II Pot 7 - Sơ̆p Hlabơar Nơ̆r 'Bok Kei-Dei

¹ Na Êlisê khan: “Mơ̆ng bĕ nơ̆r Kră Yang khan thoi âu: Năr dơning kư̆m kơplah jơ 'nâu mơ̆n, 'bơ̆t 'măng dur Pơlei Samari tơpŭng minh hnŏng iĕ, gô tĕch minh sêikơl jên hu, păng 'ba 'bar hnŏng iĕ, kư̆m tĕch minh sêikơl jên hu mơ̆n.

² Yŏng linh mă jê̆ pơtao, sư tơl nơ̆r Êlisê bơngai mă Kră Yang 'Bok Kei-Dei yua: “Mă khan Kră Yang pơih dôm lu 'măng-'mŏk tơ plĕnh ti, tơdrong noh gơh đei hă?” Êlisê tơl: “Măt ih gô 'bôh tơdrong noh, mă-lei ih ưh kơ đei sa ôh.”

³ 'Bơ̆t 'măng dur đei puăn 'nu bơngai jĭ chin, lu sư pơma dơnuh băl: “Bơ̆n hrăn ngôi kơ kiơ 'bơ̆t dâu dĭng truh kơ lôch?”

⁴ Dah bơ̆n khan năm mơ̆t lăm pơlei, lei lăm pơlei âu đei pơngot tih, păng lu bơ̆n gô lôch rơwĕt tơ ei; mă-lei dah bơ̆n hrăn ngôi 'bơ̆t dâu kư̆m lôch mơ̆n. Bĕ bơ̆n năm tơ kơđông linh Aram. Dah lu sư mơnat ăn, lei bơ̆n arih, dah lu sư pơlôch bơ̆n, mă thoi yơ hĭ, lu bơ̆n kư̆m wă lôch kơ rơwĕt mơ̆n.”

⁵ Thoi noh, kơplah drơ̆m kơsơ̆ lu sư năm tơ anih linh Aram; kơplah lu sư truh 'bơ̆t anih noh ưh kơ đei 'bôh bu 'bơ̆t ei.

⁶ Yua kơ Kră Yang hlôi pơm kơ lu linh Aram kơtơ̆ng jơwa gre aseh păng aseh mơdrâp mơdrăp, păng kơtơ̆ng jơwa khŭl linh lơ na lu sư pơma dơnuh: “Ei, pơtao đe Isơrael mưng iŏk lu pơtao đe Hêtit păng pơtao đe Êyiptơ wă blah bơ̆n.”

⁷ Lu sư iung hloi, kơdâu ôn kơplah drơ̆m kơsơ̆, achăng lê̆ anih aseh păng aseh iĕ, lê̆ anih lu sư oei thoi hmă; lu sư ôn wă kơ hlot akâu gơh arih đĕch.

⁸ Lăp lu bơngai jĭ chin truh 'bơ̆t anih ei, lu sư mơ̆t sŏng sa lăm ei, thoi noh, lu sư iŏk hu, maih păng hơbĕn ao năm ôn lê̆. Lu sư wơ̆t mơ̆t lăm anih nai dơ̆ng tơ ei, kư̆m iŏk dôm lu mŭk tơmam na chĕp năm ôn lê̆ dơ̆ng,

⁹ Kơplah ei, lu sư pơma dơnuh băl khan: “Bơ̆n pơm thoi âu ưh kơ trŏ; năr âu đei tơdrong 'lơ̆ng tơdrong 'nă hal, dah bơ̆n wă thĕng đĕch, dĭng 'brưch pơgê hơdah, lei lu bơ̆n gô glăi, bĕ bơ̆n jah năm roi tơdrong 'nâu kơ pơtao.”

¹⁰ Na lu sư năm hloi, krao lu linh gak 'măng dur pơlei, roi kơ lu sư: “Nhôn năm truh tơ kơđông linh Aram, rơhiăng ưh kơ 'bôh bơngai bu, kư̆m ưh kơ đei kơtơ̆ng 'bơ̆r bu mơ̆n, 'bôh lăp lu aseh, lu aseh iĕ oei chô̆ păng lu bơsŭn achăng lê̆ thoi so.”

