II Pot 12 - Sơ̆p Hlabơar Nơ̆r 'Bok Kei-Dei

Jôas pơgơ̆r char Juđa

¹ Sơnăm mă tơpơh, chăl Jêhu pơgơ̆r, Jôas tŏk pơm pơtao păng pơgơ̆r puăn-jĭt sơnăm lăm Pơlei Jêrusalem. Mĕ sư yă Sibia, Pơlei Bêrsêba.

² Jôas pơm 'lơ̆ng 'bơ̆t anăp Kră Yang đĭ chăl arih yua kơ 'bok soi Jêhôiada bơtho sư.

³ Mă-lei, sư ưh kơ hŭt lê̆ hnam kơkuh kơ yang pơm tơ anih kơjung, lu kon pơlei oei hơnơ̆ng kơ soi sơmah kơ yang păng soh tơ kơpal anih 'bâu phu kơjung noh.

Hơmet ming Hnam Akŭm Pơlei Jêrusalem

⁴ Jôas khan kơ lu 'bok soi: “Dôm jên tơmam 'lơ̆ng rơgoh đe juăt kơ ba 'măn tơ Hnam Akŭm kơkuh kơ Kră Yang, mă jên thuê̆ đêl hơgăt kơ rim kơ̆l kon bơngai mă jên đơ̆ng rim 'nu đei pơyơ̆r lăm năr akŭm kiơ̆ kơ jơhngơ̆m hiôk,

⁵ apinh lu 'bok soi, athei chă iŏk jên noh đơ̆ng lu bơngai mă pơyơ̆r, đơ̆ng noh yua jên ei hơmet ming hnam akŭm 'bơ̆t yơ mă pơchah tơphĕ.”

⁶ Mă-lei truh sơnăm mă 'bar-jĭt pêng, chăl Jôas pơgơ̆r, lu 'bok soi ưh kơ hơmet ming Hnam kư̆m dơ̆ng.

⁷ Na Jôas krao hloi 'bok soi Jêhôiada păng lu 'bok soi nai, na jet: “Liơ iĕm ưh kơ chă hơmet ming Hnam akŭm dơ̆ng? Đơ̆ng âu tơ anăp, 'nĕ pă chă iŏk jên đơ̆ng lu bơngai mă pơyơ̆r 'noh dơ̆ng, mă-lei athei lê̆ jên noh wă hơmet ming Hnam akŭm.”

⁸ Lu 'bok soi drơ̆ng ưh pă ra jên đơ̆ng kon pơlei bơih păng lu sư kư̆m drơ̆ng ưh pă drơ̆ng pŭ iŏk tơdrong jang wă hơmet ming Hnam akŭm bơih.

⁹ 'Bok soi Jêhôiada iŏk hloi minh pôm hom kuer bơlôh 'bơ̆t tơnglơ̆p sư, đơ̆ng noh dan 'bơ̆t jê̆ chơnang soi gah 'ma kơ 'măng mơ̆t lăm Hnam akŭm kơkuh kơ Kră Yang Lu 'bok soi wei 'măng Hnam akŭm, tah lê̆ đĭ-đăng jên mă đơ̆ng đe pơyơ̆r lăm Hnam akŭm kơkuh kơ Kră Yang, lăm hom ei ngăl.

¹⁰ Lăp 'bôh jên lăm hom ei lơ bơih, bơngai mă chih hla bơar lăm anih pơtao păng 'bok soi tơm năm iŏk, tơlĕch jên mă đei lăm hnam akŭm kơkuh kơ Kră Yang na jô̆ păng tah chô̆ hơmet lê̆ lăm 'bi.

¹¹ Đơ̆ng noh, bre sư jao jên mă đêl jô̆ bơih noh 'bơ̆t ti lu bơngai jang wei-lăng hiơ̆k bơngơ̆t gah tơdrong jang wă hơmet ming Hnam akŭm kơkuh kơ Kră Yang. Lu bơngai ei apah lu bơngai thơ̆ traih 'long păng thơ̆ man, thơ̆ teh tơmo,

¹² apah lu thơ̆ man păng thơ̆ teh tơmo, lăm tơdrong jang hơmet Hnam akŭm kơkuh kơ Kră Yang ngăl. Lu sư yua dơ̆ng jên ei răt 'long păng tơmo mă đe traih bơih wă hơmet ming Hnam akŭm kơkuh kơ Kră Yang păng yua jên răt tôm tơmam wă jang hơmet 'nei.

¹³ Mă-lei, đe ưh kơ yua jên mă pơyơ̆r ăn kơ Hnam akŭm kơkuh kơ Kră Yang noh na răt tơmam yua lăm hnam akŭm thoi pơnhan hu, kơthao dah săng kăt brai ŭnh kơđeng, tơgiĕp, dah tơmam nai, pơm hăm maih dah hăm hu tah yua lăm hnam akŭm,

¹⁴ yua kơ đe ăn jên ei kơ lu bơngai jang tơdrong wă hơmet ming hnam akŭm kơkuh kơ Kră Yang đĕch.

¹⁵ Lu bơngai mă chĕp jên chă asong lu đe thơ̆ jang noh, đe ưh kơ athei sư chih jô̆ lăng yua kơ lu đe ei jang tơpăt tơnăp ngăl.

¹⁶ Jên gah tơmam soi huai iŏk tơdrong glăi, păng jên gah tơmam soi huai iŏk tơdrong yoch, đe ưh kơ chĕp tah tơmơ̆t lăm hnam akŭm kơkuh kơ Kră Yang; jên ei 'măn kơ 'bok soi.

¹⁷ Hơtai noh, Hasael pơtao đe Aram năm blah tơgar iŏk teh Pơlei Gat đơ̆ng noh sư kư̆m chĕp linh wă blah tơgar Pơlei Jêrusalem hai dơ̆ng.

¹⁸ Jôas, pơtao đe Juđa, iŏk đĭ dôm tơmam 'lơ̆ng rơgoh lu 'bok kơdră sư sơ̆ 'bok Jêhôsaphat, Jêhôram, păng Ahasia, lu sư noh pơtao đe Juđa, tơmam noh lu sư hlôi 'măn lê̆ 'lơ̆ng rơgoh, Jôas kư̆m iŏk tơmam 'lơ̆ng rơgoh sư kơdih păng iŏk đĭ maih lăm hnam mong tơmam lăm hnam akŭm kơkuh kơ Kră Yang păng đơ̆ng hnam pơtao, na pơyơ̆r ăn kơ Hasael pơtao đe Aram, yua kơ tơdrong noh, na Hasael chu weh đơ̆ng Pơlei Jêrusalem.

Jôas lôch

¹⁹ Dôm lu tơdrong hơ'mon gah Jôas, tơdrong hơ'mon nai dơ̆ng păng dôm lu tơdrong jang đêl sư pơm, đei chih đĭ bơih lăm sơ̆p hla bơar hơ'mon gah lu pơtao đe Juđa.

²⁰ Lu đĭch đam Jôas iung blơ̆ lê̆ sư, pơlôch sư tơ Bet Milô, 'bơ̆t trong jur tơ Pơlei Sila.

²¹ Jôsaka, kon drŏ-nglo Simêat păng Jêhôsabat, kon drŏ-nglo Sômer, bre sư noh đĭch đam Jôas, bre sư pơlôch Jôas. Đe 'bŭ sư hơdai hăm lu 'bok kơdră sư tơ Pơlei Đawit; đơ̆ng noh Amasia, kon drŏ-nglo sư pơtrơp pơgơ̆r tơplih sư.