II Kor 9 - Sơ̆p Hlabơar Nơ̆r 'Bok Kei-Dei

¹ Gah tơdrong ra jên wă tơgŭm lu bơngai lui dơnuh, inh ưh kơ kăl kơ chih roi dơ̆ng boih,

² yua kơ inh băt kơ iĕm 'maih tơgŭm bôl tơpă. 'Noh na inh roi pơang tơdrong lu iĕm mă oei tơ dêh Grĕk kơ lu bơngai lui tơ dêh Masêđôn, tơdrong iĕm 'maih tơgŭm lu đe noh đơ̆ng sơnăm sơ̆ boih. Lu sư 'bôh iĕm chơgăm, lu sư kư̆m 'maih mơ̆n.

³ Tơdrong inh wơh lu 'nhŏng oh bơ̆n năm tơgŭm iĕm âu, inh hli kơ iĕm jor kơ ra jên tơmam yua kơ đêl inh chă roi tơbăt kơ đe boih, thoi noh na inh wơh lu sư rai pơjing tơdrong âu đei hơdrol, thoi inh roi boih kơ lu bơngai oei tơ dêh Masêđôn.

⁴ Hli kơ đei lu bơngai đơ̆ng dêh Masêđôn kiơ̆ inh năm tơ iĕm, na 'bôh iĕm tơra ưh tam mă tôm, inh mơlâu, yua kơ đêl inh roi tơbăt kơ lu sư boih; mă iĕm kư̆m mơlâu kơ lu sư hloh loi kơ inh mơ̆n.

⁵ Thoi noh na inh wơh lu 'nhŏng oh bơ̆n âu năm hơdrol, wă kơ lu sư tơgŭm iĕm rai hơmet ra lê̆ dôm tơdrong noh hơdrol. Ưh kơ sĭ nhôn pơgŏ iĕm ôh, kiơ̆ kơ iĕm đêl pơkă đơ̆ng sơnăm sơ̆ boih. 'Noh na lăp nhôn truh tơ iĕm, iĕm đei tôm boih.

⁶ Iĕm 'nĕ hiơt kơ tơdrong âu: Bơngai bu rei tŏ sĕt gô kĕch tŏ sĕt; bơngai bu rei lơ, sư gô kĕch lơ.

⁷ Rim 'nu athei ăn kiơ̆ kơ đon sư 'maih kơdih, ăn athei ăn kiơ̆ kơ jơhngơ̆m mă hiôk, 'nĕ kơ ăn thoi đe pơgŏ, yua kơ 'Bok Kei-Dei 'mêm kơ lu bơngai mă ăn hiôk kơ jơhngơ̆m.

⁸ 'Bok Kei-Dei gô ăn kơ iĕm tơmam rơkah rơkai, wă kơ iĕm đei tôm tơmam ling-lang păng wă kơ iĕm chă tơgŭm đe nai dơ̆ng.

⁹ 'Noh kư̆m thoi đe chih roi tơdrong bơngai lui kơjăp lăm hla bơar 'Bok Kei-Dei thoi âu: “Sư asong tơmam sư kơ lu bơngai dơnuh hin, sư pơm 'lơ̆ng tơgŭm đe ling-lang.”

¹⁰ 'Bok Kei-Dei ăn kơ bơngai rei, găr adrĕch păng tơmam sa, sư kư̆m ăn tôm kơ găr adrĕch mă iĕm rei đei plei trem yua kơ iĕm bơngai 'lơ̆ng băt kơ tơgŭm đe.

¹¹ Sư ăn kơ iĕm gô jing mơdrŏng đei tôm tơdrong tơmam, wă kơ iĕm gơh tơgŭm đe ling-lang, thoi noh na nhôn gô roi kơ đe tơdrong iĕm hơlăng, na đe gô bơnê kơ 'Bok Kei-Dei.

¹² Iĕm hơlăng kơ đe jên tơmam, ưh kơ sĭ yua kơ sư jơ̆l đĕch ôh, iĕm kư̆m dang tơgŭm sư bơnê kơ 'Bok Kei-Dei.

¹³ Lu sư gô 'bôh tơdrong iĕm tơgŭm lu sư, na lu sư gô bơnê kơ 'Bok Kei-Dei ăn kơ iĕm lui kơ Yêsu Krist kơjăp băt chu kơ Sư. Lu sư gô ư-ang 'Bok Kei-Dei tơdrong iĕm hơlăng kơ lu sư hăm đe nai tơmam.

¹⁴ Lu sư gô krao khan kơ 'Bok Kei-Dei tơgŭm iĕm păng lu sư 'mêm kơ iĕm tơpă, yua kơ lu sư 'bôh tơdrong 'lơ̆ng 'Bok Kei-Dei ăn kơ iĕm.

¹⁵ Bơnê kơ 'Bok Kei-Dei ăn kơ bơ̆n tơdrong hiôk ưh kơ băt dang yơ wơh Kon Sư kơdih lôch tang bơ̆n.