II Sam 23 - Sơ̆p Hlabơar Nơ̆r 'Bok Kei-Dei

Dôm lu nơ̆r Đawit pơma tuch-luch

¹ 'Nâu boih lu nơ̆r pơtao Đawit pơma tuch-luch: Nơ̆r Đawit kon Jese nơ̆r mă bơngai đe pôk atŏk kơjung, mă Kră Yang 'Bok Kei-Dei Jakôp tuh đak pơgang 'bâu phu pôk ăn tơdrong jang; sư chă nơ̆r lu tơdrong hơri đei kon pơlei Isơrael lăp đon.

² Yang Bơhngol 'Lơ̆ng Kră Yang yua inh pơma bơtho. Nơ̆r Sư lăm hơpiĕt inh.

³ Kră Yang 'Bok Kei-Dei kon pơlei Isơrael bơtho tơ'bôh. Tơmo tih kon pơlei Isơrael pơma hăm inh: “Bơngai ayơ pơgơ̆r kon bơngai mă 'lơ̆ng tơpăt, bơngai ayơ pơgơ̆r hăm jơhngơ̆m hli yom kơ Kră Yang 'Bok Kei-Dei.

⁴ Gô thoi lĕ hơdah pơchrang til pơgê, kơplah măt năr lĕch. Thoi lĕ til pơgê hrôih ưh kơ đei hơmơ̆l, pơchrang hơdah đơ̆ng rŏng kơ 'mi. Pơm ăn kơ 'nhĕt 'long chăt arih đơ̆ng lăm teh.”

⁵ Kră Yang 'Bok Kei-Dei sĭt gô tuh ăn tơdrong pŭn hiôk kơ adrĕch adrung inh thoi noh! Yua kơ Sư đei pơjing boih hăm inh tơdrong pơgơ̆p khŏm khŏm. Tơdrong đei pơkă tôm, ưh kơ đei tơplih dôm tơdrong inh hơpơi, sư gô ăn tơdrong noh bluh chăt.

⁶ Mă-lei lu khŭl bơngai kơnê̆, đĭ-đăng lu sư tă kơ buch hŭt lê̆ thoi lĕ tơm jơla ưh kơ đei bơngai bu pơ̆n kơđôp lu sư lăm tơpang ti.

⁷ Bơngai bu hơtŭt 'bơm lu sư, athei đei tơmam hăm bơsei, dah 'long, tơju. Ŭnh sa lu sư lek hach kơtă anih noh hloi.

Pêng 'nu bơngai nuih kơtang pơtao Đawit

⁸ 'Nâu anăn lu bơngai nuih kơtang Đawit: Jôsep Basêbêt, bơngai Tahkêmôn, chĕp kơ̆l lu bơngai nuih kơtang. Đe kư̆m krao sư Ađinô, bơngai Êsen, sư pơlôch tơhngam-hrĕng 'nu bơngai lăm minh 'măng.

⁹ Lăm pêng 'nu bơngai nuih kơtang đei Êlêasar kon Đôđô, bơngai Ahôhi. Sư kiơ̆ pơtao Đawit kơplah lu sư tơdơ̆ng băl hăm kon pơlei Philistin akŭm băl tơ noh wă tơblah. Linh Isơrael kơdŭn tơ rŏng.

¹⁰ Mă-lei sư dơ̆ng kơtă anih păng koh pơlôch kon pơlei Philistin truh tơpang ti sư rơgah hơmren klep kơjăp kơ đao gưm, khŭl linh Isơrael wih hơlơ̆k tơgŭm sư, mă-lei lăp chă dônh akŭm tơmam đơ̆ng akâu bơngai lôch đĕch. Lăm năr noh, Kră Yang ăn kơ kon pơlei Isơrael kĕ jei jơnei tih.

¹¹ Đơ̆ng rŏng kơ sư đei Samma, kon Agê bơngai Hara. Linh Philistin akŭm tơ pơlei Lêhi. Tơ noh đei minh hlak mir pơtăm tơh. Linh Isơrael kơdâu ôn kơ linh Philistin.

¹² Mă-lei sư dơ̆ng tŏk-bŏk lăm mir blah pơlôch linh Philistin păng bơwei mir tơh. Kră Yang ăn kơ linh Isơrael kĕ jei jơnei tih.

¹³ Pêng 'nu bơngai lăm khŭl pêng-jĭt 'nu bơngai nuih kơtang, lu sư năm jur tơ hơgơp tơmo Ađulam lăm bơyan yuă 'ba wă tơ'bơ̆p pơtao Đawit. Minh khŭl linh Philistin pơm kơđông dơ̆ng tơ lăm thŭng Rêphaim.

¹⁴ Lu sư blah iŏk boih pơlei Betlehem. Kơplah noh, pơtao Đawit oei tơ lăm anih ôn kơ'nơp.

¹⁵ Pơtao 'blŏk tơ hnam păng khan: “Rŏ kơ đei bơngai bu ăn kơ inh nhă đak sŏ iŏk đơ̆ng 'bơ̆t 'măng jang pơlei Betlehem!

