II Sam 3 - Sơ̆p Hlabơar Nơ̆r 'Bok Kei-Dei

Lu kon Đawit tơpŭ đơ̆ng Hêbrôn

¹ Đei tơdrong tơblah đunh tơpă khŭl Đawit hăm khŭl Sôl, gah khŭl Đawit rai đunh rai pran, na gah khŭl Sôl rai đunh rai rơdu tơrăn.

² Tơ Hêbrôn lu akăn Đawit pơjing kon drŏ-nglo ăn kơ pơtao Đawit; kon kơdră sư anăn Amnôn đơ̆ng Ahinôam bơngai Jêsreel tơpŭ ăn.

³ Kon mă 'bar sư Kilêap, đơ̆ng Abigail đêl akăn Nabal bơngai Karmel tơpŭ. Kon mă pêng anăn Apsalôm kon drŏ-nglo Maka kon adruh Thamai, pơtao Gêsur.

⁴ Kon mă puăn Adonija, đơ̆ng yă Hagit, kon drŏ-nglo mă pơđăm anăn Sephatia, kon kă Abitan;

⁵ păng kon drŏ-nglo mă tơdrâu anăn Itrêam, đơ̆ng yă Egla akăn Đawit. 'Nâu lu kon drŏ-nglo mă Đawit pơjing kơplah sư oei tơ pơlei Hêbrôn.

Apner năm mơ̆t tơ gah Đawit

⁶ Lăm kơplah khŭl Sôl hăm khŭl Đawit oei tơblah băl, na Apner dŏng gah Sôl.

⁷ Pơtao Sôl đei minh 'nu akăn kơnhŏng, anăn sư Ripba, kon adruh Aiyah. Isbôset kon drŏ-nglo pơtao Sôl chrih kơ Apner khan: Yua kơ kiơ ih năm tơ akăn kơnhŏng 'bă inh?

⁸ Apner blĕk hil dêh yua kơ Isbôset pơma, na khan: “Inh âu thoi kŏ kơ bơngai Juđa dah liơ?” Inh oei đĭ jơhngơ̆m kiơ̆ gah khŭl Sôl 'bă ih; 'nhŏng oh, buăl juăt pơtao Sôl truh tơ dang ei. Inh kư̆m ưh kơ wă jao pơtao Sôl lăm ti Đawit, na dang ei pơtao pơma chrih kơ inh khan glăi hăm bơngai drŏ-kăn 'nâu!

⁹ Apinh Kră Yang phak Apner mă trăp, tơdah inh ưh kơ kiơ̆ Đawit pơkeh dôm tơdrong Kră Yang đei pơkă hăm sư.

¹⁰ Kră Yang đei pơkă khan wă iŏk lê̆ tơdrong pơgơ̆r teh đak đơ̆ng pơtao Sôl, ăn kơ Đawit pơm pơtao pơgơ̆r Isơrael păng Juđa, iŏk đơ̆ng pơlei Đan truh tơ Bêrsêba.

¹¹ Isbôset ưh kơ pơ̆n tơl minh nơ̆r hăm Apner yua hli kơ sư.

¹² Apner wơh hloi bơngai năm roi truh tơ Đawit khan dêh char bu âu? Ih athei pơkă pơgơ̆p hăm inh, na inh gô tơgŭm chông ba pơđĭ kon pơlei Isơrael brŏk tơ ih.

¹³ Đawit tơl: “Ơ, inh gô pơkă pơgơ̆p hăm ih. Inh apinh ih minh tơdrong: Ih ưh kơ gơh năm tơ'bơ̆p inh, ăp kơ ih chông ba Mikal, kon adruh Sôl 'mơ̆i, tơdah ih wă năm tơ'bơ̆p inh.”

¹⁴ Pơtao Đawit wơh hloi bơngai năm tơ Isbôset kon tơdăm Sôl na khan: Apinh ih pơdrâu Mikal akăn inh mă inh đei oei hăm minh-hrĕng tŏ kơ̆l tơmam drŏ-nglo Philistin.

