II Pot 19 - Sơ̆p Hlabơar Nơ̆r 'Bok Kei-Dei

Pơklaih pơlei Jêrusalem

¹ Lăp kơtơ̆ng tơdrong noh, Hesekia hek ao sư kơdih, na hrŭk ao 'bi păng năm mơ̆t lăm hnam akŭm kơkuh kơ Kră Yang.

² Đơ̆ng noh sư wơh Êliakim bơngai wei hnam akŭm, Sepna bơngai chih hla bơar păng lu 'bok soi tih, hrŭk ao 'bi năm tơ Êsai bơngai khan lê̆ adrol sư kon drŏ-nglo Amôt.

³ Lu sư khan kơ Êsai: “Hesekia khan: 'Năr 'nâu bơih jơ̆ năr răm tih, năr teh bơtho păng mơlâu thoi drŏ-kăn đĭ tôm khei 'năr sư bơih. Mă-lei jơhngơ̆m pran sư ưh kơ đei wă hơiơch hơ'lơ̆p noh.

⁴ Rŏ lăng Kră Yang 'Bok Kei-Dei ih kơtơ̆ng bơih dôm nơ̆r Rapsaka bơngai mă pơtao đe Asiri yŏng sư wơh wă năm pơjăm Kră Yang 'Bok Kei-Dei mă arih ling-lang păng Kră Yang ih gô hil phak dôm nơ̆r mă Sư hlôi kơtơ̆ng. Thoi noh, inh apinh ih krao khan tơgŭm lu bơngai mă oei arih.”

⁵ Lu đĭch đam pơtao Hesekia năm tơ Êsai,

⁶ Êsai khan kơ lu sư: “Lu iĕm khan bĕ kơ yŏng tơ'ngla iĕm: Kră Yang khan: 'Nĕ kơ hli dôm lu nơ̆r mă lu iĕm kơtơ̆ng lu đĭch đam pơtao đe Asiri pơma pơjăm Inh.

⁷ Inh gô ăn minh tơdrong tơchĕng truh tơ lăm sư, sư gô kơtơ̆ng ang đe roi đơ̆ng noh sư gô wơ̆t brŏk tơ dêh char sư kơdih; tơ noh, Inh gô ăn kơ sư gô pơ̆k lôch kơ đao gưm lăm char sư kơdih.”

⁸ Lăp Rapsaka kơtơ̆ng khan yŏng tơ'ngla sư kơdâu weh bơih đơ̆ng Lakis. Sư brŏk tơ rŏng, 'bôh pơtao Asiri oei wang blah Pơlei Lipna;

⁹ Na pơtao Asiri kơtơ̆ng đe roi gah Tirhaka pơtao đe Êthiôpi: “Sư chông ba linh wă tơblah hăm ih.” Yua kơ noh Senacherip athei bơngai năm tơ Hesekia dơ̆ng păng pơkă khan.

¹⁰ “Iĕm athei khan thoi âu kơ Hesekia pơtao đe Juđa: 'Nĕ ăn kơ Kră Yang 'Bok Kei-Dei Tơ'ngla mă ih gơnang noh hơlĕnh kơ ih, khan: Pơlei Jêrusalem ưh kơ huŏng lăm ti pơtao đe Asiri.

¹¹ 'Nâu ih kơtơ̆ng bơih dôm lu tơdrong mă pơtao Asiri hlôi pơm ăn kơ dôm lu dêh char iĕm pơrăm lê̆ đĭ-đăng: Bĭ ih kơnh klaih hă?

¹² Lu yang kơ lu adrĕch adrung nai mă lu 'bok kơdră inh hlôi pơrăm bơih, noh yang char Gôsan, pơlei Haran, Rêtsep, păng lu bơngai Êđen oei tơ Pơlei Têl Asar, sư gơh dŏng pơklaih lu sư mơ̆n hă?

¹³ Bĭ pơtao dêh char Hamat, dêh char Arpat, pơtao Pơlei Sêpharwaim, pơtao đe Hêna păng pơtao đe Iwa, lu sư tơ yơ ngăl?”

