II Sam 2 - Sơ̆p Hlabơar Nơ̆r 'Bok Kei-Dei

Đe pôk Đawit pơm pơtao Juđa

¹ Đơ̆ng rŏng kơ noh, Đawit krao apinh Kră Yang: Inh hăm gơh năm tơ minh pôm pơlei ayơ lăm dêh Juđa ưh? Kră Yang tơl sư: Năm bĕ. Đawit apinh dơ̆ng: Inh gô năm tơ yơ? Kră Yang tơl: Ih năm tơ Hêbrôn.

² Đawit tŏk năm tơ noh hơdai hăm 'bar 'nu akăn sư, Ahinôam đơ̆ng pơlei Jêsreel hăm Abigail, dơ̆ng akăn Nabal pơlei Karmel.

³ Đawit kư̆m chông ba lu bơngai kiơ̆ sư năm hăm hnam dơnŏ lu sư, năm mơ̆n na chă oei tơ lu pơlei lăm tơring Hêbrôn.

⁴ Lu bơngai Juđa năm truh tơ Hêbrôn tơ noh na lu sư tuh đak rơmă kơ Đawit pôk sư pơm pơtao bơngai Juđa. Đe năm roi ăn kơ Đawit: “Kon pơlei Jabes Gileat 'bŭ hơmet Sôl.”

⁵ Đawit wơh bơngai năm ngôi hơpong tơ pơlei Jabes lăm tơring Gileat, na khan: “Hơpơi apinh Kră Yang tuh ăn pŭn hiôk kơ lu iĕm, yua kơ lu iĕm pôm đon hăm Sôl yŏng lu iĕm, na iĕm 'bŭ hơmet sư!

⁶ Dang ei apinh Kră Yang iŏk tơdrong sĭt 'lơ̆ng tơpăt Sư ăn kơ lu iĕm, gah inh kư̆m bơnê păng pơm 'lơ̆ng kơ lu iĕm, yua kơ lu iĕm đei pơm boih tơdrong noh,

⁷ Hơpơi kơ lu iĕm đei jơhngơ̆m nuih kơtang khŏm tơ'bôh ăn kơ đe iĕm jing bơngai nuih kơtang, yua kơ Sôl yŏng iĕm đĭ lôch boih; păng lu bơngai Juđa đei tuh đak rơmă pôk inh pơm pơtao lu sư.”

Isbôset pôk pơm pơtao Isơrael

⁸ Kơplah noh Apner, kon drŏ-nglo Nêr yŏng linh Sôl ba Isbôset,a kon tơdăm Sôl, ôn tơ pơlei Mahanaim;

⁹ Apner pôk Isbôset pơm pơtao tơring Gileat, kon pơlei Asuri, tơring Jêsreel, Êphraim, Bênjamin, păng đĭ char Isơrael.

¹⁰ Kơplah Isbôset, kon tơdăm Sôl pơtơm pơm pơtao pơgơ̆r Isơrael, sư đei puăn-jĭt sơnăm, sư pơgơ̆r lăm 'bar sơnăm; lăp lu adrĕch Juđa đĕch kiơ̆ Đawit.

¹¹ Đawit oei tơ pơlei Hêbrôn pơgơ̆r lu adrĕch Juđa đei tơpơh sơnăm tơdrâu khei.

Juđa hăm Isơrael tơblah băl

¹² Lăp Apner, kon tơdăm Nêr, hăm lu đĭch đam Isbôset, kon tơdăm Sôl lĕch đơ̆ng pơlei Mahanaim lĕch năm tơ Gibeôn,

¹³ Jôap kon tơdăm Sêruia, păng lu đĭch đam Đawit kư̆m dai lĕch; 'bar pah tơ'bơ̆p băl 'bơ̆t dơnâu Gibeôn, na minh khŭl oei pah âu, hăm minh khŭl oei pah to kơ đak dơnâu.

¹⁴ Apner khan kơ Jôap: “ ‘Bơ̆n lê̆ lu bơngai tơdăm 'nâu iung pơlong băl lăng 'bơ̆t anăp bơ̆n.’ Jôap khan: ‘Lei bĕ lê̆ lu sư pơlong băl.’ ”

¹⁵ Na lu sư iung năm hloi, 'bar pah dôm ăi, gah Isbôset, kon tơdăm Sôl, bơngai Bênjamin mơjĭt-'bar 'nu bơngai tơdăm, păng gah Đawit mơjĭt-'bar 'nu tơdăm bơngai Juđa.