¹¹ Na linh gak 'măng krao hloi bơngai năm roi tơbăt mơ̆t lăm hnam pơtao.

¹² Pơtao iung kơmăng, khan kơ lu đĭch đam sư: “Ĭnh wă roi tơbăt ăn kơ lu iĕm tơdrong kiơ mă lu bơngai Aram chă đon wă pơm kơ lu bơ̆n. Lu sư băt kơ lu bơ̆n pơngot; na lu sư kơdâu lĕch đơ̆ng kơđông năm ôn tơ bri, lu sư pơkă dih băl khan: Mưh lu bơngai Isơrael lĕch đơ̆ng pơlei, bơ̆n rôp lu sư, arih đơ̆ng noh bơ̆n iŏk pơlei.”

¹³ Minh 'nu đĭch đam pơtao khan: “Ơ pơtao, apinh ih wơh hơdôm 'nu drŏ-nglo năm rôp pơđăm tŏ aseh mă oei oei lăm pơlei, ăn bơngai hao, năm lăng lăng tơ ei, mă ưh lu sư kư̆m wă lôch thoi bơngai Isơrael mă oei lôch och och bơih 'nâu.”

¹⁴ Thoi noh, lu sư iŏk 'bar tŏ gre aseh, tah aseh năm, pơtao athei lu sư năm kiơ̆ 'moi khŭl linh Aram păng pơkă khan: “Năm bĕ lăng lăng wă kơ băt thoi yơ tơpă.”

¹⁵ Lu sư 'moi lu linh Aram truh tơ đak krong Jôrđăn, lu sư 'bôh hơbĕn ao păng tơmam lu sư hŭt lê̆ thơ̆r thăr glơch glach tôch môch kơ trong, kơplah lu sư hăt hot kơdâu ôn 'noh. Lu bơngai mă pơtao wơh năm ei, hơlơ̆k brŏk roi ăn kơ pơtao dơ̆ng.

¹⁶ Đơ̆ng noh kon pơlei pơla lĕch đơ̆ng lăm pơlei tơkan iŏk tơmam đơ̆ng lăm kơđông linh đe Aram. Đei tơpŭng minh hnŏng iĕ, tĕch đei minh sêikơl jên hu păng 'ba 'bar hnŏng iĕ, kư̆m tĕch minh sêikơl jên hu mơ̆n, thoi nơ̆r Kră Yang đei khan bơih.

¹⁷ Pơtao đei ăn bơih kơ yŏng linh, bơngai mă oei lăm anih pơtao noh, ăn sư gak 'măng dur pơlei, mă-lei kon pơlei juă ok ba sư 'bơ̆t 'măng dur ei, na sư lôch hloi, thoi nơ̆r Kră Yang 'Bok Kei-Dei mă Êlisê đei khan lê̆ adrol, kơplah pơtao năm tơ'bơ̆p sư.

¹⁸ Dôm tơdrong đei truh thoi nơ̆r Êlisê bơngai mă 'Bok Kei-Dei yua đei khan kơ pơtao thoi âu: “Năr dơning kư̆m kơplah jơ 'nâu mơ̆n, 'bơ̆t 'măng jang Pơlei Samari, 'bar hnŏng 'ba tĕch minh sêikơl jên hu păng minh hnŏng tơpŭng kư̆m tĕch minh sêikơl jên hu mơ̆n.

¹⁹ Yŏng linh kư̆m tơl Êlisê bơngai mă Kră Yang 'Bok Kei-Dei yua: “Mă khan Kră Yang pơih dôm lu 'măng-'mŏk tơ plĕnh ti ră, tơdrong 'nei gơh đei hă?” Na Êlisê khan dơ̆ng: “Măt ih gô 'bôh tơdrong 'noh, mă-lei ih ưh kơ đei sa ôh.”

²⁰ Na tơdrong mă đei truh 'noh 'blep thoi noh tơpă; yua kơ lu kon pơlei juă pơhlơ̆r lê̆ yŏng linh ei 'bơ̆t 'măng jang pơlei, păng sư lôch hloi.