II Sam 21 - Sơ̆p Hlabơar Nơ̆r 'Bok Kei-Dei

Iung kơting ăn kơ adrĕch Gibeôn

¹ Lăm chăl Đawit đei pơngot rơwĕt tih truh tơ pêng sơnăm. Pơtao Đawit krao apinh Kră Yang; Kră Yang tơl: “Tơdrong pơngot rơwĕt truh yua kơ Sôl păng hnam dơnŏ sư đei hre pham, yua kơ Sôl đei pơlôch lu bơngai Gibeôn.”

² Bơngai Gibeôn ưh kơ trŏ gah adrĕch kon pơlei Isơrael, mă-lei lu sư adrĕch Amôrit mă oei oei. Bơngai Isơrael pơkă ưh kơ wă pơlôch lu sư, mă-lei pơtao Sôl yua kơ đei jơhngơ̆m lăp kơ lu adrĕch adrung Isơrael păng Juđa, lei na chă đon pơlôch lu sư. Na pơtao krao akŭm lu bơngai Gibeôn.

³ Pơtao Đawit apinh bơngai Gibeôn: “Inh athei pơm kiơ kơ lu iĕm? Inh pơm thoi yơ gơh huai iŏk tơdrong đơ̆ng Sôl pơm yoch, wă kơ lu iĕm krao apinh Kră Yang ăn tơdrong pŭn hiôk kơ kon pơlei hăm lu tơmam Sư.”

⁴ Bơngai Gibeôn tơl: “Hu maih ưh kơ gơh hơmet tơdrong lu nhôn hăm pơtao Sôl păng adrĕch hnam sư. Na, lu nhôn kư̆m ưh kơ gơh pơlôch bơngai bu lăm kon pơlei Isơrael.” Đawit jet: “Lu iĕm wă apinh mă tơdrong kiơ kiơ, inh gô ăn.”

⁵ Lu sư tơl pơtao: “Bơngai mă pơlôch lu nhôn boih, păng chă đon wă pơlôch đĭ lu nhôn dơ̆ng, wă kơ lu nhôn ưh pă đei bu oei arih lăm teh đak Isơrael.

⁶ Apinh pơtao pơjao ăn kơ lu nhôn tơpơh 'nu kon sâu bơngai noh, wă kơ lu nhôn hrek hơtol lu sư 'bơ̆t anăp Kră Yang, tơ Gibêah, pơlei pơtao Sôl, pơtao mă Kră Yang rơih?” Pơtao tơl: “Inh gô jao lu sư ăn kơ lu iĕm”

⁷ Pơtao Đawit wei lê̆ Mêphibôset, kon drŏ-nglo Jônathan, sâu tơm pơtao Sôl, yua kơ đei nơ̆r pơkă hăm Kră Yang gah bre pơtao Đawit hăm Jônathan, kon drŏ-nglo pơtao Sôl.

⁸ Mă-lei Đawit rôp jao Armôni păng Mephibôset, 'bar 'nu kon drŏ-nglo mă yă Rispa, kon drŏ-kăn Aiyah, tơpŭ ăn kơ pơtao Sôl; pơtao kư̆m rôp pơđăm 'nu kon drŏ-nglo yă Mêrap kon drŏ-kăn Sôl, 'bă lu sư noh Adriel, kon Barsilai, bơngai Mêhôlat.

⁹ Pơtao pơjao lu sư kơ bơngai Gibeôn. Lu sư hrek hơtol lu đe noh tơ kơpal groi, 'bơ̆t anăp Kră Yang, tơpơh 'nu bơngai noh lôch hơdai minh 'măng. Đe pơlôch lu sư trŏ kơ năr bơyan yuă 'ba blŭng-a, lăp đe 'nao yuă 'ba tơ'bâu.

¹⁰ Yă Rispa kon drŏ-kăn Aiya, iŏk minh blah 'bi lơ̆k kơpal tơmo, păng yă ei oei tơ noh đơ̆ng bơyan yuă blŭng truh tơ đei 'mi đơ̆ng kơpal plĕnh jruh tơ kơpal akâu lu bơngai lôch. Kơ'năr yă ei ưh kơ ăn sem păr jruh kơpal akâu bơngai lôch, kơmăng yă ei ưh kơ ăn sem bri năm jê̆.

