II Pot 14 - Sơ̆p Hlabơar Nơ̆r 'Bok Kei-Dei

Amasia pơm pơtao đe Juđa

¹ Lăm sơnăm mă 'bar, chăl Jêhôas, kon drŏ-nglo Jêhôahas, pơtao đe Isơrael pơgơ̆r, na Amasia, kon drŏ-nglo Jôas pơtao đe Juđa, tŏk pơm pơtao.

² Kơplah sư tŏk pơm pơtao sư 'nao 'bar-jĭt pơđăm sơnăm păng sư pơgơ̆r 'bar-jĭt tơsĭn sơnăm lăm pơlei Jêrusalem, mĕ sư anăn Jêhôadin, bơngai Pơlei Jêrusalem.

³ Sư pơm 'lơ̆ng 'bơ̆t anăp Kră Yang, mă-lei sư ưh kơ thoi Đawit, 'bok kơdră sư sơ̆; sư pơm tơdrong rok thoi Jôas 'bă sư đei pơm.

⁴ Mă-lei, sư ưh kơ teng hŭt lê̆ hnam kơkuh kơ yang tơ anih kơjung, kon pơlei oei nŏng kơ soi sơmah păng soh 'long 'bâu phu 'bơ̆t hnam kơkuh kơ yang tơ anih kơjung ei đĕch.

⁵ Lăp dêh char sư pơgơ̆r pran kơjăp bơih, na sư pơlôch lu đĭch đam mă hlôi pơlôch 'bă sư sơ̆.

⁶ Mă-lei sư ưh kơ pơlôch ôh lu kon, bơngai pơlôch đe noh, kiơ̆ thoi nơ̆r mă đe đei chih bơih tơ lăm sơ̆p hla bơar tơdrong juăt Môis: “Lăm tơdrong Kră Yang đei tơtă bơih, đe ưh kơ pơlôch mĕ 'bă yua kơ kon yoch, kư̆m ưh kơ pơlôch kon yua kơ mĕ 'bă pơm yoch; rim 'nu đe gô pơlôch yua kơ tơdrong yoch sư kơdih.

⁷ Amasia pơlôch mơjĭt-rơbâu 'nu linh Eđôm tơ lăm thong 'Boh, blah iŏk pơlei Sêla păng đe krao pơlei noh anăn Jôktheel truh tơ dang ei.

⁸ Thoi noh Amasia wơh bơngai năm tơ Jêhôas, kon drŏ-nglo Jêhôahas, sâu Jêhu, pơtao đe Isơrael, na khan: “Năm tơ âu, bơ̆n tơblah băl lăng.”

⁹ Jêhôas pơtao đe Isơrael wơh bơngai pơtruh nơ̆r kơ Amasia pơtao đe Juđa: “'Long jơla lăm char Liban wơh athei năm pơtruh nơ̆r kơ 'long hơngo lăm bri Liban thoi âu: Ăn kon adruh ih pơm akăn kon tơdăm inh. Minh pôm sem bri đơ̆ng bri Liban rok pơjuă pơhĕch jơla noh.

¹⁰ Ih blah bơih adrĕch lu đe Eđôm jei ih păng jơhngơ̆m 'bĕnh kơ tơdrong pơang. Ih ư-ang tơdrong jei noh lăm hnam ih bĕ; yua kơ kiơ ih 'maih pơm ăn kơdih akâu đei tơdrong răm truh păng pơm kơ char Juđa hiong răm?”

¹¹ Mă-lei Amasia ưh kơ 'maih mơ̆ng, thoi noh Jêhôas pơtao đe Isơrael năm hloi, đơ̆ng noh bre sư Amasia, pơtao Juđa tơblah băl tơ Bêt Sêmes lăm char Juđa.

¹² Linh đe Isơrael blah lê̆ lu đe Juđa thuơ, rim 'nu lu sư kơdâu ôn, brŏk tơ anih hnam lu sư kơdih.

¹³ Tơ Bêt Sêmes, Jêhôas pơtao đe Isơrael rôp arih Amasia pơtao đe Juđa kon drŏ-nglo Jôas, sâu Ahasia; đơ̆ng noh năm tơ Pơlei Jêrusalem teng pơchah lê̆ dur Jêrusalem đơ̆ng 'măng jang Êphraim truh tơ 'măng jang Mum, ataih kơjung sư truh tơ 'bar-hrĕng hlok.

¹⁴ Sư iŏk lu maih, hu, pơnhan păng dôm tơmam yua lăm Hnam akŭm kơkuh kơ Kră Yang păng dôm lu tơmam gĭt lăm hnam pơtao; sư kư̆m rôp pơgơ̆t lê̆ bơngai đơ̆ng lăm ei pơm bơnă, đơ̆ng noh weh brŏk tơ Pơlei Samari.

