II Sam 6 - Sơ̆p Hlabơar Nơ̆r 'Bok Kei-Dei

Đawit tung ba Hom pơgơ̆p tơ pơlei Jêrusalem

¹ Đawit akŭm đĭ-đăng lu linh nuih kơtang đei rơih iŏk đơ̆ng lăm bơngai Isơrael. Pêng-jĭt rơbâu 'nu.

² Sư păng đĭ-đăng lu bơngai kiơ̆ truh tơ pơlei Baala dêh Juđa wă năm tung iŏk Hom pơgơ̆p Kră Yang 'Bok Kei-Dei; Hom noh kon pơlei krao anăn Kră Yang Tih Hloh, Kră Yang mă dan tang-dŏ Sư kơpal rim kơ chêrubim kơpal tơnglơ̆p Hom pơgơ̆p.

³ Lu sư tah Hom pơgơ̆p Kră Yang 'Bok Kei-Dei kơpal gre 'nao, iŏk đơ̆ng hnam Abinađap oei kơpal groi. Usa păng Ahiô, kon tơdăm Abinađap, chĕp gre 'nao noh.

⁴ Usa năm rok cheng Hom pơgơ̆p Kră Yang 'Bok Kei-Dei gah Ahiô năm adrol. Lu sư anhăk Hom pơgơ̆p đơ̆ng hnam Abinađap oei kơpal groi.

⁵ Đawit hăm đĭ-đăng bơngai Isơrael hơri ư-ang 'bơ̆t anăp Kră Yang hăm dôm tơmam brŏ reh pơm păng 'long dơnơ̆ng, thoi brŏ tĭng-nĭng, hơgơ̆r iĕ chhar, huan lak.

⁶ Lăp truh tơ cham pơjuă 'ba Nakôn, Usa chro ti rôp Hom pơgơ̆p Kră Yang 'Bok Kei-Dei, yua kơ rơmo kơtơih.

⁷ Kră Yang hil dêh kơ Usa, yua kơ sư rôp pel 'bơm Hom pơgơ̆p noh; Kră Yang 'Bok Kei-Dei pơlôch hloi sư 'bơ̆t anih 'noh 'bơ̆t cheng Hom pơgơ̆p Kră Yang 'Bok Kei-Dei.

⁸ Đawit sơ'ngon dêh, yua kơ Kră Yang pơlôch Usa, na sư krao anih 'noh Pêres-Usa, anăn 'nâu oei truh tơ dang ei.

⁹ Lăm năr 'noh, Đawit hli kơ Kră Yang na pơma khan: “Hom pơgơ̆p Kră Yang 'Bok Kei-Dei liơ mă inh pơ̆n iŏk lê̆ tơ inh âu?”

¹⁰ Thoi noh Đawit ưh kơ wă lê̆ Hom pơgơ̆p Kră Yang tơ hnam sư tơ pơlei Đawit, na athei anhăk ba hloi tơ hnam Ôbêt Eđôm, bơngai Gitit.

¹¹ Hom pơgơ̆p Kră Yang oei pêng khei lăm hnam Ôbêt Eđôm, bơngai Gitit na Kră Yang tuh ăn pŭn hiôk kơ Ôbêt Eđôm păng đĭ hnam dơnŏ sư.

Hom pơgơ̆p ba tơ pơlei Jêrusalem

¹² Đe năm roi ăn kơ pơtao Đawit: “Kră Yang đei tuh pŭn hiôk kơ hnam dơnŏ Ôbêt Eđôm păng dôm tơmam sư đei, yua kơ Hom pơgơ̆p Kră Yang 'Bok Kei-Dei.” Đawit hloi năm iŏk anhăk hloi Hom pơgơ̆p Kră Yang 'Bok Kei-Dei đơ̆ng hnam Ôbêt Eđôm ba tơ pơlei Đawit hăm tơdrong chơt hiôk dêh.

¹³ Lăp lu bơngai tung Hom pơgơ̆p Kră Yang 'Bok Kei-Dei năm tơdrâu yak na Đawit pơyơ̆r minh pôm rơmo tơno păng rơmo kon bek pơm tơmam soi.

¹⁴ Wă hơri bơnê kơ Kră Yang, Đawit iŏk hrŭk ao êphot, na suang đĭ jơhngơ̆m chơt hiôk.

¹⁵ Kơplah Đawit păng đĭ kon pơlei Isơrael tung anhăk ba Hom pơgơ̆p Kră Yang nơ̆r jreo tơkĕch hiôk chơt păng hlôm keng.

¹⁶ Lăp Hom pơgơ̆p Kră Yang mơ̆t tơ pơlei Đawit, na Mikal kon adruh Sôl, lăng tơmang đơ̆ng 'măng-'mŏk, 'bôh Đawit suang chơt hiôk 'bơ̆t anăp Kră Yang, na sư đei jơhngơ̆m ưh kơ iă kơ Đawit.

¹⁷ Lu sư ba Hom pơgơ̆p Kră Yang ming tơ anih bơsŭn Đawit đei hơmet lê̆ boih anih kơ Hom pơgơ̆p; đơ̆ng noh Đawit pơyơ̆r tơmam soi 'buh pơkhôi kơ Kră Yang păng tơmam soi et sa chơt hiôk.

¹⁸ Kơplah Đawit pơyơ̆r tơmam soi 'buh pơkhôi păng tơmam soi et sa chơt hiôk, na sư yua anăn Kră Yang Tih Hloh tuh ăn pŭn hiôk kơ kon pơlei;

¹⁹ Sư asong kơ đĭ-đăng kon pơlei Isơrael, lu tơpôl lăm Isơrael mă drŏ-nglo dah drŏ-kăn, minh 'nu minh pôm 'bĕng mi minh kơnăt 'nhĕm phang, hăm minh tơpei 'bĕng hơmu kro, đơ̆ng noh, đĭ-đăng lu sư brŏk tơ hnam sư kơdih.

²⁰ Đawit kư̆m dai brŏk wă sơkat pŭn hiôk kơ hnam dơnŏ sư kơdih; mă-lei Mikal kon adruh Sôl, năm sơng Đawit, na khan: “Năr 'nâu pơtao đe Isơrael pơm kơdih akâu wă kơ đei ư-ang, mah suang akâu hoh 'bơ̆t anăp lu đam drŏ-kăn sư, pơm thoi bơngai ưh kơ rơ-a kiơ!”

²¹ Đawit tơl khan: “Inh suang wă ư-ang kơ Kră Yang Tơ'ngla mă rơih iŏk inh ưh kơ rơih 'bă ih păng đĭ kơ adrĕch sư, Sư pôk inh pơm pơtao kon pơlei Isơrael, jing kon pơlei Kră Yang, lei na inh suang chơt hiôk wă ư-ang kơ Kră Yang.”

²² Wă kơ đe lăng inh jing bơngai lŭch hloh; inh gô tơjur akâu inh hloh kơ noh dơ̆ng, mă lu bơngai drŏ-kăn awih awăn gô jing pôk pơyom kơ inh hloh.

²³ Thoi noh, Mikal; kon adruh Sôl, ưh kơ đei pơjing hơ'lơ̆p ôh truh tơ sư lôch.