II Tim 3 - Sơ̆p Hlabơar Nơ̆r 'Bok Kei-Dei

¹ Ih athei 'blŏk hơdơ̆r tơdrong âu mă tơpă: Năr jê̆ tôch ning-mônh đei lơ tơdrong pơmat-tat.

² Năr ei kơnh đei lơ bơngai băt 'mêm akâu sư kơdih, mă ưh kơ 'mêm mơnat kơ bôl buăl. Sư hăt kơ jên tơpă. Sư pơang akâu kơdih păng chă pơma pơsôm kơ đe. Sư pơma kơnê̆ kơ đe. Sư ưh kơ chu yom mĕ 'bă sư păng sư ưh kơ băt bơnê kơ đe, sư kư̆ pơm kơnê̆ đĕch.

³ Sư ưh kơ băt 'mêm mơnat kơ bôl buăl ôh. Bơ̆n bơngai nai ưh kơ băt wă pơma lung sư thoi yơ dơ̆ng, yua kơ sư pơma bơbĭt dêh. Sư chă tơdrong kơnê̆ păng đe. Sư bơngai hơwĕng, sư ưh kơ wă pơm tơdrong 'lơ̆ng ôh, sư areh kơ bơngai 'lơ̆ng.

⁴ Năr ei kơnh đei lơ bơngai plơ̆ plĕch kơ đe. Sư bơngai kư̆ kă. Sư 'maih pơhuơ̆ akâu wă chă ngôi đĕch, sư ưh kơ băt 'mêm kơ 'Bok Kei-Dei.

⁵ Lu sư mơ'nah pơm thoi bơngai lui mơ̆n mă-lei sư ưh kơ lui tơpă ôh. Sư ưh kơ băt kơ 'Bok Kei-Dei pơklaih bơ̆n ăn kơ bơ̆n jing bơngai 'lơ̆ng tơpăt păng jang tơdrong Sư pran kơtang. Ih athei weh ataih đơ̆ng lu bơngai 'noh.

⁶ Lu bơngai ei lu mơ'nah mơ̆t tơ hnam bơngai drŏ-kăn mă ưh kơ hlôh. Lu sư pơtuah bơngai drŏ-kăn ei lui kơ 'Bok Kei-Dei. Lu bơngai drŏ-kăn ei lu sư băt kơdih đei lơ tơdrong yoch ră mơ̆n, mă-lei lu sư oei hưch tơdrong âu tơdrong to.

⁷ Lu bơngai drŏ-kăn ei lu sư chă pơhrăm ră tơdrong 'Bok Kei-Dei, mă-lei 'nhŏ mă hlôh tơdrong kiơ.

⁸ Thoi lĕ kơ bre Jannơ păng Jambrơ sơ̆, bre sư ayăt kơ Môis, kư̆m thoi lu bơngai drŏ-nglo âu ayăt tơdrong 'Bok Kei-Dei dang ei mơ̆n. Đon lu sư kơnê̆ dêh, lu sư ưh kơ lui kơ 'Bok Kei-Dei tơpă ôh.

⁹ Lu bơngai ei đe ưh kơ đei kiơ̆ lu sư lơ ôh, yua kơ đĭ-đăng bơngai gô 'bôh lu sư chă pơngiĕl đe đĕch. Thoi noh na đe ưh kơ wă kiơ̆ lu sư kư̆m lei-lăi thoi đe 'bôh bre Jannơ păng Jambrơ chă pơsôr wă kơ đe lui kơ bre sư sơ̆.

Pôl băt kơdih akâu sư wă jê̆ lôch boih na sư pơkă kơ Timôthê thoi âu

¹⁰ Inh tơchĕng ih kư̆m băt mơ̆n dôm tơdrong inh bơtho ih đơ̆ng sơ̆ khơ̆ dang ei. Păng ih băt boih inh bơngai thoi yơ. Ih băt kơ inh năm jơ̆p-jang kơ teh đak wă bơtho tơdrong 'nao 'lơ̆ng kơ đĭ-đăng bơngai păng ih kư̆m băt inh lui kơ Kră Yang lơliơ. Ih kư̆m băt tơdrong inh pơmat-tat mă-lei inh oei adrin ưh kơ tŭk ôh tơdrong jang inh. Ih kư̆m băt inh 'mêm kơ 'Bok Kei-Dei hăm bôl buăl.

¹¹ Ih băt boih dôm tơdrong đe pơm kơnê̆ kơ inh, na inh đei tơdrong gleh dang yơ. Ih kư̆m băt boih dôm tơdrong đe pơm kơnê̆ kơ inh tơ Pơlei Antiôs, Pơlei Ikôni păng Pơlei Litrơ. Đe pơm kơnê̆ kơ inh tơpă mă-lei Kră Yang 'Bok Kei-Dei dŏng inh đơ̆ng dôm tơdrong noh.

¹² Dôm lu bơngai mă gơnang kơ Kră Yang Yêsu Krist wă pơm đon 'lơ̆ng tơpăt, lu sư gô đei tơdrong đe areh pơm kơnê̆ kơ lu sư.

¹³ Lu bơngai đon kơnê̆, lu bơngai chă pơngiĕl đe, lu sư rai đunh rai răm rai lơ tơdrong lu sư pơm kơnê̆. Sư pơma hơlĕnh kơ đe, đe hơlĕnh tơwih kơ sư, sư kư̆m lui mơ̆n.

¹⁴ Mă-lei gah ih, ih pơhrăm tơdrong 'Bok Kei-Dei boih păng ih kư̆m lui kơjăp kơ tơdrong 'Bok Kei-Dei đơ̆ng sơ̆ khơ̆ dang ei. Na dôm lu tơdrong 'Bok Kei-Dei noh ih athei rok mă tơpă khŏm khŏm. Păng ih kư̆m băt lu nhôn bơngai bơtho ih, nhôn bơngai thoi yơ.

¹⁵ Đơ̆ng ih oei iĕ sơ̆ ih pơhrăm sơ̆p hla bơar tơdrong 'Bok Kei-Dei. Sơ̆p hla bơar Sư boih ăn kơ bơ̆n băt tơdrong Sư pơklaih bơ̆n đơ̆ng tơdrong yoch yua kơ bơ̆n lui kơ Kră Yang Yêsu Krist.

¹⁶ Đĭ-đăng dôm sơ̆p hla bơar 'Bok Kei-Dei đơ̆ng 'Bok Kei-Dei tơgŭm kon bơngai chih, na bơ̆n gơh yua sơ̆p hla bơar 'Bok Kei-Dei bơtho tơdrong Sư, khă đe 'nĕ pă pơm tơdrong yoch păng hơmet ming jơhngơ̆m đe, tơbăt kơ đe thoi yơ bơ̆n gơh pơm 'lơ̆ng tơpăt.

¹⁷ Thoi noh lu bơngai jang tơdrong 'Bok Kei-Dei, sơ̆p hla bơar 'Bok Kei-Dei tơgŭm sư lăm tôm tơdrong, lu sư ưh kơ đei kơ'bah.