II Ho 9 - Sơ̆p Hlabơar Nơ̆r 'Bok Kei-Dei

Pơtao drŏ-kăn char Seba năm ngôi tơ pơtao Sôlômôn

¹ Wă pơtao drŏ-kăn dêh char Seba kơtơ̆ng đe ư-ang kơ Sôlômôn, na sư năm truh tơ Jêrusalem, wă pơpơn pơlong lăng Sôlômôn; yă pơtao chông lu đĭch đam bơngai awih awăn lơlap, đei lu lăk-đa chơ pơgang 'bâu phu, đei maih lơ păng tơno gĭt; sư năm tơ Sôlômôn, roi tôm dôm tơdrong mă sư đei tơchĕng lăm kơ̆l sư kơdih.

² Sôlômôn tơl tơwih đĭ dôm tơdrong yă pơtao jet, ưh kơ đei nơ̆r jet ayơ mă hlơp tơnat mă ưh kơ gơh tơl kơ yă.

³ Yă pơtao Seba 'bôh tơdrong hơgei Sôlômôn, lăng hnam sư đei pơm boih,

⁴ lu tơmam sa tơ gơ'bang, tang-dŏ lu yŏng pơgơ̆r sư hơ-oei, lu bơngai awih awăn sư hơbĕn ao lu sư hrŭk, lu bơngai awih awăn ăn đak nhă hơbĕn ao tai lu sư hrŭk păng dôm lu tơmam soi 'buh pơyơ̆r lăm hnam Kră Yang, na yă pơtao Seba lăng hlĭch ưh pă băt pơma liơ.

⁵ Yă pơtao khan kơ pơtao: Tơdrong inh kơtơ̆ng đe roi gah ih lăm char nhôn tơdrong nơ̆r ih pơma hơgei păng tơdrong jang ih hơgei tơpă.

⁶ Mă-lei adrol kơ inh tam mă truh tơ âu tam mă 'bôh tơm măt dôm tơdrong 'nâu, lei inh ưh kơ lui ôh kơ nơ̆r lu sư roi noh; lei na, 'nâu đe roi kơ inh băt ưh tam mă đei minh puăt ôh tơdrong ih hơgei; sĭt tơpă tơdrong hơgei ih tih hloh kơ inh kơtơ̆ng.

⁷ Pŭn hiôk dêh kơ lu bơngai pơgơ̆r oei hăm ih, lu đam ih, rim năr jang 'bơ̆t anăp ih, mơ̆ng nơ̆r 'bơ̆r đon hơgei ih,

⁸ Trŏ bơnê ư-ang tơpă kơ Kră Yang 'Bok Kei-Dei ih, Sư lăp đon kơ ih, ăn kơ ih pơm pơtao hơ-oei 'bơ̆t tang-dŏ pơtao Sư wă pơm pơtao ăn kơ Kră Yang 'Bok Kei-Dei ih! Yua kơ Kră Yang 'Bok Kei-Dei ih 'mêm kơ bơngai Isơrael, wă pơm ăn kơ lu sư kơjăp ling-lang, lei na ăn kơ ih pơm pơtao lu sư wă pơm tơdrong 'lơ̆ng păng tơdrong tơpăt.

⁹ Đơ̆ng noh sư ăn kơ pơtao minh-hrĕng 'bar-jĭt talâng maih, tơmam 'bâu phu lơ tơpă păng tơmo gĭt, tam biơh đei tơmam 'bâu phu thoi noh đơ̆ng sơ̆ thoi tơmam 'bâu phu đơ̆ng thoi yă pơtao char Seba ăn kơ pơtao Sôlômôn.

¹⁰ Lu bơngai đơ̆ng Hiram păng lu bơngai đơ̆ng Sôlômôn wơh kư̆m đei chơ 'long kơte păng chơ tơmo gĭt đơ̆ng char Ôphir.

¹¹ Pơtao yua 'long kơte noh pơm kung lăm hnam akŭm Kră Yang păng lăm hnam pơtao, hăm pơm brŏ dung, tĭng-nĭng reh ăn kơ khŭl hơri; đơ̆ng sơ̆ đe ưh tam 'bôh ôh tơ lăm dêh char Juđa đei thoi noh.

¹² Pơtao Sôlômôn ăn kơ yă pơtao char Seba tơmam kiơ̆ thoi sư apinh hơpơi wă, lơ hloh kơ tơmam sư đei pơyơ̆r ăn kơ pơtao Sôlômôn, đơ̆ng noh yă pơtao păng lu đĭch đam sư wih brŏk tơ dêh char sư kơdih.

Tơdrong mơdrŏng păng đe ư-ang Sôlômôn

¹³ Maih mă pơtao Sôlômôn đei iŏk lăm rim sơnăm tơdrâu-hrĕng tơdrâu-jĭt tơdrâu talâng.

