II Pot 17 - Sơ̆p Hlabơar Nơ̆r 'Bok Kei-Dei

Hôsêa pơm pơtao đe Isơrael

¹ Lăm sơnăm mă mơjĭt-'bar, chăl Ahas, pơtao đe Juđa pơgơ̆r, na Hôsêa kon drŏ-nglo Êlah, tŏk pơm pơtao đe Isơrael, lăm Pơlei Samari; sư pơgơ̆r tơsĭn sơnăm.

² Sư pơm kơnê̆ 'bơ̆t anăp Kră Yang, mă-lei ưh kơ dang lu pơtao đe Isơrael adrol kơ sư ôh.

³ Salmaneser, pơtao đe Asiri năm blah pơtao Hôsêa, Hôsêa jing pơtao bơ̆jang kơ Salmaneser păng chu kiơ̆, ra ăn kơ Salmanese jên.

⁴ Mă-lei pơtao đe Asiri 'bôh Hôsêa chă đon wă blơ̆ sư; yua kơ Hôsêa đei wơh bơngai năm tơ Sô, pơtao đe Êyiptơ, păng sư kuă kơ ra ăn kơ pơtao đe Asiri thoi juăt ăn rim sơnăm; na pơtao đe Asiri rôp sư, tah sư tơ lăm hnam phak.

⁵ Đơ̆ng noh pơtao đe Asiri mơ̆t blah pơrăm jơ̆p-jang dêh char sư, wang Pơlei Samari lăm pêng sơnăm.

⁶ Lăm sơnăm mă tơsĭn, chăl Hôsêa; pơtao đe Asiri blah iŏk Pơlei Samari, chông ba kon pơlei Isơrael tơ char Asiri, ăn lu sư oei 'bơ̆t Pơlei Hala păng 'bơ̆t đak krong Habôr tơ char Gôsan păng oei tơ lơ lu pơlei lăm dêh char Mêđi.

⁷ Tơdrong 'nâu truh yua kơ kon pơlei Isơrael đei pơm yoch boih hăm Kră Yang 'Bok Kei-Dei lu sư, Tơ'ngla mă hlôi dui iŏk lu sư lĕch đơ̆ng dêh Êyiptơ; păng đơ̆ng pơtao Pharaôn pơtao đe Êyiptơ pơgŏ pơđep lu sư. Lu sư hlôi kơkuh bơih kơ yang nai,

⁸ yak kiơ̆ tơdrong juăt lu adrĕch adrung mă Kră Yang hlôi puh tơweh lu sư đơ̆ng anăp lu bơngai Isơrael păng yak kiơ̆ tơdrong juăt mă lu pơtao đe Isơrael hơmet bơih.

⁹ Kon pơlei Isơrael oei ôn klĕnh pơm dôm lu tơdrong ưh kơ trŏ tơplơ̆ hăm Kră Yang 'Bok Kei-Dei lu sư, pơdơ̆ng pơjing lu anih kơjung kơkuh kơ lu yang nai lăm jơ̆p kơ pơlei lu sư, đơ̆ng pơlei iĕ truh kơ pơlei tih kơjăp.

¹⁰ Lu sư pơdơ̆ng kơdih lu gơ̆ng tơmo păng kơkuh kơ rup yang Asêra kơpal kông groi păng ala tơm 'long kơdrơ̆ng.

¹¹ Tơ noh lu sư soh pơyơ̆r tơmam soi kơpal kông, thoi lu adrĕch adrung mă Kră Yang đei puh tơweh boih đơ̆ng lu sư; lu sư pơm kơnê̆ păng tơblĕk Kră Yang.

¹² Lu sư kơkuh kơ lu rup yang mă Kră Yang khă bơih lu sư: “Lu iĕm 'nĕ kơkuh kơ lu sư.”

¹³ Mă-lei Kră Yang yua 'bơ̆r lu bơngai khan lê̆ adrol păng băt lê̆ adrol na lu sư bơtho khan kơ lu bơngai Isơrael păng lu bơngai Juđa băt: “Weh bĕ đơ̆ng trong kơnê̆ lu iĕm, athei wei răk nơ̆r Inh tơtă, păng wei răk tơdrong juăt Inh, kiơ̆ thoi dôm tơdrong juăt Inh tơtă mă Inh yua bơih 'bơ̆r lu bơngai khan lê̆ adrol bơngai đĭch đam Inh na bơtho kơ lu yă 'bok lu iĕm.”

