II Pet 2 - Sơ̆p Hlabơar Nơ̆r 'Bok Kei-Dei

¹ Kơplah noh sơ̆ đei lu bơngai mơ'nah hơlĕnh pơdăr khan sư bơngai pơtruh nơ̆r 'Bok Kei-Dei. Na đei 'bok bơtho lu iĕm mơ'nah dang ei kư̆m lei-lăi, lu sư mơ̆t chur tơ tŏk-bŏk lu iĕm pơm chă bơtho pơjing kơdih khan tơdrong 'Bok Kei-Dei. Tơdrong lu sư chă bơtho noh wă pơrăm lu bơngai lui đĕch păng lu sư sơngah kơ Yŏng bơ̆n Yêsu Krist tơ'ngla mă huai iŏk lu sư tăm. Lu sư pơm thoi noh, 'Bok Kei-Dei Sư ưh kơ anat ôh, Sư gô phak hloi tơpă.

² Mă-lei kư̆m đei lơ bơngai lui, kiơ̆ sư pơm tơdrong yoch kư̆ kă; kơlih kơ thoi noh na lu bơngai mă ưh kơ lui pơjăm tơdrong 'lơ̆ng tơpăt 'Bok Kei-Dei.

³ Yua kơ lu sư bơngai ham dêh, na lu sư kư̆m hơlĕnh pơdăr kơ iĕm, wă kơ đei sa jên tơmam iĕm. Mă đơ̆ng sơ̆ 'Bok Kei-Dei phak lu bơngai thoi noh ngăl, na lu bơngai noh kơnh 'Bok Kei-Dei kư̆m phak mơ̆n, ưh kơ lê̆ ôh.

⁴ Sơ̆ lu linh jang 'Bok Kei-Dei pơm yoch, 'Bok Kei-Dei kư̆m ưh kơ 'mêm ôh, Sư iŏk tơhuŏng hloi tơ anih măng mu, phak sư tơ noh truh tơ năr Sư wă sek tơlang ning-mônh.

⁵ Chăl Nôê sơ̆, 'Bok Kei-Dei kư̆m phak đĭ-đăng kon bơngai ala teh ưh kơ lui kơ Sư, Sư phak hăm đak lơ̆p jơ̆p-jang kơ teh. Sư pơklaih pôm Nôê, yua kơ Nôê sư bơtho khan gah tơdrong tơpăt păng tơpơh 'nu hnam dơnŏ sư.

⁶ Sư kư̆m phak Pơlei Sôđôm hăm Pơlei Gômôrơ, soh rông chhông hnam lu sư. Sư pơm thoi noh wă tơ'bôh kơ lu bơngai pơm kơnê̆, wă tơbăt kơ lu sư 'Bok Kei-Dei kư̆m gô phak lu sư thoi noh tơpă.

⁷ Pơlei noh 'Bok Kei-Dei pơklaih pôm 'bok Lot, yua kơ 'bok Lot bơngai 'lơ̆ng tơpăt; 'bok Lot 'bôh kon pơlei pơla pơm kơnê̆ kư̆ kă, sư sơ'ngon dêh.

⁸ Sư oei hăm lu kon pơlei noh sơ̆, sư 'bôh dôm tơdrong kơnê̆ lu kon pơlei noh pơm păng kơtơ̆ng dôm 'bơ̆r pơma lu sư kơnê̆ ling-lang, dang lĕ pơjĭ đon sư, yua kơ sư bơngai đon tơpăt.

⁹ Thoi noh bơ̆n băt nhên boih, 'Bok Kei-Dei băt, gơh pơklaih dôm lu bơngai kơkuh kơ Sư đơ̆ng tơdrong pơmat-tat; păng bơ̆n kư̆m băt Sư oei phak dôm lu bơngai pơm kơnê̆, truh tơ năr Sư wă sek tơlang ning-mônh.

¹⁰ Mă loi lu bơngai mă hưch hanh kơ pơm tơdrong kơnê̆ kư̆ kă, lu sư ưh kơ băt chu yom kơ yŏng tơ'ngla kơdih, lu bơngai noh Sư hil dêh. Lu 'bok bơtho mơ'nah lu sư juăt kơ pơm thoi noh. Lu sư pơma kư̆ kă ưh kơ băt hli kơ đe păng ưh kơ băt mơlâu kơ đe. Lu sư kư̆m ưh kơ hli kơ pơma kơnê̆ kơ lu linh jang mơ̆n.

¹¹ Lu linh jang pran hloh tih hloh, mă-lei lu linh jang ưh kơ pơ̆n kơ pơma kơnê̆ kơ lu bôl sư mă pơm yoch ôh kơplah sư roi kơ 'Bok Kei-Dei. Mă-lei lu bơngai noh ưh kơ băt kơ hli, lu sư pơma kơnê̆ hloi kơ lu linh jang.

