II Sam 5 - Sơ̆p Hlabơar Nơ̆r 'Bok Kei-Dei

Đawit pơm pơtao kơ đĭ-đăng dêh char Isơrael

¹ Đĭ-đăng adrĕch Isơrael năm tơ Đawit tơ Hêbrôn, na khan: “Lu nhôn 'nâu jing sĕch akar ih.

² Adrol sơ̆ kơplah Sôl oei pơm pơtao, ih boih pơgơ̆r lu linh Isơrael năm tơblah. ‘Kră Yang đei khan kơ ih’ ‘Ih boih gô wei rong kon pơlei pơla Isơrael Inh, păng pơgơ̆r lu sư.”

³ Đĭ-đăng lu kră bơngai Isơrael năm tơ pơtao Đawit tơ Hêbrôn; pơtao Đawit đei pơm tơdrong pơgơ̆p hăm lu sư tơ Hêbrôn 'bơ̆t anăp Kră Yang, na lu sư tuh đak rơmă pôk Đawit pơm pơtao Isơrael.

⁴ Kơplah Đawit pơm pơtao, sư 'nao pêng-jĭt sơnăm păng sư pơgơ̆r lăm puăn-jĭt sơnăm.

⁵ Tơ Hêbrôn, Đawit pơgơ̆r lu bơngai Juđa tơpơh sơnăm tơdrâu khei, păng tơ Jêrusalem, sư pơm pơtao pơgơ̆r đĭ-đăng Isơrael păng Juđa pêng-jĭt pêng sơnăm.

Pơtao Đawit blah iŏk pơlei Jêrusalem

⁶ Đawit wang blah pơlei Jêrusalem, lu bơngai Jêbus, oei tơ noh. Lu sư khan kơ Đawit: “Ih lê̆ kơ mơ̆t tơ âu, mă lu bơngai măt tol hăm jơ̆ng jo đĕch kư̆m gơh puh lê̆ ih.” Lu sư pơma noh wă khan: “Đawit ưh kơ layơ wă gơh mơ̆t tơ âu.”

⁷ Mă-lei Đawit kư̆m blah iŏk kơđông Siôn, đe krao plei Đawit.

⁸ Kơplah noh, Đawit khan: “Dah bơngai bu wă blah bơngai Jêbus, athei mơ̆t rok trong đing đak, blah lu bơngai jơ̆ng jo măt tol lu bơngai mă ayăt hăm Đawit.” Đei nơ̆r khan: “Lu bơngai măt tol jơ̆ng jo ưh kơ gơh mơ̆t tơ hnam pơtao âu.”

⁹ Đawit oei lăm kơđông anăn kơđông pơlei Đawit. Sư man dur puăn pah đơ̆ng groi Milô năm tơ gah lăm.

¹⁰ Đawit rai đunh rai pran kơtang yua kơ Kră Yang 'Bok Kei-Dei Tih Hloh oei hơdai sư.

¹¹ Hiram pơtao pơlei Tirơ, wơh bơngai năm tơ Đawit, chĕp ba 'long hơngo, chông ba thơ̆ jang 'long, thơ̆ teh tơmo wă man hnam pơtao kơ Đawit.

¹² Kơplah noh pơtao Đawit băt boih kơ Kră Yang pôk sư pơm pơtao Isơrael, păng ăn kơ teh đak sư pơgơ̆r đe pơyom yua kơ đei lơi yua kơ kon pơlei Isơrael Sư.

Lu kon Đawit đe tơpŭ lăm pơlei Jêrusalem

¹³ Đơ̆ng rŏng kơ Đawit lĕch đơ̆ng pơlei Hêbrôn năm tơ pơlei Jêrusalem, sư chă lu akăn tơm păng akăn kơnhŏng dơ̆ng na đei pơjing ăn kơ sư lu kon drŏ-nglo drŏ-kăn dơ̆ng.

¹⁴ 'Nâu anăn lu kon sư tơpŭ lăm pơlei Jêrusalem: Sammua, Sôbap, Nathan, Sôlômôn.

¹⁵ Iphar, Êlisua, Nêphek, Japhia,

¹⁶ Êlisama, Êliađa, păng Êliphêlet.

Đawit tơblah hăm bơngai Philistin jei sư

¹⁷ Lăp bơngai Philistin băt kơ Đawit đei tuh rơmă pôk pơm pơtao Isơrael boih, na năm chă wă rôp Đawit. Đawit kơtơ̆ng băt tơdrong noh, jur năm ôn hloi tơ lăm kơđông.

¹⁸ Kon pơlei Philistin năm gă tơ lăm thŭng Rêphaim.

¹⁹ Đawit krao apinh Kră Yang: “Inh hăm gơh năm blah bơngai Philistin ưh? Ih hăm jao lu sư lăm tơpang ti inh?” Kră Yang tơl: Năm bĕ yua kơ Inh jao boih lu sư lăm tơpang ti ih.

²⁰ Đawit năm tơ pơlei Baal Phêrasim, 'nâu mă anih tơblah jei sư. Đawit khan: “Kră Yang blah pơchah lu bơngai ayăt 'bơ̆t anăp inh, thoi đak blah pơchah bơnơ̆;” na sư anăn anih 'nâu pơlei Baal Phêrasim.

²¹ Bơngai Philistin kơdâu achăng lê̆ lu rup yang lu sư kơtă doh; Đawit hăm lu bơngai kiơ̆ sư iŏk chĕp ba lu rup yang noh.

²² Lu linh bơngai Philistin wơ̆t gă lăm thŭng Rêphaim dơ̆ng.

²³ Đawit krao apinh Kră Yang, Sư tơl: “Ih 'nĕ kơ năm tơpăt, mă-lei athei năm wer đơ̆ng rŏng blah lu sư tơklă kơdrơ̆ng 'long hơngo bri.

²⁴ 'Bơ̆t kơplah mă ih kơtơ̆ng jơ̆ng yak lăm kơdrơ̆ng 'long hơngo bri ih athei năm blah hloi, yua kơ 'bơ̆t kơplah noh Kră Yang năm adrol kơ ih blah lu linh Philistin.”

²⁵ Đawit kiơ̆ tôm tơdrong Kră Yang bơtho pơkă kơ sư; sư blah druh bơngai Philistin đơ̆ng Gibeôn truh tơ Geser.