¹⁶ Rim 'nu rôp kơ̆l bơngai mă ayăt, iŏk đao 'bet tơ rơhiĕo, na đĭ-đăng lu sư kư̆m lôch hơdai. Đe krao anih noh anăn Hêlkat Hasurim,b lăm tơmăn glă Gibeôn.

¹⁷ Lăm minh năr noh tơdrong tơblah băl krưp dêh. Apner hăm lu bơngai Isơrael lu sư thuơ kơ lu linh pơtao Đawit.

¹⁸ Tơ noh kư̆m đei pêng 'nu kon tơdăm Sêruia: Noh Jôap, Abisai păng Asahel, Asahel 'nâu sư kơdâu hơbĕch hơbal nhen thoi Keh.

¹⁹ Sư kơdâu druh 'moi Apner, ưh kơ weh kơ sư, mă khan tơ gah 'ma dah tơ gah 'ngiĕo.

²⁰ Apner hue tơ rŏng păng apinh khan: “Hăm trŏ kơ ih Asahel ưh? Sư tơl trŏ boih inh âu.”

²¹ Apner khan kơ sư: “Weh bĕ gah 'ma dah gah 'ngiĕo năm rôp minh 'nu bơngai tơdăm, na iŏk hloi tơmam tơblah đao đơ̆ng sư,” mă-lei Asahel ưh kơ wă weh đơ̆ng druh Apner.

²² Apner khan dơ̆ng kơ Asahel: Athei weh bĕ đơ̆ng inh, yua kơ kiơ ih wă kơ inh pơlôch ih 'bơ̆t dâu? Lei liơ inh gơh lăng muh măt 'nhŏng ih Jôap:

²³ Mă-lei Asahel ưh kơ wă weh na Apner iŏk hloi tơju wih rŏng 'bet hloi 'bơ̆t klak klĕch tơ kơdŭ rŏng Asahel pơ̆k lôch kơtă anih. Đĭ-đăng bơngai truh tơ anih Asahel lôch, lu sư dơ̆ng đĭ tơ anih noh.

²⁴ Mă-lei Jôap hăm Abisai druh Apner; kơplah măr sư truh tơ groi Amma jê̆ pơlei Giah, 'bơ̆t trong năm tơ tơmăn glă Gibeôn, na 'năr đĭ mơ̆t.

²⁵ Lu linh bơngai Bênjamin akŭm băl kơjăp tăp dăr kơ Apner; na lu sư dơ̆ng tơ kơpal groi.

²⁶ Apner ôr krao Jôap khan: Liơ lê̆ đao hrăn tơ'bet băl hă? E kư̆m băt mơ̆n tuch-luch jing pơmat-tat ngăl đĕch leh kiơ?

²⁷ Jôap tơl: Inh pơkă 'bơ̆t anăp Kră Yang 'Bok Kei-Dei Arih ling-lang, tơdah ih ưh kơ pơma lei linh wă druh lu iĕm dĭng truh tơ dơning mă pơdơh.

²⁸ Jôap athei đe hlôm keng, đĭ-đăng linh athei pơdơh, ưh pă druh lu kon pơlei Isơrael, păng ưh pă tơblah băl dơ̆ng.

²⁹ Apner hăm lu linh kiơ̆ sư yak prăt măng noh năm rok teh dơnă, tŏk hlôi kơ Krong Jôrđăn tơ jơ̆p kơ Bitrôn, dĭng truh tơ pơlei Mahanaim.

³⁰ Jôap ưh pă druh Apner, na akŭm pơgơ̆p đĭ lu linh wă lăng 'bôh lăm lu đĭch đam Đawit, ưh kơ 'bôh mơjĭt-tơsĭn 'nu akŭm hăm Asahel.

³¹ Mă-lei lu linh Đawit đei pơlôch pêng-hrĕng tơdrâu-jĭt 'nu lu bơngai Bênjamin lu linh kiơ̆ jơ̆ng Apner.

³² Lu sư tung akâu Asahel, 'bŭ hơdai hăm 'bă sư tơ pơlei Betlehem. Đơ̆ng noh, Jôap hăm lu linh kiơ̆ jơ̆ng sư năm prăt măng dĭng 'brưch pơgê truh tơ pơlei Hêbrôn.