¹² Lu bơngai noh, lu sư thoi sem brem mă ưh kơ gơh tơchĕng, sư hơ̆r kơ wă pơm kiơ sư pơm hloi. Mĕ 'bă sem brem noh pơjing sư sơ̆ lăp pơjing ăn kơ đe rôp 'buh sa đĕch. Lu bơngai mă pơma kơnê̆ kơ đe kư̆m thoi noh, lu sư ưh kơ hlôh na lu sư gô răm thoi sem brem noh tơpă.

¹³ 'Bok Kei-Dei wă phak lu sư tơpă, yua kơ lu sư pơm kơnê̆ dang ei. Lu sư lăp đon kơ tơdrong ngôi kư̆ kă kơ'năr kư̆m bưh ưh kơ băt mơlâu kơ đe. Năr iĕm sŏng sa tih, lu sư kư̆m năm sŏng sa hơdai iĕm. Mă-lei lu sư sa dư dêh, wă kơ mă hrăp kơ hơlŏng klak kơdih, ưh kơ băt kơ mơlâu kơ bôl buăl. Lu sư pơm tơdrong noh kơplah iĕm akŭm băl tơdrong 'lơ̆ng, thoi lĕ kơ ao 'nao mă sư mơgrĭ.

¹⁴ Măt lu sư nŏng kơ chă lăng 'maih pơm tơdrong kư̆ kă. Tơdrong lu sư pơm kư̆ kă ưh kơ yĕng kơ hrăp, nŏng kơ chă pơlung lu bơngai lui rơdu kiơ̆ lu sư pơm yoch păng pơhlŭ pơlung đe, wă kơ đe ăn kơ sư jên dah tơmam. Lu sư ling-lang pơhrăm tơdrong 'noh; lu sư jing bơngai 'Bok Kei-Dei wă phak.

¹⁵ Lu sư lê̆ trong tơpăt, jing hơwơ̆l rok kiơ̆ trong 'Balam kon Bêhôr. 'Balam ham kơ jên dêh, na sư pơm tơdrong ưh kơ 'lơ̆ng.

¹⁶ Mă-lei đei nơ̆r pơma pơgăn tơdrong sư wă pơm. Aseh iĕ sư kon sem brem mă gơh pơma nơ̆r kon bơngai, pơma khă tơdrong sư wă pơm dang lĕ kơ tơdrong bơngai wơnh.

¹⁷ Lu bơngai noh dang ei jing ưh kơ yua, thoi lĕ kơ đak ưh pă ro đơ̆ng tu sư boih; lu sư thoi hơmơ̆l păr tơ rơwơ̆ng kial dơhlu jơ̆p-jang. Thoi noh 'Bok Kei-Dei wă phak lu sư, ăn kơ lu sư oei tơ anih măng mu, yua kơ lu sư jing bơngai ưh pă yua boih.

¹⁸ Lu sư nŏng kơ chă pơlung đe, 'bơ̆r lu sư pơma pơrŏ pơlung lu bơngai 'nao lui, 'nao achăng lê̆ buăl sư pơm yoch, jing kiơ̆ thoi lu bơngai pơlung noh, pơm kư̆ kă thoi đêl dơ̆ng.

¹⁹ 'Bok bơtho hơlĕnh pơdăr noh, lu sư khan wă ăn kơ lu bơngai noh rơngei, mă-lei tă kơ lu sư dơ̆ng jing đĭch, yua kơ lu sư ưh kơ kĕ gơ̆t kơ tơdrong pơm yoch, jing wă pơrăm akâu kơdih. Tơdrong kiơ bơ̆n ưh kơ kĕ pơgơ̆t, tơdrong noh bơ̆n oei đĭch.

²⁰ Bu lui kơ Kră Yang bơ̆n Yêsu Krist, 'Bok mă ăn kơ bơ̆n rơngei klaih boih đơ̆ng tơdrong đĭch ưh pă pơm thoi lu bơngai tơ ala teh, mă sư wih kiơ̆ dơ̆ng tơdrong pơm yoch, jing ưh pă kĕ lê̆, bơngai noh jing kơnê̆ hloh kơ sư tam mă lui sơ̆.

²¹ Dah sư ưh tam kơtơ̆ng đe bơtho tơdrong 'Bok Kei-Dei, noh pha. 'Nâu sư băt boih mă sư achăng lê̆ tơdrong 'lơ̆ng tơpăt 'Bok Kei-Dei.

²² Tơdrong lu sư pơm âu boih trŏ thoi tơdrong đe khan: “Kŏ hăk lê̆ boih mă luăn sa kơdih dơ̆ng; nhŭng akâu rơgoh mă năm pung trôk.”