II Pot 8 - Sơ̆p Hlabơar Nơ̆r 'Bok Kei-Dei

Đe pơdrâu teh jang sa kơ drŏ-kăn Pơlei Sunem

¹ Êlisê khan kơ bơngai drŏ-kăn mĕ bơngai 'lơ̆p drŏ-nglo đêl sư tơiung arih ki 'noh: “Iung bĕ, chông hnam dơnŏ ih jăk tơ anih ayơ mă iĕm gơh oei, yua kơ Kră Yang wă ăn kơ dêh char Isơrael pơngot rơwĕt lăm tơpơh sơnăm.”

² Thoi noh, na bơngai drŏ-kăn ei iung hloi, chu kiơ̆ nơ̆r Êlisê bơngai 'Bok Kei-Dei yua, sư hăm hnam dơnŏ sư jăk oei tơ dêh Philistin tơpơh sơnăm.

³ Đơ̆ng rŏng kơ tơpơh sơnăm noh, bơngai drŏ-kăn ei lĕch đơ̆ng dêh Philistin brŏk tơ Pơlei sư, sư năm apinh pơtao wă kơ sư gơh đei iŏk dơ̆ng hnam păng mir chŭn sư so.

⁴ Kơplah 'noh, pơtao oei pơma dơnuh hăm Gêhasi đam Êlisê bơngai mă 'Bok Kei-Dei yua pơtao jet: “Ih athei roi ăn kơ ĭnh tôm tơdrong tih mă Êlisê pơm bơih.”

⁵ Gêhasi oei roi ăn kơ pơtao mơ̆ng thoi yơ Êlisê hlôi tơiung arih minh 'nu bơngai đơ̆ng lôch, na blư bơngai drŏ-kăn mĕ bơngai 'lơ̆p mă đêl Êlisê tơiung arih noh truh, sư apinh pơtao ăn kơ sư gơh đei iŏk dơ̆ng hnam păng mir chŭn sư. Gêhasi khan: “Ô yŏng tơ'ngla ĭnh, duch 'nâu bơih păng 'nâu kon drŏ-nglo sư mă đêl Êlisê tơiung arih ki.”

⁶ Pơtao jet hloi duch ei, na duch ei roi ăn kơ sư tơdrong noh. Đơ̆ng noh pơtao athei minh 'nu kuan krao pơma tơgŭm ăn, pơtao khan: “Pơdrâu ăn kơ duch âu dôm tơmam sư noh bĕ păng đĭ-đăng phe 'ba đơ̆ng chŭn mir sư, iŏk đơ̆ng sư jăk đơ̆ng dêh 'nâu sơ̆ khơ̆ kơ dang ei.”

Hasael pơlôch pơtao Ben Hadat

⁷ Êlisê năm truh tơ pơlei Đamas. Kơplah noh Ben Hadat pơtao Aram jĭ. Đei bơngai roi ăn kơ pơtao khan: “Bơngai Kră Yang 'Bok Kei-Dei yua, 'nao truh tơ âu.”

⁸ “Pơtao athei Hasael: Chĕp ba minh pôm tơmam pơyơ̆r năm sơng Êlisê bơngai Kră Yang 'Bok Kei-Dei yua, gơnang kơ sư krao apinh jet Kră Yang: “Ĭnh hăm wă kĕ klaih đơ̆ng jĭ dah ưh?”

⁹ Thoi noh, Hasael năm sơng Êlisê bơngai mă Kră Yang 'Bok Kei-Dei yua, chông ba puăn-jĭt tŏ aseh lăk-đa, chơ ba dôm tơmam mă 'lơ̆ng ngơ-ngei đơ̆ng pơlei Đamas noh, wă ăn kơ Êlisê bơngai mă Kră Yang 'Bok Kei-Dei yua, sư năm tơ'bơ̆p Êlisê, na khan: “Kon drŏ-nglo ih Ben Hadat, pơtao đe Aram, sư wơh inh năm tơ ih sư wă apinh khan: “Ĭnh hăm wă kĕ klaih đơ̆ng jĭ 'nâu dah ưh?”

¹⁰ Êlisê tơl: “Ih brŏk roi ăn kơ sư bĕ: Ơ pơtao sĭt ih gô klaih đơ̆ng jĭ, mă khan thoi ei Kră Yang 'Bok Kei-Dei tơbăt ăn kơ ĭnh sư noh gô lôch.”

¹¹ Êlisê, bơngai mă Kră Yang 'Bok Kei-Dei yua pơglăn pơnhen tơ Hasael đunh dĭng mah sư mơlâu, đơ̆ng noh Êlisê khĭk khơ̆k nhơ̆m.

¹² Hasael jet: “Ơ yŏng tơ'ngla ĭnh, yua kơ kiơ ih nhơ̆m?” Êlisê tơl: “Yua kơ ĭnh băt ih gô pơm kơnê̆ pơrăm lu bơngai Isơrael, ih gô soh chhông lu pơlei tih kơjăp noh, pơlôch lu bơngai drŏ-nglo oei hơmuh hơmŏng pơlôch hăm đao, juă pơhlơ̆r lu hơ'lơ̆p iĕ, păng roch klak lu bơngai drŏ-kăn oei anăp.”