¹⁵ Na Isbôset wơh bơngai năm iŏk drŏ-kăn noh đơ̆ng hnam klo sư, Phatiêl, kon drŏ-nglo Lais.

¹⁶ Klo sư năm ba yak rah nhơ̆m rah kiơ̆ đơ̆ng rŏng ba truh tơ Bahurim, na Apner khan kơ sư: “Ih brŏk bĕ,” na sư brŏk brăi.

¹⁷ Apner pơma dơnuh lê̆ adrol hăm lu kră bơngai Isơrael: “Đơ̆ng sơ̆ lu iĕm hơpơi wă kơ Đawit pơm pơtao.

¹⁸ Na dang ei iĕm athei pơm bĕ; yua kơ Kră Yang đei pơkă hăm Đawit: ‘Inh gô yua Đawit đĭch đam Inh gô dŏng pơklaih adrĕch Isơrael Inh đơ̆ng tơpang ti bơngai Philistin păng đơ̆ng dôm lu bơngai ayăt nai.’ ”

¹⁹ Apner kư̆m pơma pơđâu thoi noh hăm lu adrĕch Bênjamin; na sư năm tơ Hêbrôn roi tơbăt ăn kơ Đawit dôm tơdrong mă lu bơngai Isơrael hăm lu bơngai Bênjamin hơpơi.

²⁰ Kơplah Apner năm roi kơ Đawit tơ Hêbrôn, sư chông ba 'bar-jĭt 'nu bơngai, na Đawit hơmet tơmam et sa ăn kơ Apner hăm lu bơngai kiơ̆ sư.

²¹ Đang kơ et sa Apner pơma dơnuh hăm Đawit khan: “Inh gô akŭm pơđĭ lu bơngai Isơrael năm ba brŏk tơ pơtao, lu sư gô pơgơ̆p pơkă pơkăm hăm ih, na ih pơm yŏng pơtao pơgơ̆r đĭ-đăng kơ dêh char Isơrael, thoi kơ ih đei hơpơi.” Đawit ăn kơ Apner brŏk na sư brŏk hiôk-hian.

Jôap pơlôch Apner

²² Kơplah noh, Jôap hăm lu linh Đawit 'nao brŏk đơ̆ng tơblah lu bơngai ayăt, đei chĕp ba lơ tơmam đêl blah iŏk. Kơplah noh Apner ưh pă hơdai hăm Đawit tơ Hêbrôn, yua kơ Đawit đĭ ăn kơ sư brŏk boih, na sư brŏk hiôk-hian.

²³ Lăp Jôap hăm đĭ-đăng lu linh sư brŏk truh boih, Jôap kơtơ̆ng khan: Apner kon tơdăm Nêr đei năm pơma dơnuh hăm pơtao, pơtao ăn kơ sư brŏk, na lu sư lĕch brŏk hiôk-hian.

²⁴ Jôap năm tơ pơtao na khan: “Pơtao ih pơm kiơ thoi noh? Apner năm tơ'bơ̆p ih, liơ mă ih ăn kơ sư brŏk na sư brŏk hloi boih?

²⁵ Pơtao ih băt hloh Apner, kon tơdăm Nêr, sư năm wă hơlĕnh pơdăr kơ ih, wă kơ băt trong ih yak năm, hăm wă kơ chă băt dôm tơdrong jang pơtao pơm.”

²⁶ Đang kơ pơma hăm Đawit Jôap weh, wơh hloi bơngai druh 'moi Apner wă kơ tam druh tam tơ đak sơlŭng Sira, lu sư pơtơm Apner brŏk hơlơ̆k, sơmă Đawit ưh kơ băt.

