II Sam 24 - Sơ̆p Hlabơar Nơ̆r 'Bok Kei-Dei

Jô̆ kơ̆l kon bơngai

¹ Kră Yang hil dơ̆ng kơ kon pơlei Isơrael. Kră Yang pơdrŭt pơtao Đawit pơrăm lu sư, Sư khan hăm pơtao Đawit: “Athei năm jô̆ kon pơlei Isơrael păng kon pơlei Juđa.”

² Pơtao athei Jôap, yŏng pơgơ̆r linh, oei hơdai hăm pơtao: “Athei năm jô̆ bơngai jơ̆p kơ lu adrĕch adrung Isơrael, iŏk đơ̆ng pơlei Đan gah yă-nơ̆m truh tơ Bêrsêba tơ gah gơal, roi ăn kơ inh băt đĭ-đăng kon pơlei lăm lu sơnăm oei gơh pơm linh dôm yơ.”

³ Jôap tơl: “Apinh Kră Yang 'Bok Kei-Dei ih, ăn kơ ih đei minh khŭl linh tơpôl lơ hloh kơ hrĕng wơ̆t khŭl linh mă đei dang ei. Apinh ăn kơ măt ih kơdih yŏng tơ'ngla inh gơh 'bôh tơdrong noh. Mă-lei liơ pơtao yŏng tơ'ngla inh 'maih pơm tơdrong 'nâu?”

⁴ Lei ră nơ̆r pơtao pơkă, ưh kơ đei tơplih, na Jôap păng lu yŏng linh, khŏm athei năm jô̆ kơ̆l kon bơngai jơ̆p kơ teh đak Isơrael.

⁵ Lu sư năm tŏk hlôi kơ đak Krong Jôrđăn păng pơtơm jô̆ bơngai iŏk đơ̆ng pơlei Arôe, păng minh pôm pơlei oei lăm thŭng, na tŏk tơ tơring Gat truh tơ pơlei Jaser.

⁶ Lu sư truh tơ tơring Gileat, năm rok tơpăt hlôi kơ teh đak bơngai Tahtim, truh tơ pơlei Hôsi pơlei Đan Jaan đơ̆ng noh dăr brŏk tơ pơlei Siđôn.

⁷ Lu sư năm truh tơ pơlei Tirơ, minh pôm pơlei tih kơjăp, păng năm jơ̆p kơ pơlei bơngai Hêwit păng bơngai Kanaan. Tuch-luch, lu sư năm truh tơ pơlei Bêrsêba gah tơring teh glă gah gơal lăm dêh Juđa.

⁸ Lu sư brŏk truh tơ pơlei Jêrusalem đơ̆ng rŏng kơ năm jơ̆p teh đak hiong tơsĭn khei 'bar-jĭt năr.

⁹ Jôap tơbăt ăn kơ pơtao tơdrong jô̆ kơ̆l bơngai Isơrael đei tơhngam-hrĕng rơbâu 'nu bơngai linh tơblah gơh hơgei chĕp đao, păng lăm Juđa đei pơđăm-hrĕng rơbâu 'nu.

Tơdrong jĭ hơbuh

¹⁰ Đơ̆ng rŏng kơ jô̆ kơ̆l kon bơngai đang boih, pơtao Đawit jơhngơ̆m sư ưh kơ hiôk păng khan kơ Kră Yang: “Kơkuh kơ Ih Kră Yang, inh đei pơm boih minh tơdrong kơtul bơlŭk păng yoch trăp. Dang ei inh apinh Kră Yang mơnat ăn kơ inh đĭch đam Ih.”

¹¹ Pơgê năr đơ̆ng rŏng adrol kơ pơtao Đawit hơđơ̆r, Kră Yang khan kơ Gat bơngai khan lê̆ adrol, sư bơ̆jang lăm hnam pơtao Đawit:

¹² “Ih athei năm khan kơ Đawit: ‘Kră Yang khan thoi âu: Inh đei pêng tơdrong wă hơmet ih. Inh ăn kơ ih rơih iŏk minh lăm pêng tơdrong noh, Inh gô kiơ̆ kơ noh na hơmet ih.’ ”

¹³ Gat bơngai khan lê̆ adrol năm roi ăn kơ pơtao Đawit. Bơngai khan lê̆ adrol apinh pơtao: “Pơtao rơih iŏk tơdrong ayơ: Tơpơh sơnăm pơngot rơwĕt jơ̆p-jang kơ lăm teh đak pơtao, dah pêng khei pơtao athei kơdâu ôn lăm kơplah ayăt oei druh pơtao, dah pêng năr đei tơdrong jĭ hơbuh tơ jơ̆p-jang teh đak? Dang ei apinh ih athei tơchĕng lăng mă hơlen, wă kơ inh gơh roi ăn kơ Kră Yang Tơ'ngla wơh inh noh thoi yơ.”