¹⁴ Hesekia đei iŏk kơthơ đơ̆ng ti lu bơngai ăn kơ sư, na sư đŏk. Đơ̆ng noh sư năm tơ hnam akŭm kơkuh kơ Kră Yang, păng pơih kơthơ ei 'bơ̆t anăp Kră Yang.

¹⁵ Hesekia krao khan 'bơ̆t anăp Kră Yang khan: Ơ Kră Yang 'Bok Kei-Dei lu bơngai Isơrael! Ih oei kơpơ̆ng lu chêrubim. Lăp minh 'nu ih đĕch 'Bok Kei-Dei kơ đĭ-đăng lu dêh char lăm ala teh âu. Ih bơih tơ'ngla mă pơjing plĕnh hăm teh.

¹⁶ Ơ Kră Yang apinh Ih pơđêng đon mơ̆ng bĕ. Ơ Kră Yang apinh Ih lar măt lăng nhôn, apinh Ih mơ̆ng bĕ dôm lu nơ̆r mă Senacherip pơma wă pơjăm Kră Yang 'Bok Kei-Dei mă arih ling-lang.

¹⁷ “Ơ Kră Yang! Tơpă, lu pơtao đe Asiri pơrăm đĭ lu adrĕch adrung păng pơrăm lu bri seh teh choh lu sư.

¹⁸ Klơ̆m lê̆ yang lu sư lăm ŭnh yua kơ ưh kơ trŏ kơ yang ôh, noh jơ̆ tơdrong jang đêl ti kon bơngai pơm hăm 'long, păng pơm hăm tơmo; yua kơ thoi noh na pơrăm đĭ bơih lu sư.

¹⁹ Thoi noh na dang ei, ơ Kră Yang 'Bok kei-Dei nhôn! Pơklaih nhôn đơ̆ng ti pơtao noh bĕ wă kơ đĭ-đăng dêh char tơ teh âu băt minh 'nu Ih đĕch Kră Yang 'Bok Kei-Dei.”

Senacherip lôch

²⁰ Êsai kon drŏ-nglo Amôt wơh bơngai năm khan kơ Hesekia, khan: Kră Yang 'Bok Kei-Dei lu bơngai Isơrael khan: Inh kơtơ̆ng bơih nơ̆r ih krao khan gah tơdrong Senacherip, pơtao đe Asiri.

²¹ 'Nâu bơih nơ̆r Kră Yang khan kơ sư: “Adruh hle pơlei Siôn hiĕk pơjăm ih, gah rŏng ih Adruh Hơlai Jêrusalem tơtreh kơ̆l,

²² Ih pơjăm pơ'brơh kơ bu? Ih pơma re kơ bu? Tơpă, măt ih pơang lăng pơgloh kơ bu. Noh ih blah Yang 'Lơ̆ng Rơgoh, lu đe Isơrael!

²³ Ih hlôi yua lu bơngai jang kơ ih na ih blei hiap Kră Yang. Ih khan: Hăm gre aseh lơ 'nâu, inh tŏk tơ kông kơjung truh tơ wĕch kông Liban; oei tơ noh, inh kăl bơih lu 'long hơngo kơjung hloh păng 'long hơngo hla iĕ mă 'lơ̆ng hloh, inh đei năm bơih tơ lăm bri roh noh tơ lăm kơdrơ̆ng 'long rơ̆m roh.

²⁴ Inh sir bơih đak sơlŭng, nhă đak tơ dêh tơmoi, inh juă bơhlơ̆r hăm kơnơl jơ̆ng inh, pơm kơ lu đak krong dêh Êyiptơ hrơ̆ hrĕng kro.”

²⁵ Tơdrong noh Inh pơkă wă pơm 'nâu đunh đơ̆ng sơ̆ bơih, ih ưh kơtơ̆ng hă? Tơdrong kiơ mă Inh pơkă wă pơm đơ̆ng sơ̆ noh dang ei Inh pơm truh bơih, wă kơ ih pơm kơ lu pơlei tih kơjăp dĭng jing anih rơ̆m rek.

