II Kor 10 - Sơ̆p Hlabơar Nơ̆r 'Bok Kei-Dei

¹ Inh Pôl wă pơma păng iĕm tơdrong âu. Lơliơ lu bơngai mơ'nah jô̆ kơ inh khan kơplah inh oei ataih đơ̆ng iĕm, inh chih kơthơ, inh pơma nuih; mưh inh oei jê̆ iĕm khan inh pơma lêl? Yêsu Krist Sư dim gơh găt dêh, na Sư wă kơ bơ̆n kư̆m thoi noh.

² Inh khan lê̆ kơ iĕm hơdrol, mưh inh truh tơ iĕm kơnh pơgê, iĕm chu kơ inh, na inh huay kơ pơma kơtang kơ iĕm. Lu bơngai mă jô̆ kơ inh khan inh thoi lĕ bơngai ưh kơ lui oei tơ ala teh âu, noh lê̆ kơ nhôn pơma dih băl lu sư khan inh bơngai lêl.

³ Mă khan nhôn oei tơ ala teh âu ưh kơ sĭ nhôn tơblah thoi lu bơngai tơ ala teh âu ôh.

⁴ Khêl đao nhôn tơblah, ưh kơ thoi khêl đao lu bơngai ala teh âu ôh. Khêl đao nhôn wă khan tơdrong 'bơ̆r mơsêh mơyang 'Bok Kei-Dei, wă pơrăm lê̆ dôm tơdrong kon bơngai gơnang sơđơ̆ng,

⁵ păng dôm tơdrong ưh kơ 'lơ̆ng, ưh kơ trŏ đon kon bơngai tơchĕng, tơdrong lu sư wă pơgăn tơdrong 'Bok Kei-Dei. Nhôn athei lu sư chu yom kơ Yêsu Krist lăm tôm tơdrong.

⁶ Păng lăp nhôn truh tơ iĕm kơnh, bu ưh tam chu kơ nhôn, nhôn wă bơtho khan phak tơbral đon sư; dôm lu iĕm mă chu, huay boih.

⁷ Tơdrong âu iĕm athei tơchĕng mă nhên, bơngai bu khan Yêsu Krist 'mêm kơ sư, nhôn kư̆m khan Yêsu Krist 'mêm kơ nhôn mơ̆n. Iĕm athei băt Yêsu Krist 'mêm kơ bơ̆n lei-lăi đĕch.

⁸ Inh kư̆m dang pơang akâu kơdih, yua kơ tơdrong âu trŏ kơ tơdrong jang inh wă bơtho tơgŭm iĕm, mă-lei inh ưh kơ đei khan wă pơrăm iĕm ôh; păng inh ưh kơ mơlâu yua kơ trŏ tơdrong jang inh thoi noh tơpă.

⁹ Dôm kơthơ inh chih, ưh kơ đei chih tơhli iĕm ôh,

¹⁰ thoi lu đe mă jô̆ kơ inh, khan kơthơ inh chih pơma kơtang dêh, mă-lei mưh inh oei hơdai lu sư tơpă, lu sư jô̆ kơ inh khan bơngai lêl, bơngai pơma ưh kơ yua.

¹¹ Bơngai bu đon sư tơchĕng thoi noh, bơngai noh athei pơwao kơdih mă trŏ thoi tơdrong nhôn chih, yua kơ dôm tơdrong nhôn chih pơkă tơ rim kơthơ, mưh nhôn truh tơ iĕm, nhôn gô pơm 'blep tôm tơdrong thoi nhôn chih noh.

¹² Lu bơngai noh 'bơ̆r lu sư kơdih đĕch khan trŏ kơ lu sư pơm jơ̆ng 'bang Yêsu Krist. Nhôn ưh kơ pơ̆n pơm thoi noh ôh, nhôn gô mơ̆ng kơ 'Bok Kei-Dei ăn. Lu bơngai noh lu sư ưh kơ hlôh, na lu sư tah akâu kơdih pơm jơ̆ng 'bang Yêsu.

¹³ Nhôn ưh kơ đei pơang tơdrong nhôn jang hloh kơ 'Bok Kei-Dei pơkă ôh, nhôn jang 'blep thoi Sư pơkă đĕch, na tơdrong jang nhôn Sư pơjao kơ nhôn bơtho tơgŭm iĕm.

¹⁴ Tơdrong nhôn bơtho iĕm dang ei ưh kơ sĭ nhôn pơhloh kơ 'Bok Kei-Dei chơchă kơdih ôh, tơdrong nhôn bơtho iĕm âu 'Bok Kei-Dei pơjao kơ nhôn, na nhôn năm bơtho iĕm tơdrong 'nao 'lơ̆ng Yêsu Krist đơ̆ng sơ̆ boih, ưh tam đei bu nai bơtho adrol kơ lu nhôn.

¹⁵ Dôm lu bơngai khŭl nai lui kơjăp đơ̆ng đe bơtho, nhôn ưh kơ đei pơma khan đơ̆ng nhôn bơtho ôh. Mă iĕm âu đơ̆ng anăp nhôn bơtho tơpă, na nhôn chang iĕm jah lui kơjăp, wă kơ iĕm jah tơgŭm nhôn bơtho jơ̆p kơ tơring iĕm.

¹⁶ Đơ̆ng noh na nhôn gơh năm bơtho jơ̆p kơ tơring pah to kơ iĕm, dang ei ưh tam đei bu bơtho kơ lu sư tơdrong Yêsu. Nhôn wă năm bơtho tơ noh wă kơ nhôn huay kơ pơang akâu thoi lu bơngai noh jang tơ anih đêl đe jang khan đe lui đơ̆ng sư bơtho.

¹⁷ Lăm sơ̆p hla bơar 'Bok Kei-Dei đei khan sơ̆ thoi âu: “Bơ̆n 'nĕ pă pơang akâu kơdih, bơ̆n athei pơang anăn Kră Yang đĕch.”

¹⁸ Ưh kơ sĭ Kră Yang lăp đon kơ bơngai mă pơang akâu kơdih ôh, Sư lăp đon kơ bơngai bu mă Sư 'bôh pơm 'lơ̆ng pơm trŏ.