II Kor 4 - Sơ̆p Hlabơar Nơ̆r 'Bok Kei-Dei

¹ Nhôn jang tơdrong tih rŏ âu yua kơ 'Bok Kei-Dei mơnat đĕch. Thoi noh na nhôn wă jang ling-lang ưh kơ lê̆ ôh.

² Nhôn jang ưh kơ đei ôn tơdrong kơnê̆ hrĕp thoi lu bơngai nai ôh. Nhôn ưh kơ hơlĕnh pơdăr thoi đe, nhôn ưh kơ ming tơplih nơ̆r 'Bok Kei-Dei pơma. Nhôn wă pơma kiơ, nhôn pơma hơdah hloi. Nhôn pơma tơpăt wă kơ đĭ-đăng bơngai băt kơ nhôn bơngai tơpăt 'bơ̆t anăp 'Bok Kei-Dei ling-lang.

³ Tơ̆ng tơdrong 'nao 'lơ̆ng nhôn bơtho ưh kơ mơ̆t tơ jơhngơ̆m đon đe, noh jơhngơ̆m đon lu bơngai mă oei kơlŭk lum khăn, lu bơngai mă wă hiong răm.

⁴ Yŏng yang sơmăt pơgơ̆r tơ ala teh âu pơm kơ lu bơngai ưh kơ lui dang bơngai măt tol, wă kơ lu sư ưh kơ 'bôh tơdrong hơdah Yêsu Krist pơchrang kơ lu sư. Thoi noh na lu sư ưh kơ hlôh tơdrong 'nao 'lơ̆ng Yêsu Krist. Yêsu Krist boih hơbŏ thoi Kră Yang 'Bok Kei-Dei.

⁵ Ưh kơ sĭ nhôn bơtho pơang akâu nhôn kơdih ôh. Nhôn bơtho pơang kơ đe Yêsu Krist Kră Yang bơ̆n; gah nhôn bơngai đĭch đam iĕm yua kơ tơdrong jang Yêsu Krist.

⁶ Kơplah 'Bok Kei-Dei pơjing plĕnh teh sơ̆ Sư khan kơ măng mu athei đei hơdah na đei hloi. Na Sư kư̆m pơchrang tơdrong hơdah Sư tơ jơhngơ̆m đon nhôn, tơ muh măt Yêsu Krist, wă tơbăt kơ nhôn Sư Kră Yang 'Bok Kei-Dei mơsêh tơpă.

Pôl ưh kơ sơ'ngon kơ tơdrong sư pơmat-tat, yua kơ đei 'Bok Kei-Dei tơgŭm

⁷ Tơdrong jang mă Sư pơjao kơ nhôn jang âu dang lĕ kơ tơmam hu, tơmam maih pơ'mêm tah lăm bô̆i teh mă 'bônh kơ pơchah. 'Bok Kei-Dei ăn kơ nhôn jang pran noh Sư wă kơ đe băt đơ̆ng Sư ăn, đơ̆ng 'Bok mă mơsêh mơyang, ưh kơ sĭ đơ̆ng nhôn kơdih ôh.

⁸ Đĭ dôm tơdrong đe wă kơtĭt pơglơ̆k nhôn, mă-lei nhôn pơm huay huăi kơ glơ̆k; đĭ sơleng kơ đon boih, mă-lei nhôn khŏm adrin adrăi.

⁹ Đe pơm kơnê̆ pơmat nhôn, mă-lei 'Bok Kei-Dei ưh kơ lê̆ nhôn; đe teh tơpơ̆k nhôn, nhôn kư̆m huay kơ răm.

¹⁰ Akâu nhôn chu iŏk tơdrong pơmat-tat, dang lôch thoi Yêsu sơ̆, noh dang akâu nhôn tơbăt kơ đe Yêsu oei arih.

¹¹ Nhôn arih tơ ala teh âu, đe nŏng kơ wă pơlôch yua kơ nhôn jang tơdrong Yêsu, noh dang akâu nhôn tơbăt kơ đe Yêsu oei arih, mă khan nhôn kon bơngai lôch.

¹² Thoi noh boih tơdrong lôch, 'Bok Kei-Dei pơchĕp ăn kơ nhôn, tơdrong arih 'Bok Kei-Dei ăn kơ iĕm.

¹³ Nhôn kư̆m đei đon lui thoi 'bok mă chih lăm sơ̆p hla bơar 'Bok Kei-Dei sơ̆ sư khan thoi âu: “Yua kơ inh lui boih, thoi noh na inh pơma.” Na nhôn kư̆m lei-lăi, yua kơ nhôn lui na nhôn pơma bơtho đe.

¹⁴ Nhôn băt kơ 'Bok Kei-Dei tơiung arih Yêsu Krist, Sư gô tơiung arih nhôn mơ̆n thoi Sư tơiung arih Yêsu Krist. Klaih kơ noh Sư gô anhăk nhôn hăm iĕm oei hơdai Sư.

¹⁵ Dôm tơdrong nhôn adrin jang wă pơyua iĕm păng wă kơ tơdrong 'Bok Kei-Dei 'mêm mơnat kơ kon bơngai rai jơ̆p teh, wă kơ kon bơngai bơnê hăm pơang anăn Sư rai lơ.

¹⁶ Thoi noh nhôn wă jang ling-lang ưh kơ lê̆ ôh, mă khan sĕch akar nhôn rai hŏnh, mă-lei jơhngơ̆m nhôn lăm to dang lĕ kơ ming 'nao rim năr.

¹⁷ Nhôn iŏk tơdrong pơmat-tat dang ei kư̆m bưh, sư hơiơch 'biơ̆, nhôn hăt kơ chă tơdrong arih ling-lang ning-mônh ei kăl hloh.

¹⁸ Tơdrong kiơ mă bơ̆n gơh 'bôh, nhôn ưh kơ tơchĕng ôh; nhôn tơchĕng kơ tơdrong mă bơ̆n ưh kơ gơh 'bôh, yua kơ dôm tơdrong măt bơ̆n gơh 'bôh sư hiong tôch, ưh kơ gơh oei ling-lang ôh. Pôm tơdrong măt bơ̆n ưh kơ gơh 'bôh đĕch, gơh oei ling-lang ưh kơ layơ tôch.