II Pot 18 - Sơ̆p Hlabơar Nơ̆r 'Bok Kei-Dei

Hesekia pơm pơtao đe Juđa

¹ Lăm sơnăm mă pêng, chăl Hôsêa, kon drŏ-nglo Êlah, pơtao Isơrael, na Hesekia kon drŏ-nglo Ahas pơtao đe Juđa tŏk pơm pơtao.

² Kơplah sư tŏk pơm pơtao, sư 'nao 'bar-jĭt pơđăm sơnăm păng sư pơgơ̆r 'bar-jĭt tơsĭn sơnăm lăm pơlei Jêrusalem. Mĕ sư anăn Abija, kon drŏ-kăn Sachari.

³ Sư pơm 'lơ̆ng 'bơ̆t anăp Kră Yang thoi Đawit, 'bok kơdră sư sơ̆ hlôi pơm.

⁴ Sư yuih lê̆ đĭ dôm lu hnam kơkuh kơ yang tơ anih kơjung, teh pơchah lê̆ chơnang soi, teh tơhuŏng lê̆ rup yang Asêra păng teh pơchah lê̆ 'bih mă Môis pơm hăm kong sơ̆, yua kơ truh kơ jơhnơr sư, lu bơngai Isơrael oei soh ăn 'long 'bâu phu kơ rup yang 'bih. Đe krao rup 'bih noh Nêhustan.

⁵ Hesekia gơnang kơ Kră Yang 'Bok Kei-Dei đe Isơrael; lei na lu pơtao đơ̆ng rŏng kơ sư, dah lăm lu pơtao adrol kơ sư, ưh kơ đei bu thoi sư.

⁶ Sư oei kơjăp hăm Kră Yang, ưh kơ achăng lê̆ ôh, sư wei răk dôm nơ̆r Kră Yang tơtă ăn kơ Môis.

⁷ Kră Yang oei hơdai hăm sư; dôm sư pơm kiơ, dah jang kiơ gơh jing. Sư blah pơtao đe Asiri, ưh pă chu kơ pơtao ei dơ̆ng.

⁸ Sư blah dêh char lu bơngai Philistin, truh tơ pơlei Gasa păng tơring jum dăr đơ̆ng hnam thôt gak truh tơ pơlei tih đei kông kơjăp.

⁹ Truh lăm sơnăm mă puăn, chăl pơtao Hesekia pơgơ̆r 'blep kơ sơnăm mă tơpơh, chăl Hôsêa, kon drŏ-nglo Êlah, pơtao đe Isơrael, na Salmaneser, pơtao đe Asiri năm blah pơlei Samari, wang tăp kơ pơlei noh.

¹⁰ Pêng sơnăm đơ̆ng rŏng, sư blah iŏk Pơlei Samari. 'Noh 'blep kơ lăm sơnăm mă tơdrâu chăl Hesekia pơgơ̆r, jing sơnăm mă tơsĭn chăl Hôsêa, pơtao đe Isơrael, na Pơlei Samari, đe Asiri tơgar iŏk bơih.

¹¹ Pơtao đe Asiri chông ba lu kon pơlei Isơrael năm tơ Asiri, ăn kơ lu sư oei tơ Hala, 'bơ̆t đak Krong Habôr lăm tơring Gôsan păng ăn mơ'nah lu sư oei tơ lu pơlei lăm tơring Mêđi.

¹² Noh, yua kơ lu sư ưh kơ chu kiơ̆ nơ̆r Kră Yang 'Bok Kei-Dei lu sư bơtho khan, mă-lei lu sư pơm glăi kơ tơdrong Kră Yang pơgơ̆p pơkă, lu sư ưh kơ wă, mơ̆ng păng kuă kơ pơm kiơ̆ dôm tơdrong mă Môis, đĭch đam Kră Yang hlôi bơtho.

¹³ Lăm sơnăm mă mơjĭt-puăn, chăl pơtao Hesekia pơgơ̆r, Senacherip, pơtao đe Asiri năm blah lu pơlei tih kơjăp, lăm dêh Juđa păng lu sư iŏk pơlei noh.

