II Sam 13 - Sơ̆p Hlabơar Nơ̆r 'Bok Kei-Dei

Amnôn pơ'brơh kơ Tamar

¹ Apsalôm, kon drŏ-nglo Đawit đei minh 'nu oh drŏ-kăn pôm mĕ 'bă, anăn sư Tamar, 'lơ̆ng guăng dêh. Đơ̆ng rŏng kơ noh đunh 'biơ̆, Amnôn kư̆m kon drŏ-nglo Đawit mĕ pha hưch kơ sư.

² Amnôn hưch lăp wă dêh kơ Tamar oh drŏ-kăn sư kơdih pôm 'bă, yua kơ hrăn tơchĕng ưh kơsŭk mah truh tơ đei jĭ bơlŏ, yua kơ oh adruh sư Tamar. Tamar sư oei hơdruh hle, na anat kơ Amnôn gơh pơm minh tơdrong kiơ hăm sư.

³ Na, Amnôn đei minh 'nu buăl juăt anăn sư Jônadap, kon drŏ-nglo Simêa, 'nhŏng Đawit; bơngai 'nâu chă hơlĕnh hơgei dêh.

⁴ Jônadap jet Amnôn: “Ơ kon pơtao, lơliơ rai đunh rai rơmơ̆n rơmok thoi noh? Hăm gơh roi ăn kơ inh?” Amnôn tơl: “Inh hưch kơ Tamar, oh drŏ-kăn Apsalôm, Apsalôm oh drŏ-nglo inh.”

⁵ Jônadap chă đon khan: “Ih athei 'bĭch kơpal giơng pơm bơlŏ; na mưh pơtao 'bă năm lăng, ih athei apinh: ‘Apinh 'bă ăn kơ Tama, oh drŏ-kăn inh năm wei-lăng inh; sư gô hơmet tơmam sa 'bơ̆t anăp inh; inh gô 'bôh sư, păng sư gô pôk hiŏng tơmam sa hăm ti sư kơdih ăn kơ inh.’ ”

⁶ Na, Amnôn 'bĭch pơm bơlŏ, lăp 'bă sư pơtao năm lăng, na Amnôn pơma hăm pơtao: Inh apinh ih ăn kơ Tamar năm tơ âu, pơm 'bar tŏ 'bĕng iĕ 'bơ̆t anăp inh; păng gô pôk hiŏng 'bĕng noh hăm ti sư kơdih ăn kơ inh sa.

⁷ Đawit wơh bơngai năm krao Tamar đơ̆ng hnam sư, khan kơ sư: “Kon athei năm tơ hnam Amnôn, 'nhŏng kon, pai hơmet tơmam sa kơ sư.”

⁸ Tamar năm truh tơ hnam 'nhŏng sư Amnôn, 'bôh oei 'bĭch kơpal giơng, Tamar iŏk tơpŭng 'ba mi, lŭk chơpĕt man pơm 'bĕng iĕ 'bơ̆t anăp 'nhŏng sư păng hơtŭk ăn.

⁹ Tamar pôk tơjur gŏ păng kep iŏk 'bĕng năm ăn kơ 'nhŏng sư sa. Mă-lei Amnôn ưh kơ 'maih sa. Na sư khan athei đĭ-đăng bơngai lĕch. Lăp đe lĕch boih,

¹⁰ Amnôn khan kơ Tamar: “Oh pôk tơmam sa na mơ̆t tơ lăm anih ăn kơ 'nhŏng sa.” Tamar iŏk hloi lu 'bĕng iĕ đơ̆ng sư pơm, pôk ăn kơ Amnôn; 'nhŏng sư, tơ lăm anih.

¹¹ Wă Tamar pôk hiŏng 'bĕng năm jê̆ giơng, Amnôn rôp dui na khan: “Oh, năm tơ âu 'bĭch hăm 'nhŏng.”

