II Tim 2 - Sơ̆p Hlabơar Nơ̆r 'Bok Kei-Dei

¹ Ơ dăm, ih athei adrin jang tơdrong Kră Yang Yêsu Krist pran kơtang. Sư boih gô ăn kơ ih jing pran.

² Ih athei iŏk dôm nơ̆r ih mơ̆ng inh bơtho ih 'bơ̆t anăp đe tơpôl sơ̆, na ih bơtho dơ̆ng kơ lu bơngai mă lui kơjăp, na lu sư gô bơtho dơ̆ng kơ lu đe nai.

³ Mă ih truh tơdrong pơmat, ih kư̆ adrin bơtho đĕch thoi inh dang ei mơ̆n. Thoi noh na ih jing linh 'lơ̆ng Kră Yang Yêsu Krist.

⁴ Pơtih gia bơngai pơm linh: Bơngai pơm linh athei kơchăng tơdrong linh ling-lang ưh kơ gơh tơchĕng 'bar pang tơdrong ôh, tơdrong sơwil păng tơdrong linh. Sư kơchăng ling-lang thoi noh wă kơ 'bok yŏng sư lăp đon.

⁵ Âu nơ̆r pơtih gia dơ̆ng, gah tơdrong pơjei băl kơdâu: Bơngai bu kơdâu ưh kơ kĕ na khô̆i jơ̆ng buăl sư dah tơlơ̆ buăl sư, bơngai 'noh đe ưh kơ apah sư tơmam ôh, kơlih kơ sư ưh kơ kiơ̆ nơ̆r đe pơkă adrol kơ lu sư wă kơdâu hei.

⁶ Âu nơ̆r pơtih gia mơ̆n: Bơngai choh mir sư jang hrat tơpă, sư wei-lăng mir sư truh tơ 'ba đum, klaih kơ noh tơ'ngla sư kĕch iŏk kơdih.

⁷ Ơ Timôthê, ih tơchĕng lăng bĕ dôm nơ̆r inh pơma kơ ih yua kơ 'Bok Kei-Dei gô ăn kơ ih hlôh lăm tôm tơdrong lăm đon ih.

⁸ Ih athei pơwao gah Kră Yang Yêsu Krist lôch iung arih, Sư boih kon sâu Đawit. Tơdrong 'nao 'lơ̆ng inh bơtho âu dang ei roi thoi noh tơpă.

⁹ Kơlih kơ inh bơtho tơdrong 'nao 'lơ̆ng Sư, na inh đei tơdrong gleh pơmat-tat đe chĭt lê̆ inh lăm hnam phak dang ei, kư̆m thoi đe chĭt lu bơngai mă pơm kơnê̆ mơ̆n. Mă-lei đe ưh kơ gơh chĭt lê̆ nơ̆r 'Bok Kei-Dei ôh.

¹⁰ Inh đei tơdrong pơmat ling-lang, mă-lei inh oei adrin khŏm khŏm. Inh bơtho lu bơngai 'Bok Kei-Dei rơih wă kơ lu sư lui kơ Kră Yang Yêsu Krist, na 'Bok Kei-Dei gô pơklaih sư đơ̆ng tơdrong yoch păng atŏk sư oei hơdai păng Sư ling-lang ning-mônh.

¹¹ Tơdrong âu sĭt tơpă: “Dah bơ̆n chu lôch kiơ̆ Yêsu, lei bơ̆n gô iung arih oei hơdai hăm Sư.

¹² Dah bơ̆n đei tơdrong gleh pơmat-tat, bơ̆n oei adrin kiơ̆ Sư khŏm khŏm, lei bơ̆n kư̆m pơgơ̆r hơdai hăm Sư ning-mônh mơ̆n. Dah bơ̆n achăng Sư dang ei, lei pă jor Sư kư̆m achăng bơ̆n ning-mônh.

¹³ Bơngai bơ̆n phŏ phŏ ưh kơ pơm kiơ̆ thoi bơ̆n pơkă kơ Yêsu ôh, mă-lei Yêsu pơm 'lơ̆ng ling-lang, Sư ưh kơ lê̆ ôh dôm nơ̆r Sư pơkă hơdrol.”

¹⁴ Dôm tơdrong inh bơtho âu ih athei bơtho ăn kơ lu bơngai lui dơ̆ng hŏ păng khan kơ lu sư thoi âu: “'Bok Kei-Dei Sư 'bôh bơ̆n na bơ̆n athei kơchăng hŏ. Bơ̆n 'nĕ pơjah pơjăng kư̆ kă. Bơ̆n pơjah pơjăng thoi noh ưh kơ đei yua kiơ ôh, pơrăm đe đĕch dah bơ̆n pơjah thoi noh.”

