II Sam 18 - Sơ̆p Hlabơar Nơ̆r 'Bok Kei-Dei

Apsalôm lôch

¹ Đawit jô̆ pơnhen lu linh năm kiơ̆ sư, ăn yŏng pơgơ̆r wei lu linh sư. Minh khŭl minh-rơbâu, minh khŭl minh-hrĕng 'nu.

² Đawit gơih khŭl linh sư năm. Klah asong pêng khŭl, ăn kơ Jôap iŏk pơgơ̆r minh khŭl. Abisai, kon Sêruia, oh Jôap iŏk pơgơ̆r minh khŭl; Itai, bơngai Gat iŏk pơgơ̆r minh khŭl, pơtao pơma pơkă hăm khŭl linh khan: “Inh kư̆m gô năm tơblah hơdai hăm lu iĕm.”

³ Mă-lei khŭl linh khan: “Pơtao ih 'nĕ kơ năm yua kơ mă lu nhôn thuơ kơdâu, bơngai ayăt ưh kơ gan hiơ̆k kơ lu nhôn, păng mă khan minh puăt lu nhôn lôch lu sư kư̆m ưh kơ hơlen ôh; mă-lei minh 'nu ih gĭt dang mơjĭt-rơbâu 'nu lu nhôn. Lei pơtao jah oei tơ lăm pơlei, răp dŏng tơgŭm lu nhôn đĕch 'lơ̆ng hloh.”

⁴ Pơtao drơ̆ng: “Ơ, inh gô pơm kiơ̆ lu iĕm 'bôh khan 'lơ̆ng.” Na, pơtao dơ̆ng 'bơ̆t 'măng jang pơlei, kơplah khŭl linh lĕch năm kiơ̆ kơ khŭl minh-hrĕng khŭl minh-rơbâu,

⁵ pơtao jao pơkă ăn kơ Jôap, Abisai, păng Itai: “Yua kơ inh, iĕm athei pơm kơ kon inh Apsalôm lăp ai.” Đĭ-đăng khŭl linh kơtơ̆ng nơ̆r pơtao pơkă kơ bơngai chĕp kơ̆l, gah Apsalôm.

⁶ Khŭl linh lĕch tơ chŭn, sơng tơblah hăm lu linh Isơrael, na tơblah tơ lăm bri Êphraim.

⁷ Khŭl linh pơtao Đawit blah pơrăm lê̆ khŭl linh Isơrael tơ noh; khŭl linh Isơrael thuơ tih dêh. Lăm năr noh, lôch 'bar-jĭt rơbâu 'nu bơngai.

⁸ Tơdrong tơblah lanh jơ̆p kơ tơring, lăm năr noh đei bơngai lôch hiong lăm bri lơ hloh kơ bơngai lôch kơ đao gưm.

⁹ Lu đĭch đam Đawit tơ'bơ̆p Apsalôm sư hao aseh iĕ. Aseh iĕ mơ̆t lăm ala dơng 'long kôih tơ'bla prêu prao, kơ̆l Apsalôm đom lăm sơlam dơng 'long, păng sư đom hơtol tơ kơpal dơng kơjung, na aseh iĕ đêl sư hao oei nơnăm.

¹⁰ Đei bơngai 'bôh, năm roi tơbăt kơ Jôap: “Inh 'bôh Apsalôm sư đom kơpal dơng 'long kôih.”

¹¹ Jôap tơl: “Kiơ ih 'bôh sư ah? Lei liơ ih ưh kơ pơlôch sư 'bơ̆t noh hloi, lê̆ sư huŏng tơ teh! Tơdah ih pơlôch sư inh gô apah ih mơjĭt hlak jên hu păng minh dăng tơlei tơ̆n kĕ jei.”

¹² Mă-lei bơngai ei khan: “Mă khan ih đei ăn chĕp lăm tơpang ti inh minh-rơbâu hlak jên hu, inh kư̆m ưh kơ pơ̆n pơrăm kon pơtao; yua kơ lu nhôn đei kơtơ̆ng pơtao pơkă pơkăm kơ ih, Abisai păng Itai khan: ‘Iĕm lăng hŏ, 'nĕ ăn bơngai bu pơrăm Apsalôm, kon tơdăm inh.’

¹³ Tơdah inh pơm kơnê̆ na pơlôch Apsalôm, lei ưh kơ gơh ôn hlơp kơ pơtao; mă ih kư̆m gô dơ̆ng tơ ataih, ưh kơ pơ̆n wă dŏng inh ôh!”

¹⁴ Jôap tơl: “Inh ưh kơ wă gô mơ̆ng dâu ôh,” sư chĕp pêng hlak hơlă 'bet hloi plei nuih Apsalôm, 'bơ̆t sư oei arih đom kơpal dơng 'long kôih.

¹⁵ Mơjĭt 'nu bơngai tơdăm chĕp đao hơlă Jôap wang tăp kơ Apsalôm păng teh pơlôch sư.

¹⁶ Đơ̆ng rŏng kơ noh Jôap hlôm tơgiĕp, kon pơlei ưh pă druh linh Isơrael dơ̆ng, yua kơ Jôap athei lu sư lê̆.

¹⁷ Đe iŏk akâu Apsalôm klơ̆m lê̆ tơ lăm sơlŭng jrŭ tơ lăm bri, na dan hơdrom tơmo tơ kơpal sư minh pôi tih. Đĭ-đăng lu linh Isơrael kơdâu ôn brŏk tơ hnam lu sư kơdih.

