II Sam 20 - Sơ̆p Hlabơar Nơ̆r 'Bok Kei-Dei

Sêba iung blah

¹ Tơ noh đei minh 'nu bơngai pơm pơrŭng, anăn sư Seba, kon drŏ-nglo Bikri, bơngai Bênjamin; Seba hlôm keng păng krao: “Lu bơ̆n ưh kơ đei kiơ gah Đawit, kư̆m ưh kơ đei yua kiơ hăm kon drŏ-nglo Jese! Ơ 'nhŏng oh Isơrael, rim 'nu athei brŏk tơ hnam kơdih”

² Đĭ-đăng bơngai Isơrael achăng lê̆ pơtao Đawit, kiơ̆ Seba kon drŏ-nglo Bikri; mă-lei bơngai Juđa oei kơjăp hăm pơtao sư kơdih, năm kiơ̆ pơtao đơ̆ng đak Krong Jôrđăn brŏk tơ Jêrusalem.

³ Lăp Đawit brŏk tơ hnam pơtao sư tơ pơlei Jêrusalem boih pơtao wơh bơngai chă mơjĭt 'nu akăn kơnhŏng pơtao lê̆ kơ lu sư wei-lăng hnam pơtao ki, pơtao ăn kơ lu sư oei minh pôm hnam đei bơngai wei-lăng; pơtao ăn kơ lu sư tơmam sa mă-lei ưh kơ đei oei hơdai hăm lu sư. Lu sư oei adro adrô̆ klo lu sư oei arih ră; păng chĭt lu sư lăm anih hrĕp truh kơ năr lôch.

Đe pơlôch Amasa

⁴ Pơtao khan kơ Amasa: “Inh ăn kơ ih lăm pêng năr wă krao akŭm lu linh Juđa năm tơ inh âu.”

⁵ Amasa năm krao akŭm lu linh Juđa, mă-lei sư pơhiơ̆, hloh kơ năr pơtao pơkă.

⁶ Na, pơtao Đawit khan kơ Abisai: “Seba, kon Bikri, wă pơrăm lu bơ̆n hơmơt hloh kơ Apsalôm. Na ih athei anhăk lu linh inh, druh 'moi Seba kơnh sư tơgar iŏk pơlei ayơ kơjăp đơ̆ng lu bơ̆n.”

⁷ Abisai pơgơ̆r linh Jôap, khŭl linh sư bơngai Kêrêthit; păng bơngai Phêlêthit păng đĭ-đăng lu bơngai nuih kơtang lĕch dơ̆ng pơlei Jêrusalem, druh 'moi Sêba, kon Bikri.

⁸ Lăp lu sư năm jê̆ tơmo tih tơ pơlei Gibeôn na tơ'bơ̆p Amasa năm tơ lu sư, kơplah noh Jôap hrŭk ao linh; tơ kơiĕng đei kiĕo minh hlak đao gưm tah lăm hơnglop. Lăp sư yak, na đao sư tơgloh đơ̆ng hơnglop.

⁹ Jôap kơkuh kơ Amasa. “Ih hăm liĕm akâu?” Ti gah 'ma sư rôp sŏk kang Amasa wă chŭm sư.

¹⁰ Mă-lei Amasa ưh kơ đei 'bôh ôh đao tơ ti gah 'ngiĕo Jôap, iŏk đao 'bet hloi klak Amasa, klak Amasa lĕch tơ teh, na sư lôch. Jôap ưh kơ kăl 'bet đơ̆ng mă 'bar. Jôap păng 'nhŏng sư Abisai năm druh 'moi Sêba, kon Bikri dơ̆ng.

¹¹ Minh 'nu bơngai linh Jôap dơ̆ng jê̆ akâu Amasa lôch, khan: “Bơngai bu 'mêm kơ Jôap păng gah Đawit, kiơ̆ Jôap bĕ.”

¹² Mă-lei sư 'bôh đĭ-đăng khŭl linh dơ̆ng ngăl, yua kơ akâu Amasa lôch pham lĕch 'bĕnh oei lê̆ tŏk-bŏk trong tih. Sư dui lê̆ akâu noh tơ jih 'nguaih kơ trong tih, đơ̆ng noh sư klă minh blah ao kơpal, yua kơ sư 'bôh bu truh tơ anih noh kư̆m dơ̆ng ngăl.

