II Kor 2 - Sơ̆p Hlabơar Nơ̆r 'Bok Kei-Dei

¹ Kơlih kơ thoi noh na inh kuă kơ năm tơ iĕm ki, inh kuă hli kơ inh pơma pơjĭ đon iĕm, hli kơ iĕm sơ'ngon kơ inh thoi sơ̆.

² Iĕm pơm kơ inh hiôk, mă inh pơm kơ iĕm sơ'ngon. Đơ̆ng noh bu wă pơm kơ inh hiôk dơ̆ng.

³ Kơthơ mă inh chih kơ iĕm ki, inh kư̆m chih khan thoi noh. Inh ling-lang wă sơđơ̆ng ngêh kơ iĕm, hiôk hăm iĕm na inh kuă kơ năm ki, hli kơ inh sơ'ngon yua kơ iĕm ưh kơ hiôk kơ đơ̆ng inh pơma pơjĭ đon iĕm. Yua kơ inh bơngai hiơ̆ hăm iĕm, iĕm băt boih.

⁴ Kơplah inh chih kơ iĕm kơthơ ki, inh ơh sơ'ngon dêh, inh nhơ̆m hmoi ơh ăi minh 'nu, mă-lei ưh kơ sĭ inh wă kơ iĕm sơ'ngon hai ôh. Inh wă kơ iĕm băt kơ inh 'mêm kơ iĕm tơpă.

'Nĕ pă jô̆ yo kơ bôl bơ̆n pơm yoch

⁵ Tơ̆ng đe pơm kơ inh ưh kơ hiôk, ưh kơ sĭ kơdrô̆ inh ôh sơ'ngon, iĕm kư̆m sơ'ngon lei-lăi. Mă-lei tơdrong noh inh ưh kơ kăl kơ pơma lơ ôh.

⁶ Bơngai mă yoch noh dang bơ̆n phak sư mah boih yua kơ bơ̆n tơlĕch sư đơ̆ng akŭm hơdai bơ̆n ki.

⁷ Thoi noh dang ei bơ̆n 'nĕ pă jô̆ yo kơ sư, iĕm athei dah pơlung sư đĕch hli kơ sư sơ'ngon rai dêh.

⁸ Inh bơtho iĕm thoi noh wă kơ sư 'brơ̆k mơnat băt kơ iĕm 'mêm kơ sư.

⁹ Kơthơ inh chih kơ iĕm ki, athei iĕm bơtho khan kơ bơngai yoch noh, ưh kơ sĭ inh wă hil kơ sư ôh, inh chih wă pơlong lăng iĕm, wă kơ băt iĕm chu lăm dôm tơdrong.

¹⁰ Iĕm huay kơ jô̆ yo kơ bôl pơm yoch, inh kư̆m huay kơ jô̆ yo mơ̆n; tơdrong inh huay kơ jô̆ yo kơ đe, noh yua kơ Yêsu Krist, Sư wă kơ inh jang tơgŭm iĕm tang Sư, thoi noh na inh ưh kơ đei kơ jô̆ yo kơ bu bu ôh.

¹¹ Na dang ei đĭ-đăng kơ bơ̆n 'nĕ pă jô̆ yo kơ bơngai mă yoch noh, hli kơ sư hiong lăm tơdrong yang Satan, yua kơ bơ̆n băt kơ yang Satan sư pơhlŭ hơgei dêh.

Jơ̆ng 'bang Yêsu Krist 'bâu phu jơ̆p kơ teh đak

¹² Đơ̆ng rŏng kơ inh chih kơ iĕm kơthơ noh ki, inh năm tơ Pơlei Trôs bơtho tơdrong 'nao 'lơ̆ng Yêsu Krist tơ noh. 'Bok Kei-Dei pơchoh trong kơ inh năm jang tơdrong Sư tơ noh.

¹³ Jơhngơ̆m inh ưh kơ hiôk ôh chang lăng 'nhŏng Tĭt đơ̆ng năm ba kơthơ tơ iĕm ki ưh kơ jah brŏk tơ inh. Inh pă kĕ gô sư boih 'maih dah kơtơ̆ng tơdrong iĕm thoi yơ, na inh achăng lê̆ 'nhŏng oh bơngai lui Pơlei Trôs năm hơloh hloi tơ dêh Masêđôn.

¹⁴ Bơnê kơ 'Bok Kei-Dei tơgŭm nhôn bơtho tơdrong Yêsu Krist ling-lang, jei Yêsu Krist boih, jơ̆p kơ teh đak gô kơtơ̆ng tơdrong Yêsu Krist.

¹⁵ Nhôn bơtho đe dang lĕ tơmam 'bâu phu Yêsu Krist soh pơyơ̆r kơ 'Bok Kei-Dei, wă kơ đĭ rim 'nu bơngai mă 'Bok Kei-Dei wă iŏk, hăm lu bơngai mă wă hiong răm 'bâu tôm.

¹⁶ Lu bơngai mă wă hiong răm, lu sư 'bâu chhok hơ'nơ̆k lôch. Lu bơngai 'Bok Kei-Dei rơih iŏk, lu sư 'bâu phu pơm kơ lu sư arih ling-lang. Tơdrong jang noh trăp dêh bu kĕ jang?

¹⁷ Nhôn ưh kơ sĭ pơm thoi lơ 'nu bơngai bơtho hơlĕnh tơdrong 'Bok Kei-Dei wă kơ gơh iŏk sa tơmam đe ôh. Nhôn bơngai 'Bok Kei-Dei wơh jang tơdrong Sư, na nhôn bơtho tơdrong Sư tơpăt ngăl ling-lang yua kơ Sư băt tôm tơdrong. Na nhôn gơnang kơ Yêsu Krist tơgŭm nhôn bơtho.