¹⁸ Apsalôm kơplah oei arih sư đei man pơdơ̆ng kơ sư minh pôm gơ̆ng tơmo tơ lăm thŭng pơtao; yua kơ sư tơchĕng khan: “Inh ưh kơ đei kon drŏ-nglo wă pơtrơp anăn inh.” Gơ̆ng noh krao kiơ̆ kơ anăn sư; truh kơ dang ei đe oei krao, “Gơ̆ng tơmo Apsalôm.”

Pơtao Đawit băt kơ Apsalôm lôch

¹⁹ Ahimatas, kon drŏ-nglo 'bok soi Sađŏk, khan kơ Jôap: “Apinh ih ăn kơ inh kơdâu roi tơbăt ăn kơ pơtao tơdrong 'nâu, Kră Yang đei hơmet dŏng pơklaih ih đơ̆ng bơngai ayăt kơ ih.”

²⁰ Jôap tơl: “Dang ei ih ưh kơ trŏ kơ bơngai năm roi tơdrong 'nâu ôh, gô năr nai ih gơh năm roi, năr 'nâu ih lê̆ kơ năm roi, yua kơ kon pơtao lôch boih.”

²¹ Jôap khan kơ linh bơngai Kus: “Năm roi ăn kơ pơtao bĕ tơdrong kiơ ih 'bôh.” Bơngai Kus drap kơkuh kơ Jôap, klaih kơ noh sư năm.

²² Ahimaas, kon drŏ-nglo 'bok soi Sađŏk pơma lung Jôap dơ̆ng: “Mă đei tơdrong kiơ truh, ăn kơ inh druh kiơ̆ đơ̆ng rŏng đơ̆ng rŏng bơngai Kus.” Jôap khan dơ̆ng: “Ơ kon, yua kơ kiơ kon 'maih năm roi dêh? Tơdrong năm roi tơbăt 'nâu ưh kơ đei apah kon kiơ ôh.”

²³ Ahimaas lung dơ̆ng: “Mă đơ̆ng thoi yơ, inh 'maih năm roi,” Jôap khan kơ sư: “Kơdâu năm bĕ.” Lei na Ahimaas kơdâu trong dăr kơthŭng dơnă Krong Jôrđăn păng kơdâu năm ploi adrol kơ bơngai Kus.

²⁴ Pơtao Đawit oei ngôi 'bơ̆t măng jang pơlei tŏk-bŏk 'măng jang lăm păng 'măng jang 'nguaih. Bơngai linh wei gak tŏk tơ kơpal bơbŭng 'măng jang dur pơlei, tơmang tơ ataih lăng 'bôh minh 'nu bơngai oei kơdâu.

²⁵ Linh gak ôr re roi tơbăt ăn kơ pơtao. Pơtao khan: “Tơdah sư kơdâu minh 'nu, lei trŏ kơ bơngai năm roi tơbăt tơdrong truh.” Lăp sư kơdâu wă jê̆ truh

²⁶ linh gak ei 'bôh minh 'nu bơngai nai dơ̆ng kư̆m kơdâu, na krao ôr hloi bơngai răp gak 'măng khan: “To đei dơ̆ng minh 'nu bơngai oei kơdâu!” Pơtao khan: “Sư kư̆m năm roi tơdrong 'nao mơ̆n.”

²⁷ Linh gak khan: “Inh 'bôh bơngai kơdâu adrol nhen Ahimaas, kon drŏ-nglo 'bok soi Sađŏk.” Pơtao khan: “Noh jơ̆ minh 'nu bơngai 'lơ̆ng, sư boih bơngai ba tơdrong 'lơ̆ng 'nao.”

²⁸ Ahimaas krao hloi pơtao păng khan: “Kơkuh kơ pơtao dôm tơdrong hiôk-hian!” Na sư drap kơkuh 'bơ̆t anăp pơtao păng khan: “Bơnê ư-ang kơ Kră Yang 'Bok Kei-Dei pơtao, yua kơ Sư dŏng pơklaih boih pơtao đơ̆ng lu bơngai blah pơtao yŏng tơ'ngla inh!”

²⁹ Pơtao jet: “Apsalôm kon tơdăm inh, hăm oei 'lơ̆ng akâu ưh?” Ahimaas tơl: “Lăp Jôap đĭch đam ih, wơh đĭch ih inh âu boih năm, na inh đei 'bôh lơ tơpôl ơ-ôs ơ-as, mă-lei inh ưh kơ băt đei tơdrong kiơ truh.”

³⁰ Pơtao khan kơ sư: “Kơdŭn păng dơ̆ng 'bơ̆t doh.” Sư kơdŭn hloi păng gô.

³¹ Bơngai Kus truh hloi păng khan: “'Nâu jơ̆ minh tơdrong 'nao tơbăt ăn kơ pơtao păng yŏng tơ'ngla inh. Dang ei Kră Yang 'Bok Kei-Dei hơmet 'lơ̆ng tơpăt ăn kơ pơtao păng dŏng pơklaih pơtao đơ̆ng lu bơngai iung blah ayăt hăm pơtao.”

³² Pơtao jet bơngai Kus: “Apsalôm kon tơdăm inh, hăm oei 'lơ̆ng akâu ưh?” Bơngai Kus tơl: “Rŏ kơ lu bơngai ayăt pơtao yŏng tơ'ngla inh, păng đĭ-đăng lu bơngai ayơ ayăt wă pơrăm pơtao; rŏ kơ kư̆m thoi tơdăm noh!”

³³ Pơtao Đawit 'mêm kơ kon tơdăm sư dêh, na tŏk hloi tơ kơpal 'măng jang pơlei păng nhơ̆m hmoi sư năm rah pơma rah khan: “Ơ, Apsalôm, kon dăm inh! Kon dăm inh! Apsalôm kon drŏ-nglo inh! Rŏ kơ inh lôch tang kon! Ơ, Apsalôm kon dăm inh! Kon dăm inh!”