II Pot 9 - Sơ̆p Hlabơar Nơ̆r 'Bok Kei-Dei

Jêhu pơm pơtao đe Isơrael

¹ Êlisê bơngai khan lê̆ adrol, sư krao minh 'nu lăm lu khŭl bơngai khan lê̆ adrol na khan: “Iŏk tơlei tơ̆n, tơ̆n kơiĕng ih bĕ, chĕp get đak 'bâu phu 'nâu, năm tơ Pơlei Ramôt Galaat.

² Mưh ih truh tơ noh, ih athei chă Jêhu kon drŏ-nglo Jêhôsaphat, sâu Nimsi; na ih gô mơ̆t, athei sư iung weh đơ̆ng 'nhŏng oh sư, păng ih chông sư mơ̆t lăm anih hrĕp hơdrô̆,

³ Ih iŏk get đak 'bâu phu, tuh kơpal kơ̆l sư păng khan: “Kră Yang khan thoi âu: Inh tuh đak 'bâu phu ăn kơ ih pơm pơtao Isơrael.” Đơ̆ng noh ih athei pơih 'măng lĕch weh hloi, 'nĕ kơ hiơ̆ hŏ.

⁴ Na bơngai tơdăm noh, sư bơngai khan lê̆ adrol oei mơlôh năm truh tơ Pơlei Ramôt Gileat.

⁵ Kơplah sư truh, lu 'bok tih khŭl linh oei hơ-oei akŭm pơđâu sư khan kơ Jêhu: “Ơ 'bok kuan tih, inh đei tơdrong wă pơma dơnuh hăm ih! Jêhu tơl: “Ih wă pơma dơnuh hăm bu lăm lu nhôn?” Bơngai tơdăm ei tơl: “Ơ kuan tih, ĭnh wă pơma dơnuh hăm ih.”

⁶ Thoi noh, Jêhu gruih iung mơ̆t lăm hnam, na bơngai tơdăm ei tuh đak 'bâu phu kơpal kơ̆l sư păng khan: “Kră Yang 'Bok Kei-Dei Isơrael khan thoi âu: Inh rơih iŏk ih ăn kơ đe tuh đak 'bâu phu ăn kơ ih pơm pơtao đe Isơrael wei-lăng kon pơlei Kră Yang.

⁷ Ih gô blah pơlôch adrĕch Ahap yŏng tơ'ngla ih păng Inh gô pơm 'mong pơrăm yă Jêsebel đêl pham bơngai mă sư pơlôch, lu bơngai khan lê̆ adrol, đĭch đam ĭnh, hăm pham đĭ-đăng đĭch đam Kră Yang.

⁸ Đĭ-đăng adrĕch Ahap, Inh gô pơrăm pơlôch lê̆ đĭ lu bơngai drŏ-nglo adrĕch Ahap, mă khan bơngai đĭch, dah bơngai rơngei, pơlôch đĭ đơ̆ng lăm char Isơrael;

⁹ păng ĭnh pơm kơ adrĕch Ahap lei-lăi thoi adrĕch Jêrôbôam kon drŏ-nglo Nêba păng lei-lăi thoi adrĕch Baasa kon drŏ-nglo Ahija.

¹⁰ Kŏ gô sa akâu yă Jêsebel lăm char glă Jêsreel, ưh kơ đei bu 'bŭ sư.” Na bơngai tơdăm ei pơih 'măng păng kơdâu weh hloi.

¹¹ Na Jêhu lĕch hĭ đơ̆ng ei năm truh tơ lu đĭch đam yŏng tơ'ngla sư. Lu đe ei jet khan: “Tôm tơdrong hiôk 'lơ̆ng mơ̆n? Bơngai wơnh 'noh hei sư chă kiơ kơ ih?” Sư tơl lu đe ei khan: “Lu iĕm băt kơ sư păng băt nơ̆r sư pơma.”

¹² Mă-lei lu sư khan: “Hơlĕnh ưh kơ trŏ thoi noh ôh, roi bĕ kơ nhôn dang ei?” Thoi noh sư roi kơ đe noh: “Bơngai noh khan kơ inh thoi âu: Kră Yang khan Inh rơih iŏk ih ăn kơ đe tuh đak rơmă 'bâu phu kơ ih wă kơ ih pơm pơtao Isơrael.”

¹³ Lu sư wang hăt hot iŏk hơbĕn ao kơdih lơ̆k tơ ala jơ̆ng Jêhu lơ̆k rok lu kơnao kung. Đơ̆ng noh lu sư hlôm tơgiĕp păng ôr re khan: “Jêhu pơm pơtao!”

Jêhu pơlôch pơtao đe Isơrael păng pơtao đe Juđa

¹⁴ Thoi noh Jêhu kon drŏ-nglo Jêhôsaphat, sâu Nimsi, sư chă đon wă blah pơtao Jôram. Kơplah noh Jôram păng đĭ-đăng linh Isơrael oei wă găn blah pơtao Hasael pơtao đe Aram tơ Pơlei Ramôt Galaat.

¹⁵ Mă-lei, Jôram hlôi wih bơih tơ Jêsreel wă hơmet jĭ rơka sư đêl linh đe Aram prah 'bơm sư 'bơ̆t sư tơblah Hasael pơtao đe Aram, na Jêhu khan: “Dah lu iĕm lăp đon, 'nĕ kơ ăn minh 'nu bu lĕch klĕnh đơ̆ng pơlei âu năm roi ăn kơ Pơlei Jesreel.”

¹⁶ Thoi noh, Jêhu hao gre aseh năm tơ Pơlei Jêsreel Jôram oei păn tơ noh. Ahasia pơtao đe Juđa kư̆m jur tơ noh năm lăng Jôram.

¹⁷ Lĭnh gak dơ̆ng kơpal hnam thôt lăm pơlei Jêsreel 'bôh khŭl linh Jêhu truh na sư ôr re khan: “Inh 'bôh khŭl linh năm tơ âu.” Jôram khan athei: “Năm wơh minh 'nu linh hao aseh năm sơng lu sư tơ noh păng jet khan: Hăm hiôk-hian ưh?”

¹⁸ Thoi noh, đe wơh minh 'nu linh hao aseh năm sơng Jêhu păng roi ăn kơ sư khan: “Pơtao jet: Hăm oei hiôk-hian ưh?” Jêhu tơl: “Tơdrong hiôk-hian 'bơm kiơ kơ ih? Weh tơ rŏng inh bĕ.” Lĭnh gak ei roi khan dơ̆ng: “Bơngai mă đe wơh noh sư năm truh tơ khŭl linh ei bơih, mă-lei ưh kơ 'bôh brŏk.”

¹⁹ Na pơtao wơh dơ̆ng minh 'nu linh mă 'bar kư̆m hao aseh năm truh tơ lu đe ei păng khan: “Pơtao jet: Hăm hiôk-hian ưh?” Jêhu tơl: “Tơdrong hiôk-hian 'bơm kiơ kơ ih? Weh tơ rŏng inh bĕ!”

²⁰ Lĭnh gak roi dơ̆ng khan: “Bơngai mă đe wơh noh sư năm truh tơ ei bơih, mă ưh kơ 'bôh brŏk. To, bơngai hao gre aseh wă năm tơ âu, noh băt Jêhu, kon drŏ-nglo Nimsi bơih, sư hao hrơ̆t aseh nhen thoi blĕk dêh.”

²¹ Na Jôram khan: “Iŏk kơ ĭnh gre aseh bĕ;” Na đe iŏk gre aseh ăn kơ sư hao năm; Jôram pơtao đe Isơrael păng Ahasia pơtao đe Juđa, bre sư hao gre aseh sư kơdih kơdih năm sơng Jêhu na lu sư tơ'bơ̆p Jêhu 'bơ̆t teh mir Nabôt bơngai Pơlei Jêsreel.

²² Lăp 'bôh Jêhu na Jôram jet: “Ơ Jêhu, hăm trŏ kơ ih năm wă kơ hiôk-hian?” Mă-lei, Jêhu tơl khan: “Na! Mưh khan mĕ ih yă Jêsebel oei kơkuh pơm yang,a pơm pơjâu, na wă hiôk hơiă liơ gơh?”

²³ Jôram gơwĕch gre aseh sư kơdâu weh ôn păng roi kơ Ahasia băt: “Đe chă đon wă blah bơ̆n.”

²⁴ Jêhu iŏk hră sư gŭt prah Jôram 'brơ̆m 'bơm 'bơ̆t sơlam 'bar pah hơngiĕng, klĕch jrok tơ plei nuih sư, na sư pơ̆k lôch hloi lăm gre aseh sư.

²⁵ Na Jêhu khan kơ Bithan kuan wei sư: “Iŏk atâu sư 'nâu klơ̆m lê̆ lăm mir Nabôt Pơlei Jêsreel; ih hăm 'blŏk, minh 'măng ki ba đih hao gre aseh kiơ̆ 'moi Ahap, 'bă sư, na Kră Yang khan lê̆ gah sư:

²⁶ “Kră Yang khan: Tơpă năr brei Inh 'bôh bơih pham Nabôt păng pham lu kon drŏ-nglo sư: Inh gô pơm plơ̆ kơ ih tơ mir 'nâu mơ̆n. Na hor bĕ atâu sư 'nâu klơ̆m hơtat lê̆ lăm mir chŭn noh kiơ̆ thoi nơ̆r Kră Yang hlôi khan bơih.”

Jêhu pơlôch Ahasia

²⁷ Lăp Ahasia pơtao đe Juđa 'bôh tơdrong noh na kơdâu ôn tơklă Pơlei Bet Hagan. Mă-lei, Jêhu druh 'moi sư păng khan: “Kŭm khŏm prah pơlôch sư mơ̆n.” Na lu sư răp găn prah pơtao Ahasia 'bơ̆t trong kuĕl tơklă pơlei Gur jê̆ Iblêam. Đơ̆ng noh Ahasia kơdâu tơ Pơlei Mêgiđô păng sư lôch hloi tơ noh.

²⁸ Lu đĭch đam sư tah atâu sư lăm gre aseh na chơ ba brŏk tơ pơlei Jêrusalem păng 'bŭ lăm bơsat hơdai hăm lu yă 'bok sư tơ Pơlei Đawit sơ̆.

²⁹ (Ahasia tŏk pơm pơtao đe Juđa 'bơ̆t sơnăm mă mơjĭt-mônh, chăl pơtao Jôram, kon drŏ-nglo Ahap pơgơ̆r đe Isơrael.)

Jêsebel lôch

³⁰ Kơplah Jêhu năm truh tơ pơlei Jêsreel. Jêsebel kơtơ̆ng băt na iŏk chŭr pik muh măt, hơmet sŏk, pơhrôp hơbĕn 'nao mă 'lơ̆ng, đơ̆ng noh dơ̆ng tơmang đơ̆ng 'măng-'mŏk sư.

³¹ Lăp Jêhu năm mơ̆t trong 'măng dur pơlei na yă ei khan: “Ơ Simri, bơngai pơlôch yŏng tơ'ngla inh oei liĕm akâu hiôk-hian mơ̆n?”

³² Jêhu ngơk lăng tơ 'măng-'mŏk na jet: “Tơ kơpal 'noh, bu gah ĭnh? Bu? Na 'bar pêng 'nu kuan krĕo nger lăng tơ sư.

³³ Sư athei: “Iĕm tơlơ̆ hơtat sư tơ teh jah.” Lu sư tơlơ̆ hơtat hloi yă ei tơ teh, na pham sư tơprah tơ tơnăr hnam, tơ akâu aseh, đơ̆ng noh aseh yak pơjuă akâu sư.

³⁴ Jêhu mơ̆t lăm hnam, sŏng sa đang bơih na sư khan: “Iĕm năm lăng drŏ-kăn kơlĕl răm 'noh hei năm! Păng iĕm 'bŭ hơmet sư, yua kơ sư kon pơtao.”

³⁵ Thoi noh lu đĭch đam wă năm 'bŭ sư; mă-lei lu sư 'bôh oei pă pôm kơ̆l, na 'bar pah jơ̆ng păng 'bar pah tơpang ti đĕch bơih 'bơ̆t dei.

³⁶ Lu sư wơ̆t roi ăn kơ Jêhu yŏng tơ'ngla sư. Na Jêhu khan: “'Noh bơih nơ̆r Kră Yang yua bơih 'bơ̆r Êli đĭch đam Sư bơngai Pơlei Tisbe, lăm mir chŭn Pơlei Jêsreel kŏ gô sa atâu Jêsebel.”

³⁷ Păng atâu sư noh gô hĕch hoch nhen mơ̆r 'bơ̆t teh, tơ lăm mir chŭn Pơlei Jêsreel, dĭng đe mă pă gơh khan: “'Nâu bơih Jêsebel.”