II Pot 6 - Sơ̆p Hlabơar Nơ̆r 'Bok Kei-Dei

Êlisê pơm tơdrong mơsêh pơm kơ pla sung đông kơpal đak.

¹ Lu bơngai khan lê̆ adrol khan kơ Êlisê thoi âu: “Lăng deh hnam lu nhôn âu oei iĕ hrăt-hrot dêh kơ lu nhôn.

² Apinh ih ăn kơ lu nhôn năm tơ đak krong Jôrđăn đĭ-đăng nhôn wang kăl 'long na pơm hnam lu nhôn oei 'bơ̆t tơter đak krong noh.” Êlisê tơl: “Năm wăi!”

³ Minh 'nu lăm lu sư khan dơ̆ng: “Ơ 'bok thây, apinh ih wang năm hơdai hăm lu nhôn!” Sư tơl: “Inh năm.”

⁴ Thoi noh sư năm hĭ hăm lu đĭch đam sư. Truh tơ krong Jôrđăn, lu sư 'nao pơtơm wă kăl 'long.

⁵ Mă-lei đei minh 'nu tŏk-bŏk sư oei kăl 'long, pla sung sư tơgloh, huŏng lăm đak; sư ôr: “Ơ yŏng tơ'ngla inh! Ôi sung 'nâu inh mưng sung đe tăm dơ̆ng.”

⁶ Êlisê bơngai 'Bok Kei-Dei yua jet: “Sung huŏng tơklă ayơ?” Bơngai ei tơhlâu ăn anih sư huŏng Êlisê koh minh hơjăl 'long, hrang tơklă pla sung huŏng noh, pơm kơ pla sung trơl đông kơpal đak

⁷ păng athei: “Iŏk sung ih wăi!” Na bơngai noh 'mơn iŏk pla sung 'noh hloi.

Kon pơlei Aram, Kră Yang 'Bok Kei-Dei phak pơm kơ lu sư ưh kơ bang

⁸ Thoi noh pơtao đe Aram tơblah hăm lu bơngai Isơrael. Pơtao hăm lu yŏng linh, lu đĭch đam sư pơđâu băl: “Inh gô pơm kơđông inh tơ anih âu, anih to.”

⁹ Êlisê bơngai Kră Yang 'Bok Kei-Dei yua, năm roi ăn kơ pơtao đe Isơrael thoi âu: “Kơchăng hŏ 'nĕ kơ năm rok anih noh, đei lu linh đe Aram oei răp tơ noh.”

¹⁰ Thoi noh pơtao đe Isơrael wơh bơngai năm truh tơ anih mă Êlisê bơngai Kră Yang 'Bok Kei-Dei yua đei tơbăt păng roi kơ sư adrol bơih; khan athei sư krăng kơchăng lơ wơ̆t thoi noh, sư kơchăng ling-lang.

¹¹ Jơhngơ̆m pơtao đe Aram rŭng răng kơ tơdrong noh, na krao lu đĭch đam sư păng khan: Liơ iĕm ưh kơ roi ăn kơ inh, bơngai bu mơ̆t pơtao đe Isơrael?

¹² Minh 'nu lăm đĭch đam sư tơl: “Ơ pơtao, yŏng tơ'ngla inh, lăm lu nhôn ưh kơ đei bu mơ̆t pơtao đe Isơrael ôh; Êlisê to, sư 'bok khan lê̆ adrol mă Kră Yang 'Bok Kei-Dei yua lăm lu đe Isơrael, sư tơbăt ăn kơ pơtao đe Isơrael dôm nơ̆r ih pơma hơdrô̆ lăm anih tep ih.”

¹³ Pơtao athei: “Năm bĕ iĕm chă sư wă kơ băt sư oei tơ yơ, na lê̆ inh ăn linh năm rôp sư.” Đei bơngai năm roi hĭ kơ pơtao. “To sư oei tơ Pơlei Dôthan.”

¹⁴ Thoi noh, na pơtao athei linh sư lơ, hao aseh, păng hao gre aseh năm tơ Pơlei Đôthan, lu sư truh tơ ei kơmăng na wang tăp kơ pơlei ei.

¹⁵ Truh tơ pơgê, đĭch đam, Êlisê bơngai mă Kră Yang 'Bok Kei-Dei yua, iung đơ̆ng hrôih, lĕch tơ jih 'bôh khŭl linh lơ, hăm aseh, gre aseh hloi, oei wang tăp kơ pơlei ei. Sư kơdâu roi kơ Êlisê: “Ơ yŏng tơ'ngla bơ̆n wă pơm liơ 'nâu?”

¹⁶ Êlisê khan: “'Nĕ kơ hli đei lu bơngai oei hăm bơ̆n lơ hloh kơ bơngai oei hăm lu sư.”

¹⁷ Đơ̆ng noh, Êlisê krao khan thoi âu: “Ơ Kră Yang apinh ih pơih ăn măt đĭch đam inh wă kơ sư gơh 'bôh.” Kră Yang pơih ăn măt đam noh, na sư 'bôh rơwơ̆nh rơwănh kơ aseh 'bĕnh kơ kông păng gre aseh ŭnh tăp tang kơ Êlisê.

¹⁸ Linh đe Aram jur wă pơm kơ Êlisê na sư krao khan kơ Kră Yang thoi âu: “Apinh ih pơm kơ măt lu linh ayăt 'nâu bơbôl ưh kơ bang.” Thoi noh Kră Yang pơm hloi kơ măt lu linh ei bơbôl ưh kơ bang, kiơ̆ thoi nơ̆r Êlisê krao khan.

¹⁹ Êlisê khan kơ lu sư: “'Nâu ưh kơ trŏ kơ trong kư̆m ưh kơ trŏ kơ pơlei ôh. Kiơ̆ inh bĕ inh gô chông iĕm tơ bơngai mă iĕm chă 'noh.” Đơ̆ng noh sư chông lu đe ei tơ Pơlei Samari.

²⁰ Lăp lu sư mơ̆t hlom lăm pơlei Samari bơih, Êlisê krao khan: “Ơ Kră Yang, apinh ih pơih măt lu sư ăn kơ lu sư hơdah.” Kră Yang pơih hloi măt lu sư, ăn kơ lu sư hơdah na lu sư 'bôh lu sư oei tŏk-bŏk Pơlei Samari.

²¹ Pơtao đe Isơrael 'bôh lu sư, na pơma dơnuh hăm Êlisê khan: “Ơ 'bă wă pơlôch lu sư dah ưh? Wă pơlôch lu sư dah ưh?”

²² Êlisê khan: “'Nĕ kơ pơlôch! Bĭ lu bơngai ih blah hăm đao păng hră jŭk, ih rôp pơm bơnă bơih, ih pơlôch lu sư dơ̆ng hă? Hơmet ăn kơ lu sư tơmam sa, đak hơmu lê̆ lu sư sa nhă bĕ, đơ̆ng noh tơbrŏk lu sư tơ yŏng lu sư.”

²³ Na sư hơmet ăn kơ lu đe noh et sa tih; lăp lu sư et sa đang bơih, sư achăng lu đe ei brŏk, na lu sư brŏk tơ yŏng lu sư. Iŏk đơ̆ng noh khŭl linh Aram ưh pă pơ̆n mơ̆t blah dêh char Isơrael dơ̆ng.

Đe wang tăp kơ Pơlei Samari

²⁴ Đơ̆ng rŏng kơ lu tơdrong noh, Ben Hadat, pơtao đe Aram, pơpôi akŭm đĭ-đăng lu linh sư năm wang pơlei Samari.

²⁵ Lăm Pơlei Samari hơtai đei pơngot tih, kơplah đe wang pơlei noh đunh, dĭng mah minh pôm kơ̆l aseh iĕ đe tĕch truh tơhngam-jĭt hlak jên hu, ĭch kơtơp dang minh puăt getchai lit, kư̆m tĕch pơđăm hlak jên hu.

²⁶ Kơplah pơtao đe Isơrael nơnăm chă dăr rok kơpal dur pơlei, đei minh 'nu drŏ-kăn krao sư ôr khan: “Ô yŏng tơ'ngla inh, pơtao inh, inh apinh ih dŏng inh.”

²⁷ Pơtao khan: “Dah Kră Yang ưh kơ dŏng ih, lei inh wă dŏng ih hăm kiơ? Yua kơ ưh pă đei kiơ lăm anih preh 'ba, kư̆m ưh pă đei kiơ lăm anih hmĕt đak hơmu bơih.”

²⁸ Pơtao jet: “Ih đei tơdrong kiơ?” Duch ei tơl: “Bơngai drŏ-kăn âu khan kơ inh: Ăn kon drŏ-nglo ih, bơ̆n pơm 'nhĕm sa năr 'nâu na dơning sa kon drŏ-nglo inh.

²⁹ Thoi noh, nhôn pai sa kon drŏ-nglo inh. Wă năr dơning dơ̆ng, inh khan kơ sư: Iŏk kon drŏ-nglo ih dơ̆ng wă kơ bơ̆n pai sa! Mă-lei sư ôn lê̆ kon drŏ-nglo sư,”

³⁰ Kơtơ̆ng duch ei roi thoi noh, pơtao hek ao sư kơdih. Kơplah ei, pơtao oei nơnăm rok kơpal dur pơlei, na kon pơlei 'bôh sư hrŭk ao 'bi tơ lăm.

³¹ Pơtao ôr rơ̆n pơma pơkă khan: “Dah inh ưh kơ kăt ako Êlisê kon drŏ-nglo Saphat lei apinh Kră Yang 'Bok Kei-Dei sek tơlang, phak inh mă trăp hloh.”

³² Êlisê oei ngôi lăm hnam sư kơdih, păng lu kră pơlei kư̆m oei ngôi tăp dăr kơ sư, na pơtao wơh bơih bơngai năm pơlôch Êlisê. Mă-lei kơplah bơngai mă pơtao wơh năm ei ưh tam mă truh, na Êlisê, roi ăn kơ lu kră pơlei thoi âu: “To, iĕm lăng kon 'bok mă juăt kơ pơlôch bơngai noh athei đe năm kăt ako inh. Bơ̆n krăng hŏ mưh sư truh, tang lê̆ 'măng hŏ ưh kơ ăn sư mơ̆t, iĕm ưh kơ kơtơ̆ng jơ̆ng yŏng tơ'ngla sư nơnăm 'bơ̆t rŏng sư hă?”

³³ Tŏk-bŏk sư oei pơma thoi ei na lu sư 'bôh blư bơngai mă pơtao wơh ei truh, kư̆m blu pơtao truh mơ̆n, pơtao khan kơ 'bok Êlisê thoi âu: “Đei tơdrong răm truh 'nâu lĕch đơ̆ng Kră Yang. Lei inh wă gơnang kơ kiơ kơ Kră Yang dơ̆ng.”