II Ho 8 - Sơ̆p Hlabơar Nơ̆r 'Bok Kei-Dei

Sôlômôn pơm ming pơlei

¹ Kơtĕch kơ 'bar-jĭt sơnăm đơ̆ng rŏng kơ Sôlômôn pơm man hnam Kră Yang 'Bok Kei-Dei păng hnam pơtao sư kơdih keh đang boih,

² na Sôlômôn kư̆m pơdơ̆ng ming lu pơlei mă Hiram pơtao đe Tirơ đei asong ăn boih kơ sư păng sư ăn kơ lu kon pơlei Isơrael oei pơm pơlei tơ noh.

³ Sôlômôn năm blah pơlei Hamat Sôba jei sư.

⁴ Sư pơm pơlei Tatmôr lăm char glă păng pơm pơjing lu pơlei wă pơm anih mong tah tơmam lăm Hamat.

⁵ Sư kư̆m pơm pơjing ming pơlei Bêt Hôron Kơpơ̆ng păng Bêt Hôrôn Ala, Pơm kơđông đei dur man kơjăp đei 'măng jang păng đei chơkăl;

⁶ pơjing dơ̆ng pơlei Balat păng pơm lu pơlei đei hnam mong mŭk tơmam păng lu pơlei wă tah gre păng pơlei ăn kơ lu aseh, tơdrong kiơ Sôlômôn wă 'maih pơm, Sư pơm tơ pơlei Jêrusalem, lăm char Liban, dah tơ lăm rim dêh char ayơ mă sư pơgơ̆r.

⁷ Đĭ-đăng bơngai mă oei arih răi lăm lu kon pơlei Hêtit, Amôrit, Pêrisit, Hêwit păng Jêbus, ưh kơ trŏ kơ adrĕch Isơrael,

⁸ lu adrĕch adrung lu đe âu lu sư oei arih răi lăm char mă lu bơngai Isơrael tim mă pơlôch đĭ, na Sôlômôn rôp lu sư pơm đĭch dĭng truh dang ei.

⁹ Mă-lei lu bơngai Isơrael, Sôlômôn ưh kơ đei rôp bu pơm đĭch, lu sư pơm linh, pơm yŏng pơgơ̆r, wei-lăng gre aseh păng lu linh hao aseh.

¹⁰ Pơtao Sôlômôn kư̆m đei minh-hrĕng pơđăm-jĭt 'nu bơngai bơ̆jang, wei-lăng pơgơ̆r lu kon pơlei jang,

¹¹ Sôlômôn ba kon adruh pơtao Pharaôn đơ̆ng pơlei Đawit năm oei tơ hnam pơtao mă sư đei pơm ăn boih; yua kơ sư khan: Akăn inh ưh kơ oei lăm hnam pơtao Đawit, pơtao đe Isơrael yua kơ tơ anih ayơ Hom Kră Yang truh jing anih 'lơ̆ng rơgoh.

¹² Sôlômôn pơyơ̆r tơmam soi 'buh ăn kơ Kră Yang tơ kơpal chơnang soi Kră Yang mă sư đei pơm 'bơ̆t kơdeng anăp 'măng hnam akŭm.

¹³ Sư pơyơ̆r rim năr kiơ̆ kơ Môis pơkă boih pơyơ̆r lăm năr giĕng Sa'bat, năr khei tơ'bang păng pêng kơ̆m giĕng lăm sơnăm noh lu năr giĕng sa 'bĕng ưh kơ đei 'Buih pông, kơ̆m giĕng phĕ kĕch, năr giĕng Bơsŭn.

¹⁴ Kiơ̆ thoi Đawit 'bă sư, tơtă, sư asong tơdrong jang ăn kơ lu 'bok soi kiơ̆ kơ tơdrong jang khŭl lu sư, jao kơ khŭl bơngai Lêwi hat hơri ư-ang păng bơ̆jang tơgŭm lu 'bok soi, jang kiơ̆ tơdrong jang rim năr; tơ rim kơ 'măng jang Sư kư̆m đei ăn kơ khŭl bơngai gak 'măng jang, yua kơ 'nâu nơ̆r Đawit tơtă, bơngai Kră Yang 'Bok Kei-Dei.

¹⁵ Nơ̆r pơtao đei tơtă kơ lu 'bok soi bơngai Lêwi gah tôm tơdrong jang mă khan tơ hnam mong mŭk tơmam athei jang mă 'lơ̆ng.

¹⁶ Thoi noh đĭ-đăng tơdrong jang Sôlômôn đei pơm boih, đơ̆ng pơm tơiung hnam Kră Yang dĭng keh đang; pơm hnam Kră Yang keh đang boih.

¹⁷ Na Sôlômôn năm tơ pơlei Êsiôn Gêber păng pơlei Êlat tơ cheng đak dơsĭ, lăm dêh char Eđôm.

¹⁸ Hiram gơih ăn bơngai jang sư chĕp ba duk hăm bