II Pet 1 - Sơ̆p Hlabơar Nơ̆r 'Bok Kei-Dei

Pơih nơ̆r pơma

¹ Inh Simôn Pêtrôs, bơngai đĭch đam Yêsu Krist, kư̆m pơm jơ̆ng 'bang Sư mơ̆n. Inh chih hơpong kơ lu bơngai mă 'Bok Kei-Dei hăm 'Bok Dŏng Pơklaih bơ̆n Yêsu Krist krao lui kơ Sư thoi nhôn, yua kơ Sư pơm tơpăt kơ đĭ-đăng.

² Inh apinh 'Bok Kei-Dei wei-lăng iĕm hiôk-hian wă kơ iĕm lui rai kơjăp, yua kơ iĕm băt kơnăl kơ Sư, hăm băt kơnăl kơ Kră Yang bơ̆n Yêsu Krist.

Wă kơ tơdrong lui rai wơ̆ athei pơm thoi tơ ala âu

³ Yua kơ Sư Yang, Sư mơsêh tơpă, na Sư ăn kơ bơ̆n tôm tơdrong gơh arih, gơh pơm 'lơ̆ng tơpăt thoi Sư. 'Noh yua kơ Sư krao, na bơ̆n băt kơ Sư. Bơ̆n 'bôh Sư mơsêh păng 'lơ̆ng tơpăt na bơ̆n băt kơ kiơ̆ Sư.

⁴ Yua kơ Sư Yang, Sư mơsêh, Sư 'lơ̆ng tơpăt, Sư pơkă wă tơgŭm bơ̆n tih tơpă. Na Sư pơklaih bơ̆n đơ̆ng dôm tơdrong kơnê̆ 'mê̆-'mach tơ ala teh âu, tơdrong mă kon bơngai 'maih pơm, wă kơ bơ̆n jing kon Sư kư̆m 'lơ̆ng tơpăt thoi Sư.

⁵ Yua kơ thoi noh na dang ei iĕm lui kơ Yêsu Krist boih, iĕm athei adrin pơm 'lơ̆ng, pơm tơpăt păng pơhrăm iŏk dôm tơdrong 'Bok Kei-Dei.

⁶ Dah iĕm pơhrăm iŏk boih, iĕm gô đei tơdrong pơgơ̆t, đơ̆ng tơdrong pơgơ̆t iĕm gô đei jơhngơ̆m chơ̆n. Dah jơhngơ̆m iĕm chơ̆n tơpă, noh iĕm gơh pơm kiơ̆ dôm tơdrong 'Bok Kei-Dei boih.

⁷ Dah iĕm pơm kiơ̆ dôm tơdrong 'Bok Kei-Dei, iĕm gô đei đon 'mêm kơ bôl buăl bơngai lui, đơ̆ng noh na iĕm jing 'mêm kơ đĭ-đăng bơngai.

⁸ Dah iĕm adrin pơm kiơ̆ dôm tơdrong noh tơpă, iĕm gô hlôh tơpă dôm tơdrong Kră Yang bơ̆n Yêsu Krist. 'Noh iĕm jing bơngai yua kơ tơdrong jang Sư boih.

⁹ Mă-lei bu ưh kơ pơm kiơ̆ dôm tơdrong noh, bơngai noh sư thoi bơngai măt bơbul, ưh kơ 'bôh hơdah; păng sư thoi bơngai hiơt kơ 'Bok Kei-Dei dŏng pơklaih bơ̆n đơ̆ng tơdrong yoch.

¹⁰ Ơ 'nhŏng oh, 'Bok Kei-Dei krao bơ̆n lui kơ Sư boih, na bơ̆n athei adrin lui mă kơjăp bĕ, na Sư gô iŏk bơ̆n tơpă. Dah bơ̆n adrin lui kiơ̆ thoi noh tơpă, bơ̆n huay kơ achăng lê̆ Sư ôh.