¹³ Lăp akâu lôch noh dui lê̆ tơ jih kơ trong tih boih đĭ-đăng bơngai năm kiơ̆ Jôap druh 'moi Sêba, kon Bikri.

¹⁴ Seba năm hlôi jơ̆p kơ tơring lu adrĕch adrung Isơrael. Truh tơ pơlei Abel lăm Bet Maaka păng đĭ-đăng lu bơngai lăm adrĕch Bikri kư̆m năm kiơ̆ Seba.

¹⁵ Na, đĭ-đăng lu linh Jôap lu sư truh wang Seba lăm pơlei Abel tơ Bet Maaka, lu sư năm pơm kơđông jê̆ dur 'nguaih păng oei sir wă kơ dur pơlei păk hơlih.

¹⁶ Đei minh 'nu bơngai drŏ-kăn gơh hơgei dơ̆ng kơpal dur pơlei krao dơ'lông tơ ala: “Mơ̆ng bĕ, mơ̆ng bĕ! Apinh krao Jôap năm jê̆ tơ âu, inh wă pơma dơnuh hăm sư.”

¹⁷ Lăp Jôap truh jê̆, bơngai drŏ-kăn ei jet: “Ih hăm trŏ kơ Jôap yŏng linh ưh?” Sư tơl: “Inh âu boih.” Drŏ-kăn ei pơma dơ̆ng: “Mơ̆ng bĕ nơ̆r đam drŏ-kăn ih.” Sư tơl: “Inh mơ̆ng âu.”

¹⁸ Bơngai drŏ-kăn ei khan dơ̆ng: “Kră sơ̆ khan: ‘Athei apinh kon pơlei Abel na gơh keh tơdrong jang.’

¹⁹ Lu nhôn jơ̆ bơngai oei hiôk-hian păng tơnăp lăm char Isơrael. Mă-lei ih chă đon wă pơrăm lê̆ minh pôm pơlei mĕ lăm Isơrael! Thoi yơ ih mă 'maih pơrăm lê̆ mŭk tơmam Kră Yang?”

²⁰ Jôap tơl: “Ưh kơ đei layơ! Ưh kơ đei layơ inh mă đei tơchĕng wă pơlôch dah pơrăm lê̆!

²¹ Ưh kơ trŏ thoi noh ôh! Mă-lei đei minh 'nu bơngai đơ̆ng tơring kông Êphraim, anăn sư Seba, kon drŏ-nglo Bikri. Sư iung blah pơtao Đawit. Lu iĕm athei pơjao sư ăn kơ inh, minh 'nu sư đĕch na inh gô ăn linh kơdŭn weh, ưh pă wang pơlei dơ̆ng.” Bơngai drŏ-kăn tơl: “Lê̆ lu nhôn klơ̆m kơ̆l sư tơ đaih kơ dur ăn kơ ih.”

²² Na, bơngai drŏ-kăn ei năm tơ'bơ̆p đĭ-đăng kon pơlei păng roi tơbăt tơdrong gơh hơgei sư. Lu sư chơ̆ng kơ̆l Seba, kon drŏ-nglo Bikri klơ̆m ăn kơ Jôap. Jôap hlôm keng hloi; na khŭl linh kơdŭn weh đơ̆ng pơlei păng tơklah lĕch, bu bu brŏk tơ hnam lu sư kơdih. Na Jôap wih brŏk dơ̆ng tơ pơlei Jêrusalem tơbăt ăn kơ pơtao.

²³ Jôap pơgơ̆r đĭ-đăng lu linh Isơrael; Bênaia kon drŏ-nglo Jêhôiada pơm yŏng lu bơngai Kêrêthit păng Pêlêthit;

²⁴ Adôram pôk sư lăng gah tơdrong đe jang; Jêhôsaphat, kon drŏ-nglo Ahilut, pơm yŏng chih răk dôm tơdrong truh.

²⁵ Sêwa pơm bơngai chih hla bơar; Sađŏk păng Abiathar pơm 'bok soi.

²⁶ Ira bơngai Jair pơm 'bok soi kơ pơtao Đawit.