¹⁵ Dôm lu tơdrong roi hơ'mon nai gah Jêhôas, dôm tơdrong jang đêl sư pơm tơdrong nuih kơtang sư, tơdrong sư tơblah hăm Amasia pơtao đe Juđa, đe đei chih lê̆ boih tơ lăm sơ̆p hla bơar hơ'mon gah lu pơtao Isơrael

¹⁶ Jêhôas lôch thoi tep hăm 'bok kơdră sư sơ̆, păng đe 'bŭ sư tơ Pơlei Samari hơdai hăm lu pơtao đe Isơrael; đơ̆ng noh, Jêrôbôam, kon drŏ-nglo sư tŏk pơm pơtao pơtrơp đơ̆ng sư.

¹⁷ Amasia, kon drŏ-nglo Jôas; pơtao đe Juđa oei arih mơjĭt-pơđăm sơnăm dơ̆ng đơ̆ng rŏng kơ Jêhôas kon drŏ-nglo Jêhôahas pơtao đe Isơrael lôch 'noh.

¹⁸ Lu tơdrong hơ'mon nai gah Amasia, đe đei chih lê̆ boih tơ lăm sơ̆p hla bơar hơ'mon gah lu pơtao đe Juđa.

¹⁹ Tơ Pơlei Jêrusalem đei bơngai chă đon wă blah pơtao Amasia. Na sư kơdâu ôn tơ Lakis. Mă-lei đe athei bơngai druh 'moi rôp sư tơ Lakis păng pơlôch sư tơ noh.

²⁰ Đơ̆ng noh, đei bơngai chơ iŏk atâu sư kơpal gre aseh, brŏk tơ Pơlei Jêrusalem păng 'bŭ sư hơdai hăm lu 'bok kơdră sư tơ Pơlei Đawit.

²¹ Đĭ-đăng kon Pơlei Juđa iŏk Asaria 'nao mơjĭt-tơdrâu sơnăm pôk pơm pơtao pơtrơp kơ Amasia, 'bă sư.

²² Đơ̆ng rŏng kơ 'bă sư Amasia lôch thoi tep hiôk hăm lu 'bok kơdră sư bơih, na Asaria pơjing pơlei Êlat păng pơđâu iŏk pơlei ei tơwih ăn kơ đe Juđa pơm tơ'ngla pơgơ̆r.

Jêrôbôam mă II pơm pơtao đe Isơrael

²³ Sơnăm mă mơjĭt-pơđăm, chăl Amasia kon drŏ-nglo Jôas, pơtao đe Juđa pơgơ̆r, Jêrôbôam kon drŏ-nglo Jêhôas tŏk pơm pơtao đe Isơrael tơ pơlei Samari. Sư pơgơ̆r puăn-jĭt mônh sơnăm.

²⁴ Sư pơm kơnê̆ 'bơ̆t anăp Kră Yang, sư ưh kơ achăng lê̆ ôh tơdrong yoch Jêrôbôam kon drŏ-nglo Nêbat pơm kơ Isơrael pơm yoch.

²⁵ Sư pơdrâu iŏk đơ̆ng hơdral dêh char Isơrael đơ̆ng 'bơ̆t trong mơ̆t tơ Pơlei Libo Hamat truh tơ đak Dơsĭ Araba, kiơ̆ thoi nơ̆r Kră Yang 'Bok Kei-Dei đe Isơrael khan kơ Jôna đĭch đam Sư kon drŏ-nglo Amitai 'bok khan lê̆ adrol mă oei tơ Pơlei Gat Hepher.

²⁶ Yua kơ Kră Yang 'bôh bơih lu bơngai Isơrael đei tơdrong pơmat-tat ơh sơ'ngon dêh, lăm Isơrael mă bơngai rơngei, dah đĭch pă đei bu dŏng tơgŭm.

²⁷ Lei na Kră Yang Sư ưh kơ đei khan wă sut lê̆ anăn Isơrael đơ̆ng lăm teh âu, thoi noh sư yua hloi ti Jêrôbôam kon drŏ-nglo Jêhôas dŏng pơklaih lu sư.

²⁸ Lu tơdrong roi hơ'mon nai gah Jêrôbôam, lu tơdrong đêl sư pơm, tơdrong nuih kơtang sư, tơdrong sư tơblah păng pơdrâu iŏk dơ̆ng ăn kơ lu bơngai Isơrael Pơlei Đamas păng Hamat sơ̆ ki đêl Juđa iŏk, dôm tơdrong 'nei đe đei chih tơ lăm sơ̆p hla bơar hơ'mon gah lu pơtao đe Isơrael?

²⁹ Jêrôbôam lôch thoi tep hiôk hăm lu 'bok kơdră sư sơ̆, noh lu pơtao Isơrael; đơ̆ng noh, Sachari kon drŏ-nglo sư tŏk pơm pơtao pơtrơp sư.