II Sam 8 - Sơ̆p Hlabơar Nơ̆r 'Bok Kei-Dei

Đawit jơnei tih

¹ Đơ̆ng rŏng kơ noh Đawit blah bơngai Philistin jei sư, pơjei iŏk pơgơ̆r lu pơlei tih đơ̆ng lu sư păng rôp lu sư pơm bơnă, Đawit blah iŏk pơlei Mathek Ama đơ̆ng bơngai Philistin.

² Sư kư̆m blah bơngai Môap jei sư, rôp athei lu sư 'bĭch sap tơ teh na iŏk tơlei pơtŏ, mưh 'bar jăl tơlei pơlôch, minh jăl tơlei ăn arih, thoi noh bơngai Môap athei chu jang păng ăn thuê̆ kơ Đawit.

³ Đawit blah Hadadêser kon tơdăm pơtao Rêhôp dêh Sôba; kơplah pơtao 'nâu oei wă năm lăm tơring đak Krong Ơphrat wă pơdơ̆ng ming 'blŏk kơ tơdrong sư pơgơ̆r.

⁴ Pơtao Đawit rôp linh pơtao Sôba pơm bơnă minh-rơbâu tơpơh-hrĕng linh hao aseh, păng 'bar-jĭt rơbâu linh năm jơ̆ng, linh pơtao Sôba. Pơtao Đawit kư̆m koh lê̆ huan jon aseh păng aseh dui gre lê̆ kơ lu sư oei pă lăp kơ dui minh-hrĕng tŏ gre đĕch.

⁵ Lu linh bơngai Siri đơ̆ng pơlei Đamas wă dŏng pơtao Hadadêser dêh Sôba; Đawit blah pơrăm, păng pơlôch hloi lu sư 'bar-jĭt 'bar-rơbâu 'nu.

⁶ Pơtao Đawit pơm kơđông lăm pơlei Đamas, kon pơlei Siri jing bơngai bơ̆jang ăn kơ Đawit, păng ăn thuê̆ kơ Đawit; Kră Yang ăn kơ Đawit kĕ jei tơ rim anih sư tơblah.

⁷ Pơtao Đawit blah iŏk dôm lu khêl pơm păng maih đơ̆ng lu yŏng linh wei pơtao Hadadêser păng chĕp ba tơ pơlei Jêrusalem.

⁸ Pơtao Đawit kư̆m đei thu iŏk lơ mam kong pơtao Hadadêser đơ̆ng pơlei Beta păng pơlei Bêrôthai.

⁹ Tôu pơtao pơlei tih Hamat kơtơ̆ng pơtao Đawit blah pơrăm đĭ lu linh Hadadêser.

¹⁰ Pơtao Tôu wơh hloi Jôram kon tơdăm sư, năm kơkuh wang chơt hiôk păng pơư kơ pơtao Đawit. Blah pơtao Hadadêser jei sư. Mă tơpă sư pơtao Tôu kư̆m đei tơblah hăm pơtao Hadadêser. Jôram chĕp pơyơ̆r ăn kơ pơtao Đawit lu tơmam pơm hăm kong, maih păng hu.

¹¹ Pơtao Đawit 'măn lê̆ lu tơmam đe ăn wă pơyơ̆r kơ Kră Yang, kư̆m thoi sư đei 'măn lê̆ lu hu maih đơ̆ng lu bơngai mă sư đei blah pơjei iŏk.

¹² Đơ̆ng lu bơngai Eđôm, Môap, Ammôn, Philistin, bơngai Amalek păng sư kư̆m pơm thoi tơmam blah iŏk đơ̆ng Hadadêser kon tơdăm Rêhôp, pơtao đe Sôba.

¹³ Đơ̆ng rŏng kơ brŏk đơ̆ng tơblah Siri jei sư, Đawit đe pôk pơư anăn sư, yua kơ sư tơblah pơlôch mơjĭt-tơhngam rơbâu linh Eđôm lăm Thŭng 'Boh.

¹⁴ Sư pơm kơđông pơgơ̆r jơ̆p kơ dêh Eđôm, păng đĭ kon pơlei Eđôm bơ̆jang kơ Đawit. Kră Yang ăn kơ Đawit kĕ jei tơ rim anih mă sư tơblah.

Lu bơngai bơ̆jang hăm pơtao

¹⁵ Đawit pơm pơtao pơgơ̆r kơ đĭ-đăng dêh char Isơrael, pơgơ̆r kon pơlei sư hăm tơdrong juăt trŏ tơpăt.

¹⁶ Jôap kon tơdăm yă Sêruia pơm yŏng pơgơ̆r linh; Jêhôsaphat kon tơdăm Ahilut pơm yŏng chih răk dôm tơdrong truh.

¹⁷ Sadok kon tơdăm, Ahitup păng Ahimelek kon tơdăm Abiathar pơm 'bok soi; păng Sêraia pơm 'bok yŏng chih hla bơar.

¹⁸ Bênaia kon tơdăm Jêhôiada pơm yŏng pơgơ̆r linh wei pơtao, lu kon pơlei Kêrêthit păng kon pơlei Pêlithit; gah lu kon drŏ-nglo Đawit tơgŭm sư chă đon.