II Kor 13 - Sơ̆p Hlabơar Nơ̆r 'Bok Kei-Dei

¹ Wă pêng 'măng kơ âu boih inh năm tơ iĕm, mă-lei ưh kơ sĭ năm chă jâu đe kư̆ kă ôh; tơ̆ng 'bar pêng 'nu 'bôh sư pơm yoch tơpă, na gơh pơma kơ sư.

² Inh năm tơ iĕm 'măng mă 'bar ki, inh khan kơ lu bơngai pơm yoch hăm lu bơngai nai, mưh inh năm tơ iĕm pă 'măng 'bôh iĕm oei pơm yoch, inh ưh pă bơtho boih, inh tơlĕch lê̆ hloi; na mă inh oei krŭl đơ̆ng iĕm dang ei inh kư̆m khan kơ iĕm thoi noh mơ̆n.

³ Thoi noh na kơnh pơgê iĕm gô băt kơ Yêsu Krist yua 'bơ̆r inh pơma kơ iĕm. Sư ưh kơ rơdu kơ iĕm ôh, Sư jang lăm lu iĕm kơtang tơpă.

⁴ Sư lôch tơ 'long pơglang sơ̆ kư̆m thoi noh mơ̆n, bơ̆n lăng Sư lôch thoi Sư rơdu, mă-lei Sư đei mơsêh mơyang 'Bok Kei-Dei kơtang, ăn kơ Sư iung arih dơ̆ng. Nhôn kư̆m rơdu tơrăn thoi Sư sơ̆, mă-lei nhôn đei mơsêh mơyang 'Bok Kei-Dei kơtang, tơdrong arih nhôn năm tơ iĕm kơnh kư̆m thoi noh.

⁵ Iĕm athei pơlong lăng tơdrong arih iĕm, hăm thoi bơngai lui tơpă dah ưh. Iĕm hăm băt kơ Yêsu Krist oei hơdai iĕm? Hli kơ iĕm ưh kơ lui kơ Sư đĕch, na Sư ưh kơ oei hơdai iĕm.

⁶ Iĕm băt kơ Yêsu Krist oei hơdai iĕm, iĕm kư̆m băt kơ Yêsu Krist oei hơdai nhôn mơ̆n mă đơ̆ng nhôn bơtho iĕm sơ̆.

⁷ Nhôn krao khan apinh 'Bok Kei-Dei tơgŭm iĕm huay kơ pơm yoch, na đe gô băt kơ nhôn gơh tơgŭm iĕm yua kơ Yêsu Krist oei hơdai nhôn. Mă-lei nhôn ưh kơ gan kăl kơ đe băt tơdrong noh ôh. Nhôn krao khan kơ Sư wă kơ Sư tơgŭm iĕm đĕch. Tơ̆ng iĕm pơm 'lơ̆ng, nhôn truh tơ noh, nhôn ưh pă kăl kơ bơtho iĕm boih păng nhôn kư̆m ưh pă kăl kơ tơbăt kơ iĕm nhôn jơ̆ng 'bang Yêsu Krist.

⁸ Tơ̆ng iĕm pơm 'lơ̆ng tơpăt boih, nhôn kư̆m ưh pă gơh bơtho iĕm thoi yơ dơ̆ng, nhôn pôm pơthim tơdrong rai 'lơ̆ng đĕch.

⁹ Tơ̆ng iĕm lui kơjăp, nhôn kư̆m rơdu mơ̆n ưh kơ pơm kơtang ôh, nhôn rai 'nă hal kơ iĕm lui kơjăp. Thoi noh na dang ei nhôn krao khan apinh 'Bok Kei-Dei tơgŭm iĕm, wă kơ iĕm jing bơngai 'lơ̆ng tơpăt lăm tôm tơdrong.

¹⁰ Âu kơplah inh oei krŭl na inh chih kơ iĕm thoi noh, wă kơ mưh inh truh tơ iĕm, inh huay pă kăl kơ bơtho iĕm boih. Tơdrong bơtho noh đơ̆ng Kră Yang Yêsu Krist ăn kơ inh, wă kơ inh bơtho iĕm thoi noh, wă kơ inh tơgŭm iĕm rai đunh rai lui kơjăp; ưh kơ sĭ wă pơglăi iĕm ôh.

¹¹ Ơ lu 'nhŏng oh, dôm tơdrong inh chă chih kơ iĕm dôm noh boih. Oei kơ iĕm mă 'lơ̆ng. Adrin pơm 'lơ̆ng, mơ̆ng dôm tơdrong inh pơma, băt chu dih băl, oei sa hiôk chơt; thoi noh na 'Bok Kei-Dei mă 'mêm mơnat kơ kon bơngai hăm ăn kon bơngai hiôk-hian, Sư gô oei hơdai iĕm.

¹² Apinh iĕm ngôi hơpong 'mêm dih băl mă 'lơ̆ng, yua kơ đĭ-đăng kơ bơ̆n 'nhŏng oh lui kơ Yêsu Krist.

^13-14 Đĭ-đăng kơ lu kon 'Bok Kei-Dei mă oei tơ nhôn kư̆m hơdai đei nơ̆r jet gia iĕm. Nhôn apinh Kră Yang Yêsu Krist, đon băt mơnat, wei-lăng iĕm lăm tôm tơdrong; 'Bok Kei-Dei Kră Yang mă 'mêm kơeng kơ bơ̆n, Sư gô tơgŭm iĕm ling-lang; Yang Bơhngol 'Lơ̆ng, Sư kư̆m oei hơdai hăm iĕm khŏm khŏm.