¹⁴ Hesekia, pơtao đe Juđa wơh bơngai năm tơ pơlei Lakis, roi ăn kơ pơtao đe Asiri khan: “Inh yoch glăi bơih. Apinh ih weh đơ̆ng dêh char inh; mưh ih wă kơ inh pơm kiơ, inh gô chu pơm.” Pơtao đe Asiri athei Hesekia pơtao đe Juđa ăn kơ sư pêng-hrĕng talâng jên hu păng pêng-jĭt talâng maih.

¹⁵ Hesekia ăn kơ sư dôm lu jên hu đơ̆ng lăm hnam akŭm kơkuh kơ Kră Yang păng đơ̆ng lăm hnam mong tơmam anih pơtao.

¹⁶ Kơplah noh, Hesekia plôh iŏk maih đơ̆ng lom lu 'măng, păng plôh iŏk maih đơ̆ng 'long dơ̆ng 'măng hnam akŭm kơkuh kơ Kră Yang, mă đêl kơdih sư 'mơ̆i lom 'măng noh ăn pơđĭ kơ pơtao đe Asiri.

¹⁷ Mă-lei, pơtao đe Asiri wơh Tartan, Rapsaris păng Rapsaka chông ba minh khŭl linh lơ đơ̆ng pơlei Lakis, năm tơ Hesekia tơ pơlei Jêrusalem lu sư truh tơ pơlei Jêrusalem. Truh bơih lu sư dơ̆ng 'bơ̆t hơbong đak ro mơ̆t tơ Dơnâu Kơpơ̆ng, wă khan trong năm tơ anih lu bơngai juăt kơ pih sa.

¹⁸ Đơ̆ng noh, lu sư apinh pơma dơnuh hăm pơtao; Êliakim, kon drŏ-nglo Hilkia, 'bok tih wei hnam pơtao; Sepna bơngai chih hla bơar, păng Jôa kon drŏ-nglo Asap bơngai chih răk dôm tơdrong truh, lĕch năm tơ'bơ̆p lu sư.

¹⁹ Rapsaka khan kơ lu sư: “Brŏk khan bĕ kơ Hesekia:” “'Nâu pơtao đe Asiri, pơtao tih khan: Ih gơnang kơ bu tơgŭm ih?

²⁰ Ih khan yua 'bơ̆r hoh đĕch gơh đei, pran kơtang kĕ tơblah. Na dang ei, ih hơmĕng gơnang kơ bu mă pơ̆n tơblah hăm inh?

²¹ Noh dang ei ih gơnang kơ Êyiptơ hă? Noh jơ̆ thoi 'long gơlar tơgơ̆, dah bu tơjră kơ 'long noh sĭt gô trŏ ti klĕch hloi. Bu gơnang kơ Pharaôn, pơtao đe Êyiptơ, lu sư kư̆m thoi noh mơ̆n.

²² Mă-lei tơdah ih khan kơ inh: “Lu nhôn gơnang kơ Kră Yang 'Bok Kei-Dei nhôn. Hăm trŏ Hesekia hlôi yuih lê̆ chơnang soi Kră Yang tơ anih kơjung păng khan kơ lu bơngai Juđa kon pơlei Jêrusalem:” Iĕm athei kơkuh kơ Kră Yang 'bơ̆t chơnang soi tơ Jêrusalem đĕch dah kiơ?

²³ Lei ih pơkă bĕ hăm yŏng tơ'ngla inh, pơtao Asiri sư khan: Inh gô jao ăn kơ ih 'bar-rơbâu tŏ aseh dah ih ăn đei bơngai wă hao aseh noh.

²⁴ Liơ iĕm gơh blah pơpuh minh 'nu yŏng linh lu đĭch đam yŏng tơ'ngla inh dah mă iĕm gơnang kơ char Êyiptơ wă kơ đei bơngai hao gre aseh păng gre aseh năm blah yŏng tơ'ngla inh hă? Kŭm ưh kơ kĕ mơ̆n.

²⁵ Hloh kơ noh dơ̆ng, nhôn năm blah dêh 'nâu, nhôn ưh kơ kiơ̆ thoi nơ̆r Kră Yang athei hă? Kră Yang khan kơ inh: Năm blah dêh âu bĕ păng pơrăm lê̆ sư.”

