II Pot 16 - Sơ̆p Hlabơar Nơ̆r 'Bok Kei-Dei

Ahas pơm pơtao đe Juđa

¹ Lăm sơnăm mă mơjĭt-tơpơh, chăl Pêka, kon drŏ-nglo Rêmalia pơgơ̆r, na Ahas, kon drŏ-nglo Jôtham, tŏk pơm pơtao đe Juđa.

² Ahas sư 'nao 'bar-jĭt sơnăm kơplah sư tŏk pơm pơtao; sư pơgơ̆r mơjĭt-tơdrâu sơnăm tơ Pơlei Jêrusalem. Sư ưh kơ pơm 'lơ̆ng 'bơ̆t anăp Kră Yang 'Bok Kei-Dei sư, thoi Đawit 'bok kơdră sư sơ̆ hlôi pơm.

³ Mă-lei sư năm kiơ̆ trong lu pơtao đe Isơrael, sư pơyơ̆r kon drŏ-nglo sư pơm tơmam soi 'buh pơkhôi, pơm tơdrong kơnê̆ 'mê̆-'mach thoi lu adrĕch adrung nai đei pơm, mă Kră Yang 'Bok Kei-Dei puh lê̆ lu sư đơ̆ng lu bơngai Isơrael.

⁴ Sư kư̆m soi sơmah păng soh 'long 'bâu phu tơ lu anih kơkuh kơ yang đe pơm tơ kơpal groi păng ala tơnơm 'long kơdrơ̆ng.

⁵ Kơplah ei, Rêsin, pơtao đe Aram păng Pêka, kon drŏ-nglo Ramalia, pơtao đe Isơrael bre sư năm, wă tơblah hăm Pơlei Jêrusalem; lu sư bơwang Ahas, mă-lei lu sư ưh kơ kĕ kơ pơtao ei.

⁶ 'Blep kơplah noh, pơtao đe Eđôm blah iŏk Pơlei Êlat pơdrâu kơ Eđôm; sư blah puh lê̆ lu bơngai Juđa đơ̆ng pơlei Êlat, na lu bơngai Eđôm năm tơ Pơlei Êlat, oei hloi tơ noh dĭng truh dang ei.

⁷ Ahas wơh bơngai năm tơ Tiglat Pilêser, pơtao đe Asiri, sư khan: “Inh âu bơngai đam ih, kon drŏ-nglo ih; apinh ih dŏng pơklaih inh đơ̆ng tơpang ti pơtao đe Aram păng pơtao đe Isơrael blah inh.”

⁸ Ahas kư̆m iŏk hu, maih đơ̆ng lăm Hnam akŭm kơkuh kơ Kră Yang păng đơ̆ng lăm hnam mong tơmam lăm hnam pơtao, chĕp ba tơmam noh ăn kơ pơtao đe Asiri.

⁹ Pơtao đe Asiri drơ̆ng iŏk nơ̆r Ahas apinh, sư năm blah Pơlei Đamas păng tơgar iŏk pơlei 'noh, rôp ba kon pơlei sư pơm bơnă tơ Pơlei Kir păng pơlôch lê̆ pơtao Rêsin.

¹⁰ Na Ahas năm tơ pơlei Đamas wă sơng Tiglat Pilêser pơtao đe Asiri. Ahas 'bôh minh pôm chơnang soi tơ lăm pơlei Đamas păng chhơ̆ iŏk rup chơnang soi noh trŏ thoi đêl đe pơm sư, gơih ăn kơ 'bok soi anăn Uria.

¹¹ Uria pơm minh pôm chơnang soi rok thoi đêl đe pơm, mă pơtao Ahas đơ̆ng pơlei Đamas hlôi gơih ăn kơ sư noh; Uria pơm keh chơnang soi ei adrol kơ pơtao brŏk.

¹² Lăp pơtao brŏk đơ̆ng Pơlei Đamas, 'bôh chơnang soi, na sư tơkan năm jê̆ păng pơyơ̆r tơmam soi kơpal chơnang soi ei.

¹³ Sư soh pơyơ̆r kơpal chơnang soi ei tơmam soi 'buh pơkhôi păng tơmam soi phe 'ba, tuh tơmam soi huch sa păng tơtreh pham tơmam soi bơnê kơpal chơnang soi.

¹⁴ Chơnang soi đe pơm păng kong dan 'bơ̆t anăp Kră Yang, sư iŏk lê̆ đơ̆ng anih mă đe dan chơnang soi ei 'bơ̆t 'măng Hnam akŭm, sơlam chơnang soi 'nao hăm hnam Kră Yang, đơ̆ng noh iŏk dan tơ gah yă-nơ̆m kơ chơnang soi sư 'nao pơm.

¹⁵ Đơ̆ng noh, pơtao Ahas athei 'bok soi Uria khan: “Ih gô soh kơpal chơnang soi tih 'nâu tơmam soi 'buh pơkhôi rim pơgê păng tơmam soi phe 'ba tơ gơsơ̆ păng tơmam soi 'buh tơmam soi phe 'ba đơ̆ng pơtao 'mơ̆i păng tơmam soi 'buh đơ̆ng đĭ kon pơlei lăm char păng tơmam soi lu sư pơyơ̆r phe 'ba păng tơmam soi et huch Ih athei tơtreh pham lu tơmam soi 'buh kơpal chơnang tih noh. Mă-lei chơnang soi păng pơm kong 'măn lê̆ kơ inh krao apinh Kră Yang.”

¹⁶ 'Bok soi Uria pơm kiơ̆ dôm tơdrong đêl pơtao Ahas bơtho sư.

¹⁷ Đơ̆ng noh, pơtao Ahas teng yuih lê̆ lu gre pơm păng kong păng hŭt lê̆ lu kơthŭng đak đêl dan kơpal gre ei păng iŏk tơjur lê̆ bơng đak đơ̆ng kơdŭ rơmo đe pơm păng kong, na lê̆ sư 'bơ̆t hơnơ̆l tơmo.

¹⁸ Yua kơ sư wă kơ lăp đon pơtao đe Asiri, na sư kư̆m teng yuih lê̆ khăn dăng kuă kơ tŏ kơ trong đơ̆ng Hnam akŭm truh tơ 'măng dur, 'măn ăn kơ pơtao năm lăm năr pơdơh Sa'bat.

¹⁹ Dôm lu tơdrong roi hơ'mon nai gah Ahas, păng đĭ-đăng tơdrong jang đêl sư pơm, đe đei chih lê̆ tơ lăm sơ̆p hla bơar hơ'mon roi gah lu pơtao đe Juđa.

²⁰ Đơ̆ng noh, Ahas lôch thoi tep hiôk hăm lu 'bok kơdră sư sơ̆, đe 'bŭ sư jê̆ lu 'bok kơdră sư tơ Pơlei Đawit. Hesekia, kon drŏ-nglo sư, tŏk pơm pơtao pơgơ̆r pơtrơp sư.