¹¹ Thoi noh na 'Bok Kei-Dei pơchoh kơ bơ̆n trong să, ăn kơ bơ̆n tŏk oei tơ dêh char Yêsu Krist pơgơ̆r ling-lang hloi, yua kơ Yŏng bơ̆n Yêsu Krist dŏng pơklaih bơ̆n.

¹² Dôm tơdrong noh iĕm kơtơ̆ng đơ̆ng đe bơtho, iĕm lui kơjăp đơ̆ng sơ̆ ră boih, mă-lei inh oei wă tơ'blŏk kơ iĕm khŏm khŏm.

¹³ Inh arih tơ ala teh âu dang yơ, inh bơtho tơ'blŏk kơ iĕm dang noh,

¹⁴ yua kơ tơdrong arih inh ưh pă đunh boih kiơ̆ thoi Yêsu Krist akhan kơ inh.

¹⁵ Thoi noh na inh adrin chih kơ iĕm, wă kơ iĕm đei hla bơar tơdrong inh bơtho, hli thĕng kơ inh lôch, iĕm oei đei hla bơar tơdrong inh bơtho, na iĕm huay kơ hiơt.

Nhôn 'bôh Yêsu Sư mơsêh mơyang

¹⁶ Nhôn roi kơ iĕm tơdrong Kră Yang Yêsu Krist Sư mơsêh mơyang đơ̆ng sơ̆ 'mơ̆i păng tơdrong Sư wă jur tơ teh ning-mônh; ưh kơ sĭ nhôn chă pơjing kơdih thoi lu bơngai 'bơ̆r đon hơgei chă pơjing, ưh ôh. Nhôn 'bôh Sư mơsêh mơyang, Sư 'lơ̆ng rŏ tơpă, na nhôn gơh roi kơ lu iĕm thoi noh.

^17-18 Kơplah nhôn oei hơdai hăm Sư kơpal kông sơ̆, 'Bă Sư mơsêh mơyang pơma đơ̆ng plĕnh khan: “Sư âu Kon Inh mă 'mêm kơeng tơpă, Inh lăp đon kơ Sư dêh.” Nhôn kơtơ̆ng nơ̆r pơma ư-ang kơ Kon Sư thoi noh tơpă păng nhôn 'bôh 'Bă Sư ăn kơ Sư mơsêh 'lơ̆ng rŏ na nhôn roi kơ iĕm.

¹⁹ Mă ưh kơ sĭ kơtơ̆ng kơdrô̆ tơdrong 'noh đĕch ôh, bơ̆n kư̆m kơtơ̆ng dôm tơdrong lu bơngai pơtruh nơ̆r 'Bok Kei-Dei khan lê̆ hơdrol sơ̆ mơ̆n. Sư kư̆m roi gah tơdrong 'Bok Krist mơsêh mơyang wă pơgơ̆r ning-mônh, na dang ei bơ̆n băt nhên tơpă boih. Iĕm athei 'blŏk hơdơ̆r kơ tơdrong lu sư khan lê̆ hơdrol noh ling-lang, yua kơ tơdrong noh thoi lĕ kơ ŭnh pơchrang hơdah prăt măng truh tơ pơgê, na sơnglŏng wŏng-tar tơ pơgê gô pơchrang lăm jơhngơ̆m đon iĕm.

²⁰ Tơdrong âu kăl tơpă: Dôm tơdrong lu 'bok noh khan lê̆ hơdrol lăm sơ̆p hla bơar 'Bok Kei-Dei, lu sư ưh kơ đei pơma kiơ̆ kơ akâu sư kơdih ôh.

²¹ Yua kơ dôm tơdrong lu sư khan lê̆ hơdrol noh, ưh kơ đei lĕch đơ̆ng kon bơngai ôh. 'Bok Kei-Dei yua 'bơ̆r kon bơngai đĕch na bơ̆n lăng thoi 'bơ̆r kon bơngai. Mă tơpă đơ̆ng Yang Bơhngol 'Lơ̆ng bơtho tơbăt kơ lu sư.