¹³ Hasael tơl: “Đam ih noh bu? Noh thoi minh pôm kŏ đĕch; liơ gơh pơm tơdrong tih dêh thoi noh?” Êlisê tơl: Kră Yang 'Bok Kei-Dei tơbăt ăn kơ ĭnh bơih, ih gô pơm pơtao char Aram.

¹⁴ Hasael weh hloi đơ̆ng Êlisê păng brŏk tơ yŏng tơ'ngla sư; yŏng tơ'ngla sư jet: “Êlisê roi ăn kơ ih liơ?” Sư tơl: “Êlisê roi ăn kơ ĭnh khan ih gô praih hiôk.”

¹⁵ Năr dơning Hasael iŏk khăn djrŭ lăm đak, iŏk khăn noh klơ̆p lê̆ muh măt Ben Hadat, na 'bok ei lôch hloi. Đơ̆ng noh, Hasael pơm pơtao tơplih kơ Ben Hadat hloi.

Jêhôram pơm pơtao đe Juđa

¹⁶ Lăm sơnăm mă pơđăm, chăl Jôram, kon drŏ-nglo Ahap, pơgơ̆r dêh Isơrael, na Jêhôram kon drŏ-nglo Jêhôsaphat pơgơ̆r dêh Juđa.

¹⁷ Kơplah Jêhôram tŏk pơm pơtao, sư 'nao pêng-jĭt 'bar sơnăm; sư pơgơ̆r tơhngam sơnăm tơ Pơlei Jêrusalem.

¹⁸ Sư năm kiơ̆ trong lu pơtao Isơrael, lei-lăi thoi pơtao Ahap pơm bơih yua kơ akăn sư 'noh kon pơtao Ahap. Sư pơm kơnê̆ 'bơ̆t anăp Kră Yang.

¹⁹ Mă-lei, Kră Yang mơnat yua kơ Đawit đĭch đam sư, na sư ưh kơ wă pơlôch pơrăm lê̆ adrĕch adrung Juđa ôh, yua kơ Sư pơkă wă 'măn minh pôm ŭnh kơđeng ăn kơ Đawit păng adrĕch adrung sư ling-lang khŏm khŏm.

²⁰ Lăm chăl Jêhôram, đei lu bơngai Eđôm iung blah lu bơngai Juđa păng pôk ăn đei pơtao kơdih.

²¹ Yua kơ thoi noh Jêhôram năm tơ Pơlei Sar, anhăk ba đĭ-đăng gre aseh linh sư. Lĭnh Eđôm wang tăp tang kơ lu sư kiơ̆ kơmăng, pơtao păng lu yŏng linh pơgơ̆r lu gre aseh blah drŭt lu bơngai Eđôm, mă-lei lăp lu linh klĕch hlôi đơ̆ng bơngai Eđôm wang, lu sư kơdâu brŏk tơ hnam lu sư kơdih.

²² Thoi noh, lu bơngai Eđôm blah đe Juđa, lu sư ưh kơ wă chu bơngai Juđa pơgơ̆r truh tơ dang ei. Hơdai kơplah noh mơ̆n Pơlei Lipna kư̆m iung blah mơ̆n.

²³ Lu tơdrong hơ'mon gah Jêhôram, hơ'mon tôm tơdrong đêl sư pơm đe đei chih lăm sơ̆p hla bơar hơ'mon gah lu pơtao.

²⁴ Jêhôram lôch, brŏk pơdơh tơ yă 'bok sư, đe 'bŭ hơdai hăm yă 'bok sư tơ Pơlei Đawit. Đơ̆ng noh, Ahasia kon drŏ-nglo sư pơtrơp đêl anih sư.

Ahasia pơm pơtao đe Juđa

²⁵ Lăm sơnăm mă mơjĭt-'bar, chăl Jôram kon drŏ-nglo Ahap pơtao đe Isơrael pơgơ̆r, na Ahasia kon drŏ-nglo Jêhôram pơtao đe Juđa tŏk pơm pơtao.

²⁶ Ahasia sư 'bar-jĭt sơnăm kơplah sư tŏk pơm pơtao păng sư pơgơ̆r minh sơnăm tơ Pơlei Jêrusalem. Mĕ sư anăn Athalia, sâu Ômri, pơtao đe Isơrael.

²⁷ Sư năm kiơ̆ trong adrĕch adrung Ahap, pơm kơnê̆ 'bơ̆t anăp Kră Yang lei-lăi thoi Ahap hlôi pơm bơih, yua kơ sư ŏng pơtao Ahap.

²⁸ Ahasia sư năm hơdai hăm Jôram kon drŏ-nglo Ahap, năm truh tơ Pơlei Ramôt Gileat wă tơblah hăm Hasael pơtao đe Aram, lu sư tơblah noh, pơtao Jôram rơka.

²⁹ Na sư wơ̆t brŏk tơ Pơlei Jêsreel hơmet rơka đêl linh Aram prah 'bơm sư tơ pơlei Ramôt, 'bơ̆t năr sư tơblah hăm Hasael, pơtao đe Aram. Ahasia kon drŏ-nglo Jêhôram, pơtao đe Juđa, sư jur tơ Jêsreel wă năm lăng Jêhôram, kon drŏ-nglo Ahap oei jĭ 'bĭch păn tơ noh.