II Sam 14 - Sơ̆p Hlabơar Nơ̆r 'Bok Kei-Dei

Jôap hơmet ăn kơ Apsalôm brŏk

¹ Jôap kon drŏ-nglo Sêruia, băt kơ jơhngơ̆m pơtao 'blŏk kơ Apsalôm,

² Jôap wơh bơngai năm tơ pơlei Têkôa chă minh 'nu bơngai drŏ-kăn gơh hơgei, sư pơkă kơ drŏ-kăn ei khan: “Ih athei pơm thoi bơngai sơ'ngon kơ đei bơngai lôch, hrŭk ao sơ'ngon, 'nĕ kơ pik pơgang 'bâu phu, ih pơm akâu thoi bơngai drŏ-kăn sơ'ngon kơ đei bơngai lôch đĭ đunh năr boih.

³ Ih apinh wă tơ'bơ̆p pơtao roi ăn kơ pơtao thoi âu.” Jôap bơtho drŏ-kăn ei wă kơ sư pơma.

⁴ Bơngai drŏ-kăn pơlei Têkôa năm pơma roi kơ pơtao, sư drap tơ teh kơkuh, na khan: “Kơkuh kơ ih pơtao, apinh ih dŏng inh!”

⁵ Pơtao jet, “Ih đei tơdrong kiơ?” Bơngai drŏ-kăn ei tơl: “Ôi! Inh adro po, klo lôch boih.

⁶ Inh đĭch đam ih. Inh đei 'bar 'nu kon drŏ-nglo; bre sư tơteh tơtôn băl tơ chŭn tơ mir, ưh kơ đei bơngai bu plah, na bơngai âu teh bơngai to lôch.

⁷ Na dang ei đĭ-đăng lu 'nhŏng oh lu sư iung ayăt hăm inh đam drŏ-kăn ih, lu sư khan: ‘Pơjao ăn bơngai pơlôch oh sư lê̆ kơ nhôn pơlôch sư, wă iung kơting pham kơ oh sư, mă khan sư bơngai pơtrơp ioi, lu bơ̆n kư̆m gô pơlôch sư!’ Na sư gô pĭt tŭk ngar ŭnh ngŭr oei oei, wă kơ klo inh ưh pă đei anăn păng bơngai pơtrơp ioi, adrĕch adrung kơpal teh.”

⁸ Pơtao khan kơ bơngai drŏ-kăn: “Huay, ih wih tơ hnam bĕ; inh gô pơm tơdrong âu ăn kơ ih.”

⁹ Bơngai drŏ-kăn Têkôa tơl dơ̆ng: “Kơkuh kơ pơtao yŏng tơ'ngla inh, lê̆ tơdrong yoch tuh kơpal inh păng adrĕch hnam 'bă inh, gah pơtao păng anih pơtao ưh kơ đei 'bơm ôh.”

¹⁰ Pơtao khan dơ̆ng: “Tơdah đei bu pơm anat kơ ih dơ̆ng, athei ba sư tơ inh, lu sư gô ưh kơ pơ̆n hơtŭt 'bơm ih dơ̆ng.”

¹¹ Drŏ-kăn ei khan dơ̆ng: “Apinh pơtao krao apinh Kră Yang 'Bok Kei-Dei ih găn wă kơ lu bơngai pơm 'mong huay kơ iung kơting ưh pă pơrăm păng pơlôch kon drŏ-nglo inh.” Pơtao tơl: “Inh pao anăn Kră Yang arih ling-lang na pơkă khan, minh ioi sŏk đơ̆ng kơ̆l kon drŏ-nglo ih gô ưh kơ đei hơlŭng tơ teh!”

¹² Drŏ-kăn ei khan dơ̆ng: “Apinh pơtao ăn kơ inh đĭch đam ih roi minh nơ̆r kơ pơtao dơ̆ng pơtao khan ‘Ih roi bĕ’ ”

¹³ Bơngai drŏ-kăn noh khan: Lei liơ pơtao tơchĕng wă pơrăm kon pơlei Kră Yang 'Bok Kei-Dei thoi noh? Wă khan pơtao ưh kơ ăn kon drŏ-nglo pơtao mă jăk tơ nai boih wih brŏk, pơtao pơma thoi noh nhen thoi sek jô̆ kơdih akâu đei tơdrong yoch.

¹⁴ Đĭ-đăng lu bơ̆n bu bu kư̆m lôch, thoi tuh đak tơ teh, ưh kơ gơh chup iŏk dơ̆ng. Mă-lei Kră Yang 'Bok Kei-Dei ưh kơ đei iŏk lê̆ tơdrong arih bơngai mă hơmet wă ăn bơngai đơ̆ng jăk wih brŏk.

¹⁵ “Dang ei, inh năm roi tơdrong 'nâu kơ pơtao yŏng tơ'ngla inh, noh yua kơ kon pơlei pơma tơhli. Lei inh tơchĕng khan: ‘Inh gô năm roi kơ pơtao, rŏ lăng pơtao gô ăn kơ đam drŏ-kăn pơtao tơdrong sư apinh.

¹⁶ Pơtao gô mơ̆ng nơ̆r apinh păng dŏng pơklaih đam drŏ-kăn pơtao đơ̆ng ti bơngai 'maih pơlôch inh, păng kon drŏ-nglo inh, hiong dơ̆ng kon pơlei Kră Yang 'Bok Kei-Dei.’

