II Kor 7 - Sơ̆p Hlabơar Nơ̆r 'Bok Kei-Dei

¹ Ơ lu 'nhŏng oh mă inh 'mêm kơeng, yua kơ 'Bok Kei-Dei wă ăn kơ bơ̆n jing kon Sư thoi noh boih, na bơ̆n athei tŭk lê̆ đĭ dôm tơdrong kơnê̆ 'mê̆-'mach đơ̆ng akâu bơ̆n juăt kơ pơm, hăm đơ̆ng jơhngơ̆m đon bơ̆n tơchĕng kơnê̆; bơ̆n athei adrin pơm mă tơpăt lăm tôm tơdrong, yua kơ bơ̆n băt hli kơ 'Bok Kei-Dei.

Pôl hiôk yua kơ sư kơtơ̆ng tơdrong đe Kôrintô đơ̆ng Tĭt

² Nhôn kư̆m wă kơ iĕm 'mêm kơ nhôn, yua kơ nhôn ưh kơ đei pơm kơnê̆ kơ bu ôh, ưh kơ đei pơrăm pơyoch bu ôh, ưh kơ đei hơlĕnh pơdăr sa tơmam bu ôh.

³ Inh pơma thoi noh ưh kơ sĭ inh hil lach kơ iĕm ôh, inh 'mêm kơ iĕm tơpă. Kư̆m thoi inh chih khan kơ iĕm hơdrol boih, iĕm minh jơhngơ̆m minh đon hăm inh, mă lôch mă arih bơ̆n hơdai.

⁴ Inh lui kơ iĕm gô pơm trŏ tôm tơdrong ling-lang, inh kư̆m roi pơang tơdrong iĕm kơ đe. Jơhngơ̆m inh hiôk dêh yua kơ inh kơtơ̆ng ang tơdrong iĕm boih; mă khan nhôn đei tơdrong truh pơmat-tat dang âu dang noh, nhôn ưh pă sơ'ngon tơdrong kiơ boih.

⁵ Âu roi gah tơdrong nhôn truh tơ dêh Masêđôn, nhôn truh tơ noh kư̆m ưh kơ đei hiôk kơ jơhngơ̆m tŏ sĕt, oei tơ noh lĕ pơmat hloh loi; jơhngơ̆m đon nhôn oei sa 'nhŏ kơ sơđơ̆ng 'biơ̆. Đon nhôn kư̆m tơchĕng hli kơ iĕm lui ưh kơ kơjăp.

⁶ Mă-lei 'Bok Kei-Dei gơh hơmet ming jơhngơ̆m lu bơngai sơ'ngon jing hiôk, thoi noh na Sư jah ăn Tĭt truh tơ nhôn, chhơp boih.

⁷ Ưh kơ sĭ nhôn hiôk yua kơ Tĭt truh tơ nhôn đĕch ôh. Nhôn hiôk yua kơ sư roi kơ nhôn tơdrong iĕm pơma dơnuh hăm sư hiôk hơiă chang nhôn dah truh tơ iĕm dơ̆ng. Inh kơtơ̆ng iĕm sơ'ngon yua kơ tơdrong iĕm pơm yoch, 'maih kiơ̆ tơdrong inh bơtho noh, inh hiôk rai dêh.

⁸ Kơthơ inh chih kơ iĕm hơdrol ki inh kư̆m hmach kơ chih 'biơ̆ mơ̆n, pơm kơ iĕm sơ'ngon; mă-lei inh tơchĕng dơ̆ng đơ̆ng rŏng huay kơ hmach ôh, tơdrong sơ'ngon pơm kơ iĕm minh yuh đĕch.

⁹ Mă inh hiôk ưh kơ sĭ yua kơ kơthơ noh pơm kơ iĕm sơ'ngon ôh; inh hiôk yua kơ iĕm tơbral kơdih tơdrong yoch. 'Bok Kei-Dei ăn kơ iĕm băt kơ sơ'ngon thoi noh, nhôn ưh kơ đei pơm kơ iĕm sơ'ngon minh tơdrong kiơ.

¹⁰ Tơdrong sơ'ngon yua kơ bơ̆n băt kơ 'Bok Kei-Dei, na 'Bok Kei-Dei pơm kơ bơ̆n tơbral kơdih tơdrong yoch huay kơ sơ'ngon; mă-lei dah bơ̆n sơ'ngon kơ tơdrong ala teh, bơ̆n gô hiong răm đĕch ưh kơ yua kiơ kơ bơ̆n.

¹¹ 'Bok Kei-Dei pơm kơ iĕm băt kơ sơ'ngon akâu kơdih, wă kơ iĕm hưch hanh pơm tơdrong 'lơ̆ng tơdrong tơpăt; tơdrong akâu kơdih đêl pơm, wă kơ tơbral hli huay pă pơm dơ̆ng; dang ei iĕm hăt kơ pơm tơdrong tơpăt, iĕm dang phak boih bơngai yoch, iĕm kư̆m wă kơ tơ'bơ̆p nhôn dơ̆ng; tôm tơdrong iĕm sek tơlang bơngai yoch noh 'lơ̆ng boih.

¹² Mă-lei kơthơ noh ưh kơ sĭ kơ inh chih kơdrô̆ tơdrong bơngai mă yoch hăm bơngai mă pŭ tơdrong pơ'brơh noh ôh; inh kư̆m chih wă tơ'blŏk kơ iĕm tơdrong iĕm 'maih kiơ̆ nhôn tơpă mă đơ̆ng sơ̆ khơ̆ dang ei, tơdrong noh 'Bok Kei-Dei kư̆m băt.

¹³ Thoi noh na dang ei inh hiôk tơpă, kơtơ̆ng tôm tơdrong iĕm pơm 'lơ̆ng boih păng pơthim kơ nhôn 'bôh Tĭt sư hiôk wih đơ̆ng iĕm 'bôh pơm trŏ boih.

¹⁴ Ki nhi Tĭt kư̆m pơma dơnuh gah tơdrong iĕm mơ̆n, mă inh pơma pơang iĕm inh huay kơ mơlâu ôh, inh pơma 'bơ̆t anăp sư yua kơ inh băt kơ iĕm gô pơm trŏ tơpă. Na 'blep trŏ thoi noh tơpă, noh kư̆m thoi tơdrong nhôn juăt kơ pơma kơ iĕm tơpăt ling-lang.

¹⁵ Mă loi sư ưh kơ hiơt kơ tơdrong iĕm sơng iŏk sư păng chu yom kơ sư, noh na sư 'mêm kơ iĕm rai dêh.

¹⁶ Inh hiôk dêh yua kơ inh băt kơ iĕm gô pơm 'lơ̆ng pơm trŏ lăm tôm tơdrong.