¹⁴ Ưh kơ jô̆ lu maih mă đơ̆ng lu mơdro pơyơ̆r, mă hu maih đơ̆ng pơtao Arâp dah đơ̆ng lu yŏng pơgơ̆r char năm ba ăn kơ pơtao Sôlômôn.

¹⁵ Pơtao Sôlômôn tơtang maih noh pơm 'bar-hrĕng hlak khêl tih, minh hlak khêl trăp tơdrâu-hrĕng beka maih.

¹⁶ Păng pêng-hrĕng tŏ khêl iĕ hăm maih, minh hlak khêl trăp pêng-hrĕng beka maih; na pơtao 'măn khêl noh tơ lăm hnam Bri kơdrơ̆ng char Liban.

¹⁷ Pơtao kư̆m pơm minh pôm tang-dŏ tih hăm bơla đơ̆ng noh bah hăm maih rơgoh.

¹⁸ Tang-dŏ noh đei tơdrâu kơnao păng jơ̆ng juă tơklep hăm tang-dŏ; kư̆m đei anih hơgơn ti pah âu pah to kơ anih hơ-oei, cheng noh đei man 'bar tŏ rup dăm-brang.

¹⁹ Kŭm đei man mơjĭt-'bar tŏ dăm-brang 'bơ̆t tơdrâu kơnao gah 'ma păng gah 'ngiĕo; ưh kơ đei dêh char ayơ mă pơm tang-dŏ thoi noh.

²⁰ Lu kơchŏk pơnhan yua wă huch nhă tă kơ pơm hăm maih ngăl păng đĭ lu tơmam yua lăm hnam pơtao Bri kơdrơ̆ng char Liban kư̆m pơm hăm maih rơgoh; lăm chăl Sôlômôn, đe ưh kơ gĭt ôh hu,

²¹ yua kơ pơtao đei khŭl duk tŏk tơ Tarêsis, hơdai hăm đĭch đam Hiram; păng pêng sơnăm minh wơ̆t duk juăt kơ chơ ba hu maih, bơla, kuĕnh păng 'bok bul.

²² Thoi noh boih na pơtao Sôlômôn đe ang hloh kơ lu pơtao kơpal teh âu kơ tơdrong sư mơdrŏng păng tơdrong sư hơgei.

²³ Đĭ-đăng lu pơtao lăm teh 'maih tơ'bơ̆p pơtao Sôlômôn, wă mơ̆ng đon gơh hơgei đei đơ̆ng Kră Yang 'Bok Kei-Dei ăn lăm kơ̆l đon tơchĕng sư.

²⁴ Lăm rim sơnăm, lu sư năm tơ'bơ̆p chĕp ba tơmam pơyơ̆r, tơmam đe pơm păng hu maih, hơbĕn ao, tơmam tơblah tơmam 'bâu phu, aseh păng aseh iĕ.

²⁵ Pơtao Sôlômôn đei puăn-rơbâu tŏ hơdrong aseh păng hnam tah gre aseh, kư̆m đei mơjĭt-'bar rơbâu aseh, tơ lăm lu pơlei tah gre aseh păng tah hơdai hăm sư tơ lăm pơlei tih Jêrusalem.

²⁶ Sư pơgơ̆r lu pơtao, iŏk đơ̆ng đak Krong Ơphrat truh tơ char Philistin păng dĭng truh tơ hơdral hăm char Êyiptơ.

²⁷ Lăm pơlei Jêrusalem pơtao lăng kơ hu thoi tơmo hơga păng 'long hơngo hla iĕ lơ thoi 'long kơphŏk chăt lăm groi Sephela.

²⁸ Pơtao Sôlômôn răt aseh đơ̆ng dêh Êyiptơ păng đơ̆ng dêh char nai.

Sôlômôn lôch

²⁹ Đĭ-đăng tơdrong jang Sôlômôn pơm pơjing đơ̆ng blŭng truh tơ tôch đei chih tơ lăm sơ̆p hla bơar hơ'mon Nathan bơngai khan lê̆ adrol, lăm hla bơar Ahija bơngai khan lê̆ adrol, bơngai Silô, chih lăm sơ̆p hla bơar Iđô, 'bok mă đei khan lê̆ adrol gah tơdrong Jêrôbôam, kon drŏ-nglo Nêbat.

³⁰ Sôlômôn pơgơ̆r đĭ-đăng bơngai Isơrael lăm pơlei tih Jêrusalem lăm puăn-jĭt sơnăm.

³¹ Sôlômôn lôch oei hơdai hăm lu 'bok sư, đe 'bŭ lăm pơlei Đawit, 'bă sư; Rêhôbôam, kon drŏ-nglo sư iung pơm pơtao pơgơ̆r pơtrơp sư.