²⁶ Kơplah noh Êliakim, kon drŏ-nglo Hilkia, Sepna păng Jôa khan kơ Rapsaka: “Pơma hăm nhôn đĭch đam ih nơ̆r Aram bĕ yua kơ nhôn hlôh nơ̆r noh. 'Nĕ kơ pơma hăm nhôn nơ̆r Juđa hli kơ kon pơlei kơpal dur noh băt.”

²⁷ Mă-lei Rapsaka tơl khan: “Hăm trŏ kơ yŏng tơ'ngla inh wơh inh năm tơ âu wă pơma hăm yŏng tơ'ngla iĕm păng hăm iĕm đĕch, na ưh kơ pơma hăm lu bơngai mă oei dơ̆ng kơpal dur lu bơngai mă gô sa ĭch nhă đak hơyô kơdih thoi lu iĕm noh hă?”

²⁸ Đơ̆ng noh, Rapsaka dơ̆ng 'bơ̆t ei pơma pơret hăm nơ̆r Juđa khan: “Mơ̆ng bĕ nơ̆r pơtao đe Asiri, pơtao tih pơma.

²⁹ Sư khan: 'Nĕ kơ lê̆ Hesekia hơlĕnh pơdăr lu iĕm, yua kơ sư ưh kơ gơh pơklaih lu iĕm đơ̆ng tơpang ti inh ôh.

³⁰ Kŭm 'nĕ ăn kơ sư pơtrŭt lu iĕm lui gơnang kơ Kră Yang khan: Kră Yang gơh pơklaih bơ̆n păng pơlei âu ưh kơ huŏng lăm ti lu đe Asiri ôh.”

³¹ 'Nĕ kơ mơ̆ng Hesekia, pơtao đe Asiri khan: “Athei hiôk hăm nhôn păng kŭp kơ̆l yơ̆r ti kơ nhôn bĕ; na rim 'nu lăm lu iĕm gô đei sa plei 'long lăm pơgar hơmu iĕm kơdih păng plei hơra iĕm, păng nhă đak sơlŭng iĕm kơdih,

³² dĭng truh tơ inh chông ba iĕm tơ minh pôm dêh char lei-lăi thoi dêh char iĕm, noh dêh char mă đei phe 'ba, đak hơmu, 'bĕng păng pơgar hơmu, minh pôm dêh char đei đak ôliwơ păng đak sut. Thoi noh na iĕm gô arih, huay kơ lôch ôh. “Lei na iĕm 'nĕ kơ mơ̆ng Hesekia, yua kơ sư hơlĕnh kơ lu iĕm 'bơ̆t mă sư pơma khan: Kră Yang gô dŏng pơklaih bơ̆n.

³³ Yang lu adrĕch adrung nai hăm gơh pơklaih dêh char sư kơdih đơ̆ng ti pơtao Asiri ưh?

³⁴ Tơ yơ yang lu bơngai Pơlei Hamat păng yang lu bơngai Arpat? Yang lu bơngai Sêpharwaim, yang lu bơngai Hêna păng lu bơngai Iwa tơ yơ? Lu yang noh hăm gơh pơklaih pơlei Samari đơ̆ng tơpang ti inh ưh?

³⁵ Đĭ-đăng yang jơ̆p-jang dêh char lăm teh đak 'nâu, yang ayơ mă pơklaih bơih dêh char lu sư đơ̆ng tơpang ti inh? Lei na Kră Yang hăm gơh dŏng pơklaih Pơlei Jêrusalem đơ̆ng tơpang ti inh hă?”

³⁶ Mă-lei kon pơlei thĕng đĕch, ưh kơ đei bu tơl minh nơ̆r; yua kơ pơtao khan bơih: “Lu iĕm 'nĕ kơ tơl!”

³⁷ Êliakim, kon drŏ-nglo Hilkia, bơngai wei hnam pơtao. Sepna, bơngai chih răk hla bơar păng Jôa, kon drŏ-nglo Asap bơngai chih răk đei tơdrong truh wih brŏk tơ Hesekia hek lê̆ hơbĕn ao lu sư hiah đĭ, na roi kơ Hesekia dôm nơ̆r đêl Rapsaka pơma noh.