¹² Mă-lei Tamar pơjăng: “Ưh kơ gơh 'nhŏng; 'nĕ kơ pơm pơ'brơh pơgŏ inh, yua kơ lăm char Isơrael ưh kơ đei bu pơm thoi noh. 'Nĕ kơ pơm tơdrong kơnê̆ 'nâu!

¹³ Inh gô pŭ iŏk tơdrong mơlâu âu mă năm tơ yơ? Na đe gô jô̆ 'nhŏng thoi minh 'nu bơngai kơnê̆ lăm char Isơrael. 'Nhŏng jah apinh 'bă đĕch 'lơ̆ng hloh; 'bă ưh kơ đei sơngah ôh ăn kơ 'nhŏng iŏk oh.”

¹⁴ Mă-lei Amnôn ưh kơ mơ̆ng; yua kơ sư pran hloh, na tơrôp pơgŏ hloi.

¹⁵ Na Amnôn hơlơ̆ jing blĕk areh kơ Tamar, sư areh dêh hloh kơ jơhngơ̆m sư hưch adrol ki, Amnôn pơpuh tơlĕch sư: “Iung weh đơ̆ng âu!”

¹⁶ Tamar apinh lung: “'Nĕ kơ pơpuh inh, ơ 'nhŏng, tơdrong kơnê̆ ih pơpuh inh tih hloh kơ tơdrong kơnê̆ ih pơm kơ inh boih!” Mă-lei sư ưh kơ wă mơ̆ng hloi.

¹⁷ Amnôn krao minh 'nu đam sư khan: “Pơpuh bơngai drŏ-kăn 'nâu lĕch weh đơ̆ng muh măt inh! Đơ̆ng noh tang chơkăl lê̆ 'măng mưh sư lĕch.”

¹⁸ Na đĭch đam Amnôn puh tơlĕch păng chơkăl lê̆ 'măng. Kơplah noh Tamar oei hrŭk minh blah ao ti tai thoi lu bia juăt kơ hrŭk ao thoi noh ngăl kơplah oei hơdruh hơlai.

¹⁹ Tamar klă tơnuh kơpal kơ̆l sư, na hek ao ti tai mă sư oei hrŭk noh. Păng iŏk ti klơ̆p muh măt, nơnăm rah nhơ̆m ôr rah.

²⁰ Apsalôm; 'nhŏng sư jet: “Hăm trŏ kơ Amnôn, 'nhŏng kơ oh; tơrôp 'bĭch hăm oh ưh? Lei na, ơ oh hreh bĕ, sư 'nhŏng kơ oh 'nĕ pă hiơ̆k kơ tơdrong noh dơ̆ng!” Thoi noh. Tamar oei hơdrô̆ sơ'ngon tơ hnam Apsalôm 'nhŏng sư.

²¹ Pơtao Đawit hil blĕk dêh kơtơ̆ng dôm tơdrong noh.

²² Apsalôm blĕk dêh kơ Amnôn ưh pă đei gơh pơma nơ̆r ayơ 'lơ̆ng dah kơnê̆ hăm Amnôn, yua kơ Amnôn pơ'brơh kơ Tamar, oh drŏ-kăn sư.

Apsalôm pơlôch Amnôn

²³ 'Bar sơnăm đơ̆ng rŏng kơplah năr Apsalôm yuă sŏk triu sư tơ pơlei Baal Harsôl jê̆ hơdral pơlei tih Êphraim, Apsalôm sư krao wơ̆n đĭ-đăng lu kon pơtao.

²⁴ Apsalôm năm tơ pơtao na khan: Đĭch đam ih đei boih lu bơngai năm yuă sŏk triu na apinh ih hăm linh wei ih năm ngôi hơdai tơ hnam inh.

²⁵ Mă-lei pơtao tơl khan: Ưh kơ gơh kon; đĭ-đăng lu bơ̆n ưh kơ gơh wang năm tơ hnam kon, yua kơnh pơm pơhiơ̆k kon. Apsalôm apinh lung, mă-lei Đawit sơngah ưh kơ năm tơ noh; pơtao Đawit lăp sơkat ăn tơdrong pŭn hiôk kơ sư.