¹⁴ Mă-lei lu sư arăng kơ̆l ưh kơ wă mơ̆ng, lei-lăi thoi lu yă 'bok lu sư ưh kơ đei đon lui kơ Kră Yang 'Bok Kei-Dei lu sư.

¹⁵ Lu sư sơngah achăng lê̆ dôm tơdrong juăt păng tơdrong Kră Yang pơgơ̆p pơkă hăm lu yă 'bok lu sư păng dôm lu nơ̆r tơbăt wă kơ lu sư kơchăng. Lu sư năm kiơ̆ lu yang ưh kơ tơpă păng jing bơngai ưh kơ yua kiơ, lu sư rok adrĕch adrung lu bơngai tăp dăr kơ lu sư, mă Kră Yang đei khă kuă ăn rok kiơ̆ lu đe noh.

¹⁶ Lu sư achăng hŭt lê̆ đĭ-đăng dôm nơ̆r Kră Yang 'Bok Kei-Dei lu sư tơtă, lu sư man kơdih 'bar tŏ rup rơmo kon păng pơm rup yang Asêra păng kơkuh kơ đĭ-đăng lu yang kơpal rơwơ̆ng, păng kơkuh kơ yang Baal.

¹⁷ Lu sư 'buh kon drŏ-nglo kon drŏ-kăn lu sư lăm ŭnh pơm tơmam soi sơmah kơ yang, lui kiơ̆ kơ pơjâu tơwir păng pơjâu lăng ti lu sư tĕch akâu lu sư kơdih pơm kơnê̆ 'bơ̆t anăp Kră Yang, wă tơblĕk Kră Yang.

¹⁸ Yua kơ thoi noh Kră Yang hil mĭl dêh kơ lu bơngai Isơrael, puh tơweh lu sư đơ̆ng anăp Kră Yang ưh pă đei bu dơ̆ng oei pă khŭl Juđa đĕch bơih.

¹⁹ Khŭl Juđa kư̆m lei-lăi ưh kơ chu răk dôm nơ̆r Kră Yang 'Bok Kei-Dei lu sư tơtă mơ̆n; na lu sư pơm kiơ̆ tơdrong juăt mă lu bơngai Isơrael chă pơjing kơdih.

²⁰ Lei na Kră Yang achăng lê̆ đĭ adrĕch Isơrael, pơm kơ lu sư pơmat-tat păng jao lu sư tơ lăm ti lu bơngai iŏk tơgar, dĭng đe chông phak lu sư ataih đơ̆ng muh măt Kră Yang.

²¹ Kơplah Kră Yang tơklah lê̆ lu bơngai Isơrael đơ̆ng adrĕch Đawit, lu sư pôk Jêrôbôam, kon drŏ-nglo Nêbat pơm pơtao; sư pơhlŭ đe Isơrael tơklah đơ̆ng Kră Yang, pơm kơ lu sư pơm yoch tih.

²² Đĭ-đăng lu bơngai Isơrael pơm kiơ̆ dôm tơdrong yoch mă Jêrôbôam hlôi pơm, lu sư ưh kơ weh đơ̆ng tơdrong yoch noh ôh,

²³ dĭng mah Kră Yang puh tơweh lê̆ lu sư đơ̆ng anăp Kră Yang thoi Sư hlôi yua 'bơ̆r lu đĭch đam Sư bơngai khan lê̆ adrol đei khan lê̆ bơih. Thoi noh na lu đe Isơrael, Kră Yang puh tơweh lu sư đơ̆ng dêh sư kơdih, phak lu sư tơ dêh Asiri dĭng truh tơ dang ei.

²⁴ Pơtao đe Asiri anhăk ba bơngai đơ̆ng Babilôn, Kuta, Awa, Hamat păng Sêpharwaim ăn lu sư oei lăm lu pơlei tơ Samari tơplih kơ lu bơngai Isơrael. Lu sư blah iŏk dêh char Samari păng oei lăm lu pơlei tơ noh.

²⁵ Kơplah lu sư 'nao oei tơ noh, lu sư ưh kơ kơkuh ôh kơ Kră Yang, na Kră Yang ăn dăm-brang năm châu pơlôch lu mơ'nah lăm lu sư.

²⁶ Thoi noh đe roi kơ pơtao Asiri: “Lu kon pơlei mă ih anhăk ba ăn oei lăm lu pơlei tơ Samari ưh kơ băt tơdrong juăt kơkuh kơ Kră Yang lăm dêh char noh, yua kơ noh na yang ei đei athei dăm-brang năm pơlôch lu sư, kơlih kơ lu sư ưh kơ băt tơdrong juăt kơkuh kơ yang lăm char noh.”

