II Pet 3 - Sơ̆p Hlabơar Nơ̆r 'Bok Kei-Dei

¹ Ơ lu 'nhŏng oh mă inh 'mêm kơeng, kơthơ âu, kơthơ mă 'bar inh chih hơpong kơ iĕm. Inh chih 'bar 'măng kơ âu ưh kơ đei chih tơdrong nai ôh; inh chih tă tơ'blŏk kơ iĕm tơdrong 'Bok Kei-Dei ngăl, wă pơlung iĕm wă kơ iĕm pơm đon 'lơ̆ng tơpăt.

² Inh wă kơ iĕm 'blŏk hơdơ̆r kơ dôm tơdrong lu bơngai pơtruh nơ̆r 'Bok Kei-Dei lu sư khan lê̆ hơdrol sơ̆. Păng inh wă kơ iĕm 'blŏk hơdơ̆r kơ tơdrong Yêsu Krist pơkă kơ lu jơ̆ng 'bang Sư na lu sư bơtho tơbăt kơ iĕm dơ̆ng, yua kơ Yêsu Krist boih Kră Yang bơ̆n kư̆m 'Bok Dŏng Pơklaih bơ̆n mơ̆n.

³ Mă loi inh wă tơbăt kơ iĕm gah tơdrong âu: Năr wă jê̆ tôch kơnh đei lơ bơngai 'maih kiơ̆ tơdrong jơhngơ̆m wă kơdih, 'maih pơm lơ tơdrong kiơ̆ mă ưh kơ 'lơ̆ng. Lu sư pơma pơjăm pơma che bơle lu bơngai lui khan:

⁴ “Lu sư kơtơ̆ng Yêsu khan wă jur dơ̆ng mă-lei tơ yơ 'bôh? Lu yă 'bok bơ̆n lôch đĭ-đăng boih, mă-lei tôm tơdrong oei hơnơ̆ng lei-lăi thoi plĕnh teh 'nao pơjing sơ̆ đĕch.”

⁵ Lu sư pơma thoi noh yua kơ lu sư ưh kơ tơchĕng kơ tơdrong 'Bok Kei-Dei pơrăm teh đak sơ̆. Sơ̆ 'Bok Kei-Dei sơkat athei đei plĕnh teh, đei hloi tơpă. Sư sơkat athei đak pơjing teh, teh lĕch đơ̆ng đak tơpă.

⁶ Sơ̆ Sư wă pơrăm teh, ăn đak lơ̆p jơ̆p-jang, teh jing răm hloi tơpă.

⁷ Mă dang ei Sư kư̆m pơkă khan wă pơrăm plĕnh pơrăm teh đak wă soh păng ŭnh. Truh năr Sư sek tơlang ning-mônh Sư pơrăm tơpă mơ̆n păng phak dôm lu bơngai mă ưh kơ lui kơ Sư lăm noh.

⁸ Ơ lu 'nhŏng oh mă inh 'mêm kơeng, iĕm 'nĕ hiơt kơ tơdrong âu hŏ: Yua kơ 'Bok Kei-Dei Sư Yang, Sư lăng minh năr dang minh-rơbâu sơnăm, minh-rơbâu sơnăm dang lĕ kơ minh năr đĕch. Bơ̆n tơchĕng Sư gô đunh mă Sư lăng ưh kơ đunh ôh.

⁹ Sư ưh kơ wă pơđunh ôh kơ tơdrong Sư pơkă khan wă ăn Yêsu Krist jur, thoi lu bơngai che bơle noh khan. Sư oei mơnat ră kơ kon bơngai bơ̆n, Sư ưh kơ wă kơ minh 'nu bơngai hiong lăm tơdrong Sư phak ră. Thoi noh na Sư oei gô wă kơ đĭ-đăng bơngai tơbral kơdih tơdrong yoch.