Timôthê athei jang thoi âu wă kơ 'Bok Kei-Dei lăp đon

¹⁵ Ơ Timôthê, ih athei adrin jang tơdrong 'Bok Kei-Dei wă kơ Sư lăp đon kơ tơdrong jang ih tơpă. Ih jang thoi noh ih huay kơ mơlâu kơ tơdrong jang ih ôh, yua kơ ih bơtho trŏ tơdrong 'Bok Kei-Dei.

¹⁶ Ih 'nĕ kơ năm mơ̆ng lu bơngai pơjah pơjăng kư̆ kă. Lu bơngai pơjah pơjăng thoi noh lu sư rai đunh rai weh ataih đơ̆ng 'Bok Kei-Dei.

¹⁷ Tơdrong sư bơtho thoi noh khŏm khŏm rai đunh rai tih kơjăp na lơ bơngai lui kơ nơ̆r sư bơtho na achăng tŭk tơdrong lui kơ Yêsu. Bre Himennuih păng Philat boih bre sư pran pơjah pơjăng kư̆ kă.

¹⁸ Thoi noh na bre sư tŭk lê̆ tơdrong 'Bok Kei-Dei. Bre sư kư̆m pơma pơtuah lu bơngai lui mơ'nah jing achăng lê̆ tơdrong lui mơ̆n. Bre sư bơtho ưh kơ trŏ gah tơdrong bơ̆n wă iung arih ning-mônh, bre sư khan bơ̆n ưh kơ iung arih đơ̆ng lôch ôh.

¹⁹ Dôm tơdrong 'Bok Kei-Dei trŏ kơjăp tơpă. Sư pơkă thoi âu: “Inh Kră Yang 'Bok Kei-Dei băt kơnăl kơ đĭ-đăng bơngai lui kơ Inh păng đĭ-đăng bơngai lui kơ Inh sư athei tŭk lê̆ tơdrong yoch.”

²⁰ Pơtih gia lăm hnam bơngai mơdrŏng tih đei tôm khŭl pơnhan chhĕr, mơ'nah đe pơm păng maih, mơ'nah pơm păng hu, mơ'nah păng 'long, mơ'nah păng teh. Mơ'nah đe yua chhŏ sa rim năr, mơ'nah đe yua 'bơ̆t sŏng sa tih đĕch.

²¹ Bơngai bu hŭt lê̆ dôm tơdrong kơnê̆ sư, bơngai 'noh sư kư̆m thoi lĕ pơnhan chhĕr yua 'bơ̆t sŏng sa tih mơ̆n. Yŏng sư 'Bok Kei-Dei gơh yua sư dang ei hloi jang dôm tơdrong Sư, yua kơ sư đei đon 'lơ̆ng tơpăt.

²² Pơtih gia bơngai tơdăm sư ling-lang nŏng tơchĕng gah tơdrong akâu sư kơdih, ưh kơ wă tơchĕng tơdrong Kră Yang. Mă ih 'nĕ kơ tơchĕng thoi bơngai 'noh hŏ. Ih athei adrin pơm tơdrong 'lơ̆ng tơpăt, lui mă kơjăp, băt 'mêm mơnat kơ đe păng oei hiôk hơiă hơdai lu bơngai mă đei đon 'lơ̆ng tơpăt, wă khan lu bơngai mă krao khan kơ 'Bok Kei-Dei kơjăp.

²³ Ih 'nĕ kơ mơ̆ng lu bơngai pran pơjah pơjăng kư̆ kă. Sư pơjah pơjăng khŏm khŏm đon lu sư ưh kơ sor kơnh sư jing tơhil dih băl.

²⁴ Lu đĭch đam Kră Yang 'Bok Kei-Dei ưh kơ gơh hil hơwĕng kơ đe ôh. Sư athei pơm 'lơ̆ng kơ đe. Sư bơtho nơ̆r Kră Yang hơgei, đe hil kơ sư, sư athei krŏt đĕch.

²⁵ Sư bơtho lu bơngai pơjah pơjăng păng sư, sư athei bơtho mă 'lơ̆ng wă kơ bơngai mă pơjah pơjăng păng sư jah hơi jơhngơ̆m. 'Bok Kei-Dei phŏ Sư ăn kơ bơngai pơjah pơjăng 'noh tơbral hloi tơdrong yoch sư kơdih na hlôh hloi kơdih tơdrong Kră Yang.

²⁶ Sư đei đon 'lơ̆ng boih păng gơh jăk đơ̆ng yang Satan. Sơ̆ yang Satan oei pơkơ̆ng sư lăm tơdrong sư wă.