²⁷ Na pơtao đe Asiri wơh athei: “Lăm lu 'bok soi mă lu iĕm rôp bơih, iĕm athei rơih iŏk minh 'nu chông ba sư brŏk tơ dêh char noh wă kơ sư bơtho tơdrong juăt kơkuh kơ yang lăm dêh char noh.”

²⁸ Thoi noh, minh 'nu bơngai lăm lu 'bok soi mă lu sư hlôi rôp đơ̆ng dêh Samari sơ̆, lu sư ăn wơ̆t brŏk oei tơ Bethel, na sư bơtho kon pơlei kơkuh kơ Kră Yang thoi yơ noh.

²⁹ Mă-lei rim kơ adrĕch adrung, pơm pơjing yang lu sư kơdih, dan lu yang noh lăm anih kơjung mă kon pơlei Samari hlôi pơdơ̆ng pơjing, rim adrĕch adrung lu sư, dan lê̆ yang lu sư kơdih lăm pơlei mă lu sư oei.

³⁰ Lu bơngai Babilôn pơm rup yang Sukôt Bênôt lu bơngai Kut pơm rup yang Nergal, lu bơngai Hamat pơm rup yang Asima,

³¹ lu bơngai Awit pơm rup yang Niphas păng Tartak lu bơngai Sêpharwaim soh kon lu sư lăm ŭnh sơmah kơ yang Adrammelek păng yang Anamêlek, lu bơngai Sêpharwaim đei 'bar tŏ yang noh.

³² Lu sư hli kơ Kră Yang, mă-lei oei rơih iŏk lu bơngai lăm lu sư pơm 'bok soi, soi kơ yang tơ anih kơjung; yua kơ lu bơngai noh na lu 'bok soi pơyơ̆r tơmam soi lăm anih kơjung.

³³ Lu adrĕch adrung ei kơkuh kơ Kră Yang mă-lei kư̆m kơkuh kơ yang sư kơdih oei bơwei lu tơdrong juăt adrĕch adrung lu sư.

³⁴ Dĭng truh tơ dang ei, lu sư oei pơm rok thoi tơdrong juăt so sư kơdih. Lu sư ưh kơ hli yom kơ Kră Yang, ưh kơ chu wei răk tơdrong juăt, dah nơ̆r Kră Yang tơtă kơ kon sâu Jakôp mă Kră Yang anăn ăn kơ sư Isơrael.

³⁵ Kră Yang pơm tơdrong pơgơ̆p pơkă hăm lu sư, bơtho khan kơ lu sư: “Lu iĕm 'nĕ kơkuh kơ lu yang nai, dah bơ̆jang kơ lu sư, păng 'nĕ kơ soi sơmah kơ lu sư.

³⁶ Mă-lei iĕm athei hli yom kơ Kră Yang Tơ'ngla mă yua tơdrong mơsêh tih păng chro ti Sư dui, anhăk ba lu iĕm lĕch đơ̆ng dêh Êyiptơ; iĕm athei hli yom kơkuh păng pơyơ̆r kơ sư tơmam soi.

³⁷ Lu tơdrong juăt nơ̆r tơtă, păng nơ̆r Kră Yang athei mă Sư chih ăn kơ lu iĕm; lu iĕm athei wei răk, pơm kiơ̆ ling-lang khŏm khŏm, 'nĕ kơkuh kơ lu yang nai.

³⁸ Lu iĕm 'nĕ kơ hiơt ôh tơdrong pơgơ̆p pơkă mă Inh pơjing hăm lu iĕm 'nĕ kơkuh kơ yang nai.

³⁹ Mă-lei, athei hli yom kơ Kră Yang 'Bok kei-Dei iĕm, Sư gô pơklaih iĕm đơ̆ng ti lu bơngai ayăt kơ iĕm.”

⁴⁰ Mă-lei, lu adrĕch adrung ei ưh kơ chu mơ̆ng, oei pơm kiơ̆ rok thoi tơdrong juăt so sư kơdih.

⁴¹ Thoi noh bơih, lu adrĕch adrung 'nâu kơkuh kơ Kră Yang păng kư̆m oei bơ̆jang kơ lu rup yang mă lu sư pơm kơdih; đơ̆ng yă 'bok lu sư pơm thoi yơ, na lu kon sâu sư kư̆m oei pơm thoi noh truh tơ dang ei.