¹⁷ Đam drŏ-kăn pơtao tơchĕng khan dơ̆ng: ‘Apinh nơ̆r đơ̆ng pơtao yŏng tơ'ngla inh pơma pơkă ăn hiôk-hian, yua kơ pơtao yŏng tơ'ngla inh thoi lĕ minh 'nu linh jang 'lơ̆ng Kră Yang 'Bok Kei-Dei, băt kơ lăng tơdrong 'lơ̆ng păng tơdrong kơnê̆. Apinh Kră Yang 'Bok Kei-Dei ih oei hăm ih!’ ”

¹⁸ Pơtao khan: “'Nĕ ôn kơ inh tơdrong kiơ inh wă apinh ih.” Bơngai drŏ-kăn khan: “Apinh pơtao yŏng tơ'ngla inh apinh bĕ.”

¹⁹ Pơtao apinh: “Hăm trŏ kư̆m đei ti Jôap mơ̆t hơdai lăm dôm tơdrong 'nâu?” Bơngai drŏ-kăn tơl: Pơtao yŏng tơ'ngla inh, inh yua tơdrong arih pơtao na pơkă, trŏ thoi nơ̆r pơtao đei khan. Jôap đĭch đam ih boih, pơjao ăn kơ inh păng bơtho tơ'bôh dôm lu nơ̆r wă pơma apinh păng pơm.

²⁰ Jôap, đĭch đam pơtao, pơm thoi noh, wă hơlơ̆ kơ tơdrong truh 'nâu. Mă-lei yŏng tơ'ngla gơh hơgei nhen thoi linh jang 'lơ̆ng Kră Yang 'Bok Kei-Dei băt rơđah đĭ dôm tơdrong kơpal teh âu.

²¹ Pơtao khan, kơ Jôap: “Inh ăn boih tơdrong ih apinh 'nâu, năm iŏk Apsalôm brŏk tơ âu bĕ.”

²² Jôap drap tơ teh kơkuh, păng khan: Apinh Kră Yang 'Bok Kei-Dei tuh ăn tơdrong pŭn hiôk kơ pơtao, Pơtao yŏng tơ'ngla inh. Dang ei đĭch đam ih băt boih pơtao lăp đon boih na pơtao ăn tơdrong kơ đĭch đam ih krao apinh.

²³ Jôap iung hloi, năm truh tơ Gêsur, anhăk Apsalôm wih tơ pơlei Jêrusalem.

²⁴ Pơtao khan: “Ăn sư brŏk tơ hnam sư kơdih ưh kơ đei năm tơ'bơ̆p pơtao.” Na Apsalôm brŏk tơ hnam sư kơdih ưh kơ đei tơ'bơ̆p pơtao ôh.

²⁵ Kơplah noh lăm đĭ-đăng bơngai Isơrael ưh kơ đei minh 'nu bơngai ayơ đei pơư kơ akâu jăn sư 'lơ̆ng hloh thoi lĕ Apsalôm 'lơ̆ng; iŏk đơ̆ng tơpang jơ̆ng truh tơ kơ̆l, ưh kơ đei lao 'bơ̆t yơ.

²⁶ Rim sơnăm wă tôch sư juăt kơ yuă sŏk, yua kơ sŏk pơm kơ sư trăp kơ̆l, na sŏk sư yuă chĕp kŏng trăp đei hloh kơ 'bar kĭ kiơ̆ kơ 'long kŏng hnam pơtao.

²⁷ Apsalôm pơjing pêng 'nu kon drŏ-nglo păng minh 'nu kon drŏ-kăn, anăn sư Tamar sư bơngai adruh 'lơ̆ng guăng dêh.

²⁸ Apsalôm oei tơ lăm pơlei Jêrusalem lăm 'bar sơnăm, ưh kơ đei tơ'bơ̆p muh măt 'bă sư.

²⁹ Apsalôm wơh bơngai năm wơ̆n Jôap, wă kơ năm pơma dơnuh kơ pơtao, mă-lei Jôap ưh kơ năm. Apsalôm wơh dơ̆ng, bơngai năm wơ̆t mă 'bar, mă-lei Jôap oei sơngah, ưh kơ năm.

³⁰ Apsalôm khan kơ lu đĭch đam sư: “Lăng bĕ to chŭn Jôap, mă đei pơtăm 'ba tơ'bâu, jê̆ chŭn inh; năm soh lê̆ bĕ chŭn sư noh.” Lu đĭch đam Apsalôm iŏk ŭnh soh hloi chŭn Jôap noh.

³¹ Jôap iung năm hloi tơ hnam Apsalôm na jet: “Yua kơ kiơ lu đĭch đam ih soh chŭn inh?”

³² Apsalôm tơl sư: “Inh wơh bơngai năm krao ih, năm tơ âu. Inh wă kơ ih năm pơma dơnuh hăm pơtao tơgŭm inh. Inh đơ̆ng dêh Gêsur wih tơ âu wă pơm kiơ? Kơtrơ̆m lê̆ inh oei tơ noh đĕch 'lơ̆ng hloh. Na dang ei, inh 'maih năm lĕch tơ'bơ̆p pơtao; tơdah inh đei tơdrong yoch kơnê̆ kiơ, apinh pơtao jah pơlôch inh bĕ.”

³³ Lei na Jôap năm tơ pơtao roi tơbăt lu nơ̆r noh. Pơtao krao hloi Apsalôm năm; sư mơ̆t lăm anih pơtao, drap tơ teh kơkuh 'bơ̆t anăp pơtao, na pơtao chŭm Apsalôm.