¹¹ Đei bơngai tơbăt ăn kơ pơtao Đawit dôm tơdrong yă Rispa, kon drŏ-kăn Aiya, akăn kơnhŏng pơtao Sôl, đei pơm.

¹² Pơtao Đawit năm tơ'bơ̆p lu bơngai pơgơ̆r lăm pơlei Jabes tơ Gileat wă apinh iŏk kơting pơtao Sôl păng kơting Jônathan kon drŏ-nglo pơtao. Lu bơngai 'nâu iŏk tơtông boih akâu 'bar 'nu. 'Bă hăm kon sư dơ̆ng linh Philistin hơtol sư tơ anih Bêtsan đơ̆ng rŏng kơ lu sư pơlôch pơtao Sôl tơ kơpal Kông Gilbôa.

¹³ Pơtao chĕp ba kơting pơtao Sôl păng kơting Jônathan kon pơtao, đơ̆ng Jabes, đơ̆ng noh wơh lu bơngai năm iŏk kơting lu bơngai mă đe hrek hơtol noh.

¹⁴ Chĕp ba 'bŭ hơdai hăm kơting pơtao Sôl păng Jônathan kon pơtao, tơ Sêla lăm teh đak Bênjamin lăm bơsat Kis 'bă pơtao Sôl. Đơ̆ng rŏng kơ lu sư jang keh dôm tơdrong pơtao pơkă, Kră Yang 'Bok Kei-Dei tơl tơwih nơ̆r pơtao krao apinh păng tuh tơdrong pŭn hiôk ăn kơ teh đak.

Tơblah hăm kon pơlei Philistin

¹⁵ Bơngai Philistin đei tơblah hăm kon pơlei Isơrael dơ̆ng. Pơtao Đawit kơdih sư pơgơ̆r lu linh năm jur tơblah hăm lu bơngai Philistin. Kơplah oei tơblah, pơtao mơn lăm akâu sư lap rơmơ̆n dêh.

¹⁶ Isbi Benop minh 'nu bơngai Philistin gah adrĕch adrung bơngai Rapha tih kơjung đei tơju pơm păng kong trăp pêng kĭ minh puăt, păng kiĕo đao 'nao tơ kơiĕng, wă pơlôch pơtao Đawit.

¹⁷ Mă-lei Abisai, kon yă Sêruia năm dŏng pơtao, blah bơngai Philistin 'noh păng pơlôch lê̆ lu sư. Kơplah noh lu linh pơtao Đawit pơkă: “Pơtao ih 'nĕ pă lĕch tơblah hơdai lu nhôn dơ̆ng, kơnh pơtao pĭt hŭt pla ŭnh kơđeng kon pơlei Isơrael.”

¹⁸ Đơ̆ng rŏng kơ noh, tơdrong tơblah truh dơ̆ng hăm bơngai Philistin tơ pơlei Gop, kơplah noh Sibêkai, bơngai Husa, pơlôch Sap bơngai tih kơjung gah adrĕch adrung bơngai Rapha.

¹⁹ Tơblah minh 'măng nai dơ̆ng hăm bơngai Philistin kư̆m tơ pơlei Gop, Êlhanan kon drŏ-nglo Jaar Ôregim bơngai Betlehem, pơlôch Gôliat, bơngai pơlei Gat; đei tơju gơ̆r tih thoi 'long không đe tanh brai.

²⁰ Tơdrong tơblah đei truh dơ̆ng tơ pơlei Gat, tơ noh đei minh 'nu bơngai tih kơjung, jơ̆ng ti sư tă kơ đei tơdrâu tŏ hơnglâu ngăl, đĭ-đăng sư đei 'bar-jĭt puăn tŏ hơnglâu; bơngai 'nâu kư̆m adrĕch adrung bơngai Rapha.

²¹ Bơngai 'nâu pơma hơno hăm kon pơlei Isơrael; mă-lei Jônathan, kon drŏ-nglo Simêi 'nhŏng pơtao Đawit pơlôch sư.

²² Puăn 'nu mă roi tơ kơpal âu, tă kơ gah adrĕch adrung bơngai Rapha, pơlei Gat. Lu sư tă kơ lôch kơ ti pơtao Đawit păng khŭl linh sư.