²⁶ Kon pơlei lăm dôm lu pơlei noh đĭ rơdu rơmơ̆n, lu sư hli tơrơ păng hơwơ̆l hơwang; lu sư lei-lăi thoi 'nhĕt tơ bri, thoi 'long 'nhĕt 'nao bluh thoi 'nhĕt chăt kơpal bơbŭng hnam jô kro kơplah oei 'lơ̆p, ưh kơ tam kơjung.

²⁷ Mă-lei Inh băt kơ ih tơ yơ, Inh băt 'bơ̆t ih truh păng kơplah ih năm, Inh kư̆m băt tơdrong ih hil blĕk kơ Inh.

²⁸ Yua kơ ih hil blĕk kơ inh păng yua kơ nơ̆r ih pơang, kơtơ̆ng truh tơ đon Inh bơih, sĭt Inh gô tôt gơwang 'bơ̆t muh ih, Inh tah dam bơsei pơhơ̆p 'bơ̆r ih. Đơ̆ng noh Inh pơm kơ ih wơ̆t brŏk kiơ̆ đêl trong mă ih hlôi năm bơih.

²⁹ Ơ Hesekia, 'nâu minh tơdrong tơdra tơbăt kơ ih. Sơnăm 'nâu ih gô sa tơmam đơ̆ng găr adrĕch hơlŭng na rah kơdih, sơnăm mă 'bar, ih gô sa tơmam đơ̆ng găr chăt kơdih, mă-lei sơnăm mă pêng, lu iĕm gô rei păng kĕch yuă, pơtăm 'long hơmu păng sa plei sư.

³⁰ Mơ'nah lăm teh đe Juđa oei oei, lei sư gô chăt rơh păng pơkao đei plei.

³¹ Na đei lu mơ'nah klaih klăi đơ̆ng lăm pơlei Jêrusalem. Đơ̆ng kông Siôn gô đei khŭl klaih đơ̆ng tơdrong truh. Đĭ jơhngơ̆m tơpăt Kră Yang gô pơm tơdrong 'noh.

³² Kơlih kơ 'noh, 'nâu Kră Yang khan gah pơtao đe Asiri: “Sư ưh kơ đei mơ̆t lăm pơlei 'nâu păng kư̆m ưh kơ đei prah minh găr 'brơ̆m sư tơ noh ôh, sư kư̆m ưh kơ đei chĕp khêl năm mơ̆t, sư kư̆m ưh kơ đei bơ̆ teh wă tŏk blah pơlei noh.

³³ Sư mơ̆t trong ayơ, sư gô wơ̆t brŏk kiơ̆ trong noh, sư ưh kơ gơh mơ̆t ôh lăm pơlei âu. Kră Yang khan thoi noh.

³⁴ Yua kơ Inh hăm Đawit đĭch đam inh, na Inh gô dŏng pơklaih pơlei 'nâu.

³⁵ Lăm măng noh, đei minh 'nu linh jang 'lơ̆ng Kră Yang năm tơ anih kơđông Asiri păng pơlôch minh-hrĕng tơhngam-jĭt pơđăm-rơbâu 'nu bơngai tơ noh. Đe iung đơ̆ng hrôih, lăng 'bôh khŭl linh ei lôch glơch glach bơih.

³⁶ Na Senacherip, pơtao đe Asiri, kơdâu brŏk, oei tơ pơlei Ninewơ.

³⁷ Kơplah sư oei kơkuh kơ yang lăm hnam yang Nisrôk, yang sư, na bre kon sư Adrammelek păng Sarêser pơlôch lê̆ sư hăm đao gưm; đơ̆ng noh lu sư kơdâu ôn lăm dêh char Ararat, na Êsarhađôn; kon drŏ-nglo sư tŏk pơm pơtao pơgơ̆r pơtrơp sư.