¹⁰ Gah tơdrong Kră Yang Yêsu Krist wă jur, Sư wă jur tơpă, mă Sư wă jur thoi bơngai tơtông ưh kơ ăn đe băt. Kơplah noh kơnh plĕnh gô đôh hiong đĭ minh 'măng, re jơwa dêh, pă băt dang yơ. Ŭnh gô sa kơngla kơdơ̆r jơ̆p teh, teh jing hiong pă 'bôh kiơ. Lu sơnglŏng, khei păng đĭ dôm tơmam ala teh kư̆m lek hiong lei-lăi.

¹¹ Bơ̆n băt boih đĭ dôm tơmam gô hiong răm thoi noh tơpă, na mă dôm tơdrong kiơ bơ̆n athei adrin pơm đon 'lơ̆ng tơpăt 'biơ̆

¹² kơplah bơ̆n oei chang gô Sư wă pơrăm jơ̆p teh đak ei. Bơ̆n athei kiơ̆ tơdrong Sư mă tơpă, na tơdrong ei dah truh. Năr ei boih, năr 'Bok Kei-Dei wă pơrăm tih ăn ŭnh sa kơngla kơdơ̆r, plĕnh gô lek hiong đĭ, lu sơnglŏng, khei kư̆m hiong hiach pă 'bôh kiơ.

¹³ Mă-lei gah bơ̆n, kiơ̆ kơ nơ̆r 'Bok Kei-Dei kơdih khan, Sư wă pơjing dơ̆ng plĕnh teh 'nao ăn kơ lu bơngai mă 'lơ̆ng tơpăt đĕch oei tơ noh. Tơdrong noh boih, tơdrong mă bơ̆n hưch hanh oei chang gô dang ei.

¹⁴ Ơ 'nhŏng oh mă inh 'mêm kơeng, kơlih kơ thoi noh na kơplah bơ̆n oei chang gô năr noh, bơ̆n athei adrin pơm 'lơ̆ng ling-lang hŏ, wă kơ Sư 'bôh tơdrong iĕm adrin păng 'bôh tơdrong iĕm pơm 'lơ̆ng huay kơ đei tơdrong yoch, oei hiôk dih băl kư̆m dang oei hiôk hăm Sư mơ̆n.

¹⁵ Iĕm 'nĕ pơma kơ tơdrong Sư ưh kơ dah jur, yua kơ Sư mơnat kơ kon tơring tơrang lu tam mă lui, wă kơ lu sư lui thoi iĕm 'mơ̆i, na 'Bok Kei-Dei pơklaih tơdrong yoch lu sư, thoi Sư pơklaih iĕm boih. Pôl, 'nhŏng oh bơ̆n mă bơ̆n 'mêm, 'Bok Kei-Dei ăn kơ sư hơgei gah tơdrong bơtho, sư chih roi kơ iĕm kư̆m lei-lăi thoi noh mơ̆n.

¹⁶ Dôm kơthơ sư chih sư kư̆m pơma gah tơdrong noh mơ̆n. Dôm tơdrong sư bơtho trŏ tơpă, 'bơ̆t phŏ kư̆m anat kơ hlôh. Lu bơngai kơtul, hăm bơngai lui rơdu, sư tơblang chroih tơ nai hloi. Mă dôm nơ̆r pơma lăm hla bơar 'Bok Kei-Dei nai, lu sư kư̆m ưh kơ gơh tơblang. Lu sư pơm thoi noh wă pơrăm akâu kơdih đĕch.

¹⁷ Ơ lu 'nhŏng oh, tơdrong noh inh roi kơ iĕm boih, na iĕm athei kơchăng hli kơ iĕm lui kơ 'bơ̆r đon lu bơngai kư̆ kă, jing hiong kơ tơdrong lui iĕm đơ̆ng lui kơjăp boih.

¹⁸ Inh roi lê̆ kơ iĕm thoi noh wă kơ iĕm gơnang kơ Kră Yang bơ̆n Yêsu Krist mă dŏng pơklaih bơ̆n. Thoi noh na tơdrong lui iĕm rai đunh rai wơ̆ kơjăp. Păng inh wă kơ iĕm rai đunh rai hlôh wao tôm tơdrong Sư. Bĕ bôl jơ̆p teh ư-ang Sư đơ̆ng dang ei truh ning-mônh ưh kơ layơ tôch. A-men.