¹⁴ Pơtao Đawit khan kơ Gat bơngai khan lê̆ adrol: “Inh hơwơ̆l hơwang dêh, inh anat kơ wă rơih. Kơtrơ̆m lu bơ̆n jah huŏng lăm tơpang ti Kră Yang đĕch 'lơ̆ng hloh, yua kơ Sư đei tơdrong 'mêm mơnat tih dêh! Apinh Ih 'nĕ ăn kơ inh huŏng lăm ti kon bơngai!

¹⁵ Na Kră Yang ăn tơdrong jĭ hơbuh jur tơ kon pơlei Isơrael đơ̆ng pơgê năr noh truh tơ tôch jơ Sư pơkă. Đơ̆ng Đan truh tơ Bêrsêba, đei tơpơh-jĭt rơbâu 'nu bơngai lôch.

¹⁶ Linh jang 'lơ̆ng chro ti sư tơ gah pơlei Jêrusalem wă pơrăm lê̆ pơlei, mă-lei Kră Yang ưh pă wă pơmat lu sư dơ̆ng, na Sư khan kơ linh jang 'lơ̆ng mă oei pơrăm kon pơlei pơla: “Tôm boih! Dui ti ih brŏk bĕ!” Kơplah noh linh jang 'lơ̆ng Kră Yang oei 'bơ̆t dơnih pơjuă 'ba, Arauna, bơngai Jêbus.

¹⁷ Lăp pơtao Đawit 'bôh linh jang 'lơ̆ng pơlôch pơrăm kon pơlei pơla, na pơtao apinh Kră Yang khan: “Inh boih mă bơngai yoch, inh boih mă bơngai glăi dêh! Na mă lu kon triu 'nâu lu sư ưh kơ đei pơm tơdrong kiơ ôh? Apinh ti Kră Yang pơrăm inh hăm 'nhŏng oh hnam 'bă inh đĕch.”

Pơtao Đawit pơm chơnang soi

¹⁸ Lăm năr noh, Gat bơngai khan lê̆ adrol năm khan kơ pơtao Đawit: “Apinh pơtao năm truh tơ dơnih pơjuă 'ba Arauna bơngai Jêbus păng tơiung pơdơ̆ng 'bơ̆t doh minh pôm chơnang soi kơkuh kơ Kră Yang.”

¹⁹ Pơtao Đawit năm hloi kiơ̆ kơ nơ̆r Gat bơngai khan lê̆ adrol tơ'bôh thoi Kră Yang đei bơtho pơkă ăn kơ sư.

²⁰ Arauna ngơk lăng 'bôh pơtao păng đĭch đam sư năm adrol kơ sư, na sư năm lĕch tơkan kŭp kơ̆l drap muh măt tơ teh, kơkuh kơ pơtao.

²¹ Arauna khan: “Ơ pơtao yŏng tơ'ngla inh, năm tơ'bơ̆p đĭch đam hăm đei tơdrong kiơ wă bơtho tơ'bôh ưh?” Pơtao Đawit tơl khan: “Inh năm răt dơnih pơjuă 'ba ih. Inh wă tơiung pơdơ̆ng chơnang soi kơkuh 'bơ̆t anih âu. Wă kơkuh kơ Kră Yang păng wă kơ tơdrong jĭ hơbuh âu pơdơh ưh pă pơrăm kon pơlei pơla dơ̆ng.”

²² Arauna tơl pơtao Đawit: “Apinh pơtao yŏng tơ'ngla inh mơ̆ng kơ ih wă yua dơnih pơjuă 'ba 'nâu păng pơyơ̆r tơmam soi kiơ̆ kơ pơtao tơchĕng 'nâu đei boih rơmo wă pơyơ̆r pơm tơmam soi 'buh, kư̆m đei gơ'bang pơjuă 'ba păng 'long ăt rơmo wă pơm 'long ŭnh.

²³ Ơ pơtao! Arauna apinh pơyơ̆r ăn kơ pơtao đĭ-đăng tơmam noh.” Arauna tơl dơ̆ng: “Apinh Kră Yang 'Bok Kei-Dei pơtao tơl tơwih nơ̆r pơtao.”

²⁴ Mă-lei pơtao tơl khan: “Ưh kơ gơh. Inh wă răt păng ăn kơ ih jên tôm, inh ưh kơ wă pơyơ̆r ăn kơ Kră Yang 'Bok Kei-Dei inh lu tơmam soi 'buh, mă inh ưh kơ đei hiong jên răt.” Na pơtao Đawit răt dơnih noh păng rơmo noh dang tơdrâu tơpei hu.

²⁵ Đawit pơm minh pôm chơnang soi kơkuh, wă kơkuh kơ Kră Yang, pơtao pơyơ̆r kơ Kră Yang tơmam soi 'buh. Păng tơmam soi hiôk-hian. Kră Yang tơl tơwih nơ̆r pơtao krao apinh ăn kơ teh đak, păng tơdrong jĭ hơbuh pơdơh ưh pă pơrăm kon pơlei Isơrael dơ̆ng.