²⁶ Apsalôm pơma dơ̆ng: “Tơdah pơtao ưh kơ năm, apinh ăn Amnôn, 'nhŏng inh, năm ngôi tơ nhôn.” Pơtao jet: “Kơlih kơ kiơ sư athei năm?”

²⁷ Apsalôm apinh lung dĭng mă truh pơtao ăn Amnôn păng đĭ-đăng kon pơtao năm ngôi et sa hăm sư.

²⁸ Apsalôm pơkă kơ lu đĭch đam sư: “Athei kơchăng lăng kơplah Amnôn hiôk chơt wă suai kơ tơdrô, inh athei lu iĕm: Teh Amnôn, lu iĕm athei pơlôch sư hloi, ưh kơ hli kơ kiơ, noh đơ̆ng inh athei lu iĕm. Athei đei jơhngơ̆m đon mă nuih hŏ.”

²⁹ Lu đĭch đam Apsalôm pơlôch Amnôn pơm kiơ̆ thoi yŏng tơ'ngla lu sư pơkă. Kơplah noh, lu kon pơtao nai iung hao aseh kơdâu chă ôn đĭ.

³⁰ Kơplah lu kon pơtao oei tơ rok trong, đei roi ăn truh tơ pơtao Đawit kơtơ̆ng khan Apsalôm pơlôch đĭ lu kon pơtao boih, ưh kơ đei minh 'nu bu oei arih.

³¹ Pơtao iung hek ao sư păng 'bĭch tơ teh; đĭ-đăng đĭch đam sư dơ̆ng tăp dăr kư̆m hek ao lu sư.

³² Na Jônadap, kon drŏ-nglo Simêa, mon pơtao Đawit, pơma khan: “Apinh yŏng inh ih 'nĕ ngeh khan pơlôch đĭ lu kon pơtao boih; lăp minh 'nu Amnôn đĕch lôch; noh tơdrong Apsalôm pơrơ̆ng wă pơm đơ̆ng năr Amnôn pơ'brơh kơ Tamar, oh drŏ-kăn sư.

³³ Thoi noh na apinh pơtao yŏng tơ'ngla inh 'nĕ kơ tơtăm khan pơlôch đĭ-đăng kon pơtao boih; lăp minh 'nu Amnôn đĕch lôch.”

³⁴ Kơplah noh Apsalôm kơdâu weh boih. Bơngai tơdăm oei gak ngơk tơmang 'bôh đei minh khŭl bơngai tơpôl lơ dêh năm jur, rok kiơ̆ trong tơter kông tơkan tơ Hôrônaim. Bơngai tơdăm gak năm roi ăn kơ pơtao băt: “Ơ pơtao inh 'bôh đei tơpôl bơngai lơ dêh năm jur tơklă tơ Hôrônaim wă năm tơ âu.”

³⁵ Jônadap tơbăt kơ pơtao khan: “Noh lu kon pơtao wih brŏk thoi nơ̆r đĭch đam pơtao khan.”

³⁶ 'Nao đang kơ Jônadap pơma, na 'bôh lu kon pơtao truh; lu sư nhơ̆m ôr. Pơtao păng đĭ-đăng đĭch đam nhơ̆m hmoi ôr ơh sơ'ngon dêh tơpă.

³⁷ Na Apsalôm kơdâu weh, păng năm ôn tơ hnam Thanmai kon drŏ-nglo Amihut, pơtao dêh Gêsur Đawit sơ'ngon kơ kon drŏ-nglo sư ling-lang rim năr.

³⁸ Apsalôm kơdâu tơ dêh Gêsur oei tơ noh pêng sơnăm.

³⁹ Pơtao hơi 'biơ̆ sơ'ngon kơ Amnôn lôch boih, na pơtao 'blŏk 'maih 'moi kiơ̆ Apsalôm.