²⁷ Lăp Apner brŏk hơlơ̆k truh tơ Hêbrôn, Jôap chông hơdrô̆ Apner weh tơ cheng kơ 'măng dur pơlei, nhen thoi wă pơma dơnuh tơdrong tơduă măr sư, wă 'mong pham đêl Apner pơlôch oh sư Asahel, na 'bet hloi klak, na Apner lôch hloi.

²⁸ Đơ̆ng rŏng kơ Đawit băt boih, na sư khan: “Inh hăm dêh char pơtao inh ưh kơ đei layơ yoch 'bơ̆t anăp Kră Yang kơ pham Apner, kon tơdăm Nêr.

²⁹ Thŭ pham Apner noh tuh tơ kơpal kơ̆l Jôap hăm đĭ-đăng adrĕch 'bă sư păng adrĕch sư ưh kơ đei bu huay kơ đei jĭ krơ, jĭ chin, jopo, mơ'nah lôch kơ đao, mơ'nah tơmam sa ưh mah”

³⁰ Jôap hăm Abisai 'nhŏng sư, pơlôch Apner, yua kơ Apner pơlôch Asahel, oh măr sư, năr tơblah tơ Gibeôn.

³¹ Đawit khan kơ Jôap hăm đĭ-đăng kon pơlei kiơ̆ sư tơ noh: “Hek bĕ ao, asu 'bi tơ akâu, na nhơ̆m hmoi kơ Apner;” lu bơngai năm 'bŭ yak adrol kơ hơbang tung Apner, Đawit kiơ̆ đơ̆ng rŏng kơ đe tung Apner.

³² Lăp lu sư 'bŭ Apner đang boih tơ Hêbrôn, na pơtao nhơ̆m hmoi ôr 'bơ̆t bơsat Apner; đĭ-đăng kon pơlei kư̆m wang nhơ̆m hmoi.

³³ Pơtao hmoi jô̆ hơdrĭ kơ Apner: “Liơ Apner ih lôch thoi bơngai kơhlôh kơwao.

³⁴ Ti ih ưh kơ đei chô̆, jơ̆ng ih kư̆m ưh kơ đei hơnuh. Ih pơ̆k lôch thoi kơ bơngai pơ̆k lôch 'bơ̆t anăp lu bơngai chă pơlôch kư̆ kă.” Na đĭ-đăng bơngai nhơ̆m hmoi kơ sư dơ̆ng.

³⁵ Đơ̆ng noh đĭ-đăng lu sư năm jê̆ tơ Đawit, pơlung pơlŭt sư sa 'biơ̆ 'bĕng tŏ sĕt adrol kơ 'năr mơ̆t. Mă-lei Đawit pơkăm khan: “Tơdah adrol kơ 'năr mơ̆t inh đei sa minh pôm 'bĕng dah tơmam sa kiơ nai, apinh Kră Yang 'Bok Kei-Dei phak inh mă trăp.”

³⁶ Kon pơlei wang drơ̆ng na lăp đon kơ tơdrong noh, kư̆m thoi lu sư ngăl juăt kơ lăp đon dôm tơdrong kiơ pơtao pơm.

³⁷ Lăm 'năr noh kon pơlei Isơrael băt kơ pơtao ưh kơ đei athei đe pơlôch Apner, kon tơdăm Nêr.

³⁸ Pơtao khan kơ lu đĭch đam sư: “Lu iĕm ưh kơ băt ôh hă 'năr 'nâu, minh 'nu bơngai pơm tih minh 'nu bơngai yŏng mơng lăm lu bơngai Isơrael lôch boih.

³⁹ Mă inh 'nâu đei tuh đak rơmă pôk pơm pơtao, mă-lei inh 'bôh inh rơdu tơrăn pơting hăm lu bơngai 'nâu, lu kon drŏ-nglo Sêruia; lu sư pơm kơtang hloh kơ inh Apinh Kră Yang pơm tơwih kơ lu bơngai pơm kơnê̆ 'nâu, kiơ̆ tơdrong kơnê̆ lu sư!”