II Pot 22 - Sơ̆p Hlabơar Nơ̆r 'Bok Kei-Dei

Jôsia pơgơ̆r dêh Juđa

¹ Kơplah Jôsia tŏk pơm pơtao, sư 'nao tơhngam sơnăm; sư pơgơ̆r pêng-jĭt mônh sơnăm tơ lăm Pơlei Jêrusalem. Mĕ sư anăn Jêđiđa, kon drŏ-kăn Ađaya, đơ̆ng pơlei Bôskat.

² Sư pơm 'lơ̆ng 'bơ̆t anăp Kră Yang, năm kiơ̆ tôm tơdrong Đawit, 'bok kơdră sư sơ̆, sư ưh kơ weh gah 'ma dah gah 'ngiĕo ôh.

³ Lăm sơnăm mă mơjĭt-tơhngam chăl Jôsia pơgơ̆r, sư wơh 'bok chih hla bơar anăn sư Saphan, kon drŏ-nglo Asalia, sâu Mêsulam, năm tơ Hnam Kră Yang, na tơtă khan

⁴ “Năm bĕ tơ 'bok soi tơm anăn sư Hilkia, wă kơ sư jô̆ jên mă đe hlôi chĕp ba bơih tơ lăm hnam akŭm Kră Yang, noh jên mă lu bơngai wei 'măng Hnam akŭm hlôi iŏk bơih đơ̆ng kon pơlei

⁵ Đơ̆ng noh athei pơjao jên noh kơ lu bơngai wei tơdrong jang hơmet Hnam akŭm kơkuh kơ Kră Yang, wă kơ lu sư hơmet ming Hnam akŭm,

⁶ Noh lu thơ̆ traih ming 'long, thơ̆ pơm thơ̆ man tơmo păng yua răt 'long păng răt tơmo đe blah bơih wă hơmet ming Hnam akŭm.

⁷ Mă-lei, huay pă jô̆ dơ̆ng jên mă đe jao bơih kơ lu sư, yua kơ lu sư bơngai jang 'lơ̆ng jang tơnăp.”

⁸ Hilkia, 'bok soi tơm, sư khan kơ Saphan bơngai chih hla bơar: “Inh chă 'bôh bơih Sơ̆p hla bơar khôi juăt đơ̆ng lăm Hnam akŭm kơkuh kơ Kră Yang.” Hilkia ăn kơ Saphan sơ̆p hla bơar noh, na Saphan iŏk đŏk lăng.

⁹ Đơ̆ng noh, Saphan bơngai chih hla bơar năm tơ'bơ̆p pơtao na khan: “Lu đĭch đam Ih ăn bơih jên mă chă đei lăm hnam akŭm noh păng jao bơih 'bơ̆t ti lu bơngai wei tơdrong jang pơm hơmet ming Hnam akŭm kơkuh kơ Kră Yang.”

¹⁰ Saphan bơngai chih hla bơar khan: “Hilkia, 'bok soi tơm, sư ăn kơ inh minh sơ̆p hla bơar.” Đơ̆ng noh Saphan, đŏk tơm măt pơtao.

¹¹ Lăp wă pơtao kơtơ̆ng nơ̆r lăm Sơ̆p hla bơar khôi juăt boih, na sư hek hloi ao sư.

¹² Đơ̆ng noh pơtao athei 'bok soi Hilkia păng Ahikam kon drŏ-nglo Saphan Akbôr kon drŏ-nglo Mikaia, Saphan bơngai chih hla bơar hăm Asaia đĭch đam sư, pơtao khan:

¹³ “Năm, krao apinh kơ inh Kră Yang bĕ, krao apinh kơ kon pơlei pơla, păng krao apinh kơ đĭ char Juđa bơ̆n gah dôm lu nơ̆r lăm sơ̆p hla bơar mă 'nao 'bôh noh. Yua kơ tơdrong blĕk Kră Yang tuh ăn kơ bơ̆n tih dêh, kơlih kơ yă 'bok bơ̆n ưh kơ chu pơm kiơ̆ ôh dôm lu nơ̆r lăm sơ̆p hla bơar 'nâu păng ưh kơ pơm kiơ̆ tơdrong mă Kră Yang hlôi chih bơtho khan kơ lu bơ̆n.”

¹⁴ Thoi noh, lu đe 'bok soi Hilkia, Ahikam, Akbôr, Saphan păng Asaia, lu sư năm tơ bơngai khan lê̆ adrol drŏ-kăn, anăn sư Hulda, akăn Sallum, bơngai wei ao kơ̆m giĕng, kon drŏ-nglo Tikwa, sâu Harhas; sư oei tơ lăm pơlei Jêrusalem, lăm tơring mă 'Bar, lu sư pơma dơnuh hăm duch ei,

¹⁵ Na duch ei khan: “Kră Yang 'Bok Kei-Dei lu bơngai Isơrael khan: Iĕm brŏk roi bĕ kơ bơngai wơh iĕm năm tơ inh noh, thoi âu:

¹⁶ Kră Yang khan: “Inh gô ăn tơdrong răm tih truh 'bơ̆t anih 'nâu păng truh kơ kon pơlei lăm noh hai, thoi nơ̆r đơ̆ng sơ̆p hla bơar mă pơtao đe Juđa hlôi đŏk noh.

¹⁷ Yua kơ lu bơngai Juđa achăng lê̆ Inh bơih, soh 'long 'bâu phu ăn kơ yang nai, tơblĕk, pơm kơ Inh areh yua kơ đơ̆ng tơdrong jang đêl tơpang ti lu sư pơm, noh bơih tơdrong Inh hil mĭl gô tuh 'bơ̆t anih 'nâu, inh ưh kơ layơ păt hơngăm.

¹⁸ Na gah pơtao đe Juđa mă wơh iĕm krao apinh Kră Yang noh, iĕm athei roi kơ sư: Gah lu nơ̆r mă ih hlôi kơtơ̆ng noh Kră Yang 'Bok Kei-Dei lu bơngai Isơrael khan thoi âu:

¹⁹ Yua kơ ih đei jơhngơ̆m tơbral bơih, băt tơjur akâu kơdih 'bơ̆t anăp Kră Yang 'bơ̆t ih kơtơ̆ng Inh pơma hil kơ teh 'nâu hăm kon pơlei lăm noh, dĭng lu sư jing juơ rơhiăng, kon pơlei sư pŭ hiap pơtê̆, mă-lei yua kơ ih hek ao, păng nhơ̆m hơdrĭ 'bơ̆t anăp Inh; yua kơ noh inh kư̆m kơtơ̆ng nơ̆r ih bơih.

²⁰ 'Noh, inh gô iŏk ih brŏk hơdai tơ lu yă 'bok ih; păng đe gô 'bŭ ih lăm bơsat hăm tơdrong hiôk-hian, păng măt ih gô ưh kơ 'bôh tơdrong răm truh mă inh wă tơjruh 'bơ̆t anih teh 'nâu.” Na lu sư brŏk roi ăn kơ pơtao dôm lu nơ̆r noh.