¹⁶ Na pêng 'nu bơngai nuih kơtang năm mơ̆t tơ lăm kơđông linh Philistin, sŏ iŏk đak đơ̆ng sơlŭng jê̆ 'măng jang pơlei Betlehem, chĕp ba ăn kơ Đawit. Mă-lei pơtao sơngah ưh kơ nhă. Pơtao tuh hŭt lê̆ păng pơyơ̆r ăn kơ Kră Yang.

¹⁷ Pơtao khan: “Kơkuh kơ Ih Kră Yang, apinh ih 'nĕ ăn kơ kon nhă đak noh, yua kơ 'nâu jơ̆ pham lu bơngai hŭt akâu sư kơdih năm sŏ iŏk na brŏk ăn kơ kon.” Na pơtao sơngah ưh kơ nhă đak noh. 'Noh jơ̆ jơnei tih lu pêng 'nu bơngai nuih kơtang.

Abisai păng Bênaia

¹⁸ Abisai 'nhŏng Jôap kon Sêruia, pơm yŏng lu bơngai nuih kơtang sư hiŏng tơju 'bet pơlôch pêng-hrĕng 'nu bơngai, na đei anăn lăm pêng 'nu bơngai nuih kơtang.

¹⁹ Sư đei anăn pơyom hloh lăm khŭl pêng-jĭt 'nu, păng pơgơ̆r lu sư, mă-lei ưh kơ gơh jô̆ mơ̆t lăm pêng 'nu bơngai noh.

²⁰ Bênaia, kon Jêhôiada, đơ̆ng pơlei Kapsêl, minh 'nu bơngai nuih kơtang, đei lơ jơnei tih, sư boih pơlôch 'bar 'nu kon drŏ-nglo Ariêl, bơngai Môap sư boih kư̆m jur tơ lăm sơlŭng pơlôch minh pôm dăm-brang lăm minh năr prĕl jur.

²¹ Sư boih kư̆m pơlôch minh 'nu bơngai Êyiptơ tih kơjung. Bơngai Êyiptơ chĕp tơju kơplah noh Bênaia lăp đei 'long jra, sư rôp hơđuh iŏk tơju đơ̆ng ti bơngai Êyiptơ păng iŏk tơju bơngai noh na pơlôch bơngai noh.

²² Bênaia, kon Jêhôiada, đei lơ jơnei tih noh na sư đei anăn lăm khŭl pêng 'nu bơngai nuih kơtang.

²³ Sư đei anăn pơyom hloh kơ khŭl pêng-jĭt 'nu bơngai, mă-lei ưh kơ gơh jô̆ mơ̆t lăm pêng 'nu bơngai noh, Đawit pôk sư pơgơ̆r khŭl linh.

Khŭl pêng-jĭt 'nu

²⁴ Lăm khŭl pêng-jĭt 'nu đei: Asahel oh Jôap; Êlhanan kon drŏ-nglo Đôđô đơ̆ng pơlei Betlehem;

²⁵ Samma đơ̆ng pơlei Harôt; Êlika kư̆m đơ̆ng pơlei Harôt;

²⁶ Hêlês bơngai Paltit; Ira kon Ikês đơ̆ng pơlei Têkôa.

²⁷ Abiêse đơ̆ng pơlei Anathôt; Nêbunai đơ̆ng pơlei Husa;

²⁸ Salmôn, adrĕch adrung Ahôhi; Maharai đơ̆ng pơlei Nettôpha;

²⁹ Hêlep kon Baanah đơ̆ng pơlei Nettôpha. Itai kon Ribai đơ̆ng pơlei Gibêah gah teh đak Bênjamin;

³⁰ Bênaia đơ̆ng pơlei Phirathôn; Hiđai đơ̆ng thong đak Gaas;

³¹ Abialbôn bơngai Arba; Asmawet, đơ̆ng pơlei Bahurim;

³² Aliaba đơ̆ng pơlei Saalbôn, kon Jasen;

³³ Jônathan kon Samma bơngai Hara; Ahiam kon Sarar, bơngai Hararit,

³⁴ Êliphêlet, kon Ahasbai đơ̆ng pơlei Maaka; Êliam, kon Ahithôphel đơ̆ng pơlei Gilô;

³⁵ Hêsrô đơ̆ng kông Karmel, Paarai bơngai Albit;

³⁶ Igai kon drŏ-nglo Nathan đơ̆ng pơlei Sôba; Bani bơngai Gat; (kon Hagri)

³⁷ Sêlek bơngai Ammôn; Naharai đơ̆ng pơlei Bêrôt, bơngai chĕp kơ Jôap tơmam tơblah kon drŏ-nglo Sêruia.

³⁸ Ira bơngai Ithrit, Garet kư̆m bơngai Ithrit.

³⁹ Uria bơngai Hêtit. Đĭ-đăng pêng-jĭt tơpơh 'nu bơngai nuih kơtang.