II Pot 13 - Sơ̆p Hlabơar Nơ̆r 'Bok Kei-Dei

Jêhôahas, pơgơ̆r đe Isơrael

¹ Sơnăm mă 'bar-jĭt pêng, chăl Jôas, kon drŏ-nglo Ahasia, pơtao đe Juđa pơgơ̆r, na Jêhôahas, kon drŏ-nglo Jêhu, tŏk pơm pơtao đe Isơrael tơ Pơlei Samari. Sư pơgơ̆r mơjĭt-tơpơh sơnăm.

² Sư pơm tơdrong kơnê̆ 'bơ̆t anăp Kră Yang; sư pơm rok tơdrong yoch Jêrôbôam, kon drŏ-nglo Nêbat, noh tơdrong mă pơm kơ Isơrael pơm yoch; sư ưh kơ achăng lê̆ ôh tơdrong yoch noh.

³ Kră Yang hil mĭl kơ lu đe Isơrael, Sư jao lu bơngai Isơrael lăm ti Hasael, pơtao đe Aram păng Ben Hadat kon drŏ-nglo Hasael đĭ lăm kơplah 'bar chăl pơtao noh pơgơ̆r.

⁴ Jêhôahas krao apinh Kră Yang na Kră Yang mơ̆ng nơ̆r sư; yua kơ Kră Yang 'bôh pơtao đe Aram pơgŏ pơđep kon Pơlei Isơrael dêh.

⁵ Kră Yang ăn kơ Isơrael minh 'nu bơngai dŏng pơklaih lu sư, kon pơlei Isơrael klaih đơ̆ng ti lu đe Aram păng gơh oei lăm anih hnam lu sư kơdih thoi adrol sơ̆ dơ̆ng,

⁶ Mă-lei, lu sư kuă kơ achăng lê̆ ôh tơdrong yoch Jêrôbôam, tơdrong mă pơtao noh hlôi pơm bơih kơ đe Isơrael pơm yoch; lu sư oei hơnơ̆ng kơ pơm yoch đĕch; dĭng mah rup man yang Asêra oei pơdơ̆ng lê̆ dơ'nhơ̆ng lăm pơlei Samari.

⁷ Lăm đĭ-đăng khŭl linh Jêhôahas, Kră Yang 'Bok Kei-Dei oei lê̆ lăi lăp pơđăm-jĭt 'nu linh hao aseh păng mơjĭt tŏ gre aseh tơblah păng mơjĭt-rơbâu 'nu linh yak jơ̆ng, yua kơ pơtao đe Aram đei pơrăm lu linh đe Isơrael păng juă bơhlơ̆r lu sư, nhen thoi teh rơpŭk tơ anih đe pơjuă 'ba.

⁸ Lu tơdrong hơ'mon gah Jêhôahas, tơdrong nai dôm tơdrong jang đêl sư pơm păng tơdrong nuih kơtang sư đe đei chih đĭ tơ lăm sơ̆p hla bơar hơ'mon gah lu pơtao đe Isơrael?

⁹ Jêhôahas lôch thoi tep hiôk hăm lu yă 'bok sư păng đe 'bŭ sư tơ Pơlei Samari. Jêhôas kon drŏ-nglo sư pơgơ̆r pơtrơp sư.

Jêhôas pơm pơtao đe Isơrael

¹⁰ Lăm sơnăm mă pêng-jĭt tơpơh, chăl Jôas, pơtao đe Juđa, na Jêhôas kon drŏ-nglo Jêhôahas, tŏk pơm pơtao đe Isơrael tơ Plei Samari păng sư pơgơ̆r mơjĭt-tơdrâu sơnăm.

¹¹ Sư kư̆m lei-lăi pơm kơnê̆ 'bơ̆t anăp Kră Yang, ưh kơ achăng lê̆ dôm tơdrong yoch Jêrôbôam, kon drŏ-nglo Nêbat hlôi pơm bơih kơ lu bơngai Isơrael pơm yoch, mă-lei sư oei nŏng kơ pơm kiơ̆ tơdrong yoch noh.

¹² Dôm lu tơdrong hơ'mon gah Jêhôas, tơdrong nai, dôm tơdrong jang đêl sư pơm, sư tơblah ayăt Amasia, pơtao đe Juđa, jei sư, đĭ-đăng tôm tơdrong sư đe đei chih tơ lăm sơ̆p hla bơar hơ'mon gah lu pơtao đe Isơrael?

¹³ Jêhôas lôch thoi tep hiôk hăm lu 'bok kơdră sư sơ̆, đơ̆ng noh Jêrôbôam pơgơ̆r pơtrơp đêl sư. Jêhôas đe 'bŭ sư tơ Pơlei Samari hơdai hăm lu pơtao đe Isơrael.

Êlisê lôch

¹⁴ Êlisê jĭ, yua kơ jĭ 'noh na sư lôch, Jêhôas, pơtao đe Isơrael năm lăng sư kơplah sư oei jĭ, nhơ̆m 'bơ̆t anăp sư păng khan: “Ơ 'bă inh ơi! Ơ 'bă inh ơi! Gre aseh păng linh hao aseh lu đe Isơrael ơi!”

¹⁵ Na Êlisê khan kơ sư: “Iŏk hră hăm 'brơ̆m bĕ” Jêhôas iŏk hĭ hră hăm 'brơ̆m.

¹⁶ Êlisê khan dơ̆ng kơ pơtao Isơrael: “Gŭt bĕ hră ih.” Na pơtao gŭt hĭ hră hloi. Đơ̆ng noh Êlisê dan ti sư kơpal ti pơtao ei,

¹⁷ na khan: “Pơih 'măng-'mŏk gah hơlĕch bĕ.” Na Jêhôas pơih hĭ 'măng. Êlisê khan: “Pơtao prah bĕ.” Na sư prah hloi. Kơplah ei Êlisê khan dơ̆ng: “'Noh bơih 'brơ̆m Kră Yang mă kĕ jei, 'brơ̆m mă ih blah lu bơngai Aram jei ih, lăm pơlei Aphek, dĭng ih pơrăm pơlôch lê̆ đĭ lu sư.

¹⁸ Êlisê khan dơ̆ng: “Iŏk minh hơchô̆ 'brơ̆m bĕ!” Na Jêhôas iŏk 'brơ̆m. Êlisê khan dơ̆ng: “Huăt bĕ 'brơ̆m tơ teh.” Jêhôas huăt tơ teh pêng wơ̆t, đơ̆ng noh pơdơh.

¹⁹ Êlisê bơngai mă Kră Yang 'Bok Kei-Dei yua noh hil kơ sư, khan kơ pơtao: “Dah ih huăt pơđăm tơdrâu wơ̆t, lei ih blah char Aram dĭng răm đĭ; mă-lei 'nâu ih gô blah lu bơngai char Aram lăp pêng wơ̆t đĕch.”

²⁰ Na Êlisê lôch, đe 'bŭ sư. Lăm char noh truh lăm sơnăm 'nao đei khŭl linh đe Môap ngăl mơ̆t wă blah dêh char sư.

²¹ Kơplah, đe năm 'bŭ minh 'nu bơngai lôch, 'bôh khŭl linh ei wă tơblah, na lu sư atat lê̆ atâu ei lăm bơsat Êlisê na kơdâu ôn. Lăp atâu bơngai lôch ei hơtŭt 'bơm kơting Êlisê, na bơngai lôch ei arih dơ̆ng păng gruih iung hloi.

²² Hasael, pơtao đe Aram pơgŏ pơđep lu đe Isơrael dĭng truh đĭ chăl Jêhôahas pơgơ̆r.

²³ Mă-lei Kră Yang mơnat tơgŭm wei-lăng lu sư yua kơ Sư pơkă bơih hăm Abraham, Isăk păng Jakôp. Kră Yang ưh kơ wă pơrăm lu sư, ưh kơ achăng lê̆ lu sư truh tơ dang ei.

²⁴ Lăp Hasael, pơtao đe Aram lôch. Ben Hadat, kon drŏ-nglo sư, pơgơ̆r pơtrơp đêl sư.

²⁵ Jêhôas kon drŏ-nglo Jêhôahas iŏk lê̆ dơ̆ng đơ̆ng Ben Hadat, kon drŏ-nglo Hasael, sư iŏk lê̆ lu pơlei mă Ben Hadat iŏk bơih đơ̆ng Jêhôahas, 'bă sư. Jêhôas blah Ben Hadat jei sư pêng wơ̆t păng iŏk lu pơlei lăm dêh char Isơrael đei kơ sư.