^1-2 Năr tôch kơnh Kră Yang Yêsu Krist gô jur tơ ala teh wă pơgơ̆r păng sek tơlang đĭ-đăng bơngai, mă bơngai lôch, mă bơngai arih. Kră Yang 'Bok Kei-Dei păng Kră Yang Yêsu Krist 'bôh bơ̆n ling-lang na ih athei kơchăng, athei bơtho tơdrong Sư ling-lang; mă đe mơ̆ng mă đe ưh, ih kư̆ bơtho đĕch. Ih athei khă đe 'nĕ pă pơm tơdrong yoch păng bơtho đe lui mă kơjăp, bơtho pơlung sư adar adeh.

³ Ning-mônh đei lơ bơngai ưh pă wă mơ̆ng tơdrong 'Bok Kei-Dei. Đe wă kiơ̆ gah tơdrong kư̆ kă sư kơdih đĕch, na lu sư chă bơngai bơtho sư kiơ̆ kơ sư wă mơ̆ng đĕch, ưh pă kiơ̆ tơdrong 'Bok Kei-Dei dơ̆ng.

⁴ Lu sư ưh pă năm mơ̆ng tơdrong 'Bok Kei-Dei boih, lu sư wă mơ̆ng tơdrong đe roi hơ'mon kư̆ kă, 'noh sư năm kuăng.

⁵ Mă-lei ih athei đei jơhngơ̆m chơ̆n lăm tôm tơdrong. Mă pơmat ih kư̆ adrin 'nĕ hŭt tơdrong pơm đon 'lơ̆ng tơpăt, bơtho tơdrong 'nao 'lơ̆ng Kră Yang Yêsu Krist ling-lang, adrin jang tôm tơdrong 'Bok Kei-Dei.

⁶ Gah inh arih ưh pă nhoi boih. Đe wă jê̆ pơlôch inh boih, pham inh thoi lĕ kơ pham tơmam đe wă soi sơmah, na dang ei inh wă tơklah đơ̆ng iĕm boih.

⁷ Thoi lĕ bơngai pơm linh tơblah sư adrin tơpă, na inh kư̆m adrin thoi noh mơ̆n đơ̆ng sơ̆ khơ̆ dang ei. Inh chu jang kơ 'Bok Kei-Dei truh tơ inh lôch, kư̆m thoi bơngai pơjei băl kơdâu sư adrin tôch kơ trong đêl đe pơkă 'mơ̆i na gơh pơdơh. Na inh kư̆m lei-lăi, inh kư̆m ưh kơ achăng lê̆ tơdrong lui inh.

⁸ Pơtih gia lu bơngai kơdâu pơjei, dah jei bu đe apah agăl pơkao. Kră Yang Yêsu Krist sek tơlang tơpăt, thoi noh na ning-mônh Sư wă jur tơ ala teh pă 'măng dơ̆ng na Sư wă ăn apah kơ inh. Tơdrong apah ei Sư wă ăn kơ đĭ-đăng bơngai 'lơ̆ng tơpăt, dôm lu bơngai 'mêm kơ Sư păng chang gô Sư wă jur dơ̆ng tơ teh.

Pôl athei Timôthê năm tơ sư mă kuăng

^9-10 Ih adrin năm tơ inh mă kuăng hŏ, yua kơ Đêmas sư 'mêm kơ akâu sư kơdih dang ei đĕch na sư achăng lê̆ inh năm tơ Pơlei Têsalônik. Krêsen năm tơ dêh char Galati boih păng Tĭt, sư năm tơ dêh char Đamatia.

¹¹ Dang ei đei minh 'nu Luka đĕch oei păng inh. Ih pơtơm ba Markôs mơ̆n hŏ na biĕm năm tơ inh tơ âu yua kơ sư gơh tơgŭm inh tơpă gah jang tơdrong 'Bok Kei-Dei.

¹² Tisĭk inh wơh sư năm tơ Pơlei Êphêsô boih.

¹³ Biĕm năm tơ âu, biĕm drong iŏk chĕp hloi ao tơnŏ inh hŏ. Inh 'măn 'bơ̆t hnam Kerpu tơ Pơlei Trôs. Păng dôm hla bơar inh mă pơm păng akar păng hla bơar inh nai mơ̆n, biĕm chĕp ba hŏ. Hla bơar pơm păng akar 'noh inh gĭt tơpă.

¹⁴ 'Bok Aleksandrê sư bơngai thơ̆ hơjơ̆m, sư pơm kơnê̆ tơpă kơ inh, mă-lei inh huay kơ ơh ôh. Sư pơm kơnê̆ kơ inh dang yơ 'Bok Kei-Dei phak sư dang noh mơ̆n.

¹⁵ Mă-lei ih athei kơchăng kơ sư tơpă mơ̆n, sư areh tơpă kơ tơdrong bơ̆n bơtho.

¹⁶ Đe sek tơlang inh minh 'măng boih, inh pơma dŏng akâu inh kơdih ưh kơ đei bu tơdŏng inh. Đĭ-đăng lu sư tŭk inh. Inh kư̆m apinh 'Bok Kei-Dei huay jô̆ yo kơ lu sư mơ̆n.

¹⁷ Năr đe sek tơlang inh ei đei Kră Yang Yêsu Krist oei hăm inh. Sư tơdŏng inh, Sư ăn kơ inh jơhngơ̆m pran, na inh bơtho tơdrong 'nao 'lơ̆ng Sư kơ đĭ-đăng khŭl bơngai. Na đe wă klơ̆m inh tơ dăm-brang ră mă-lei Kră Yang Yêsu Krist tơdŏng inh.

¹⁸ Păng Sư gô dŏng inh đơ̆ng dôm tơdrong kơnê̆ na atŏk inh tơ dêh char Sư tơ plĕnh. Thoi noh inh wă ư-ang kơ Sư ling-lang ưh kơ layơ hiơt. A-men.

Pôl chih lăm kơthơ apơi kơ Timôthê păng bôl sư nai mơ̆n

¹⁹ Inh jet gia yă Prisil păng Akila păng hnam dơnŏ Ônêsip.

²⁰ Êrat oei tơ Pơlei Kôrintô. Trôphĭm năm păng inh truh tơ Pơlei Milê đĕch yua kơ sư jĭ.

²¹ Apinh ih adrin năm tơ inh hơdrol kơ bơyan tơngiĕt hŏ. Ôbil, Pơden, Lin, yă Klôđia păng đĭ-đăng 'nhŏng oh bơngai lui đei nơ̆r jet gia ih.

²² Inh apinh Kră Yang Yêsu Krist oei păng ih ling-lang păng apinh Sư wei-lăng rim 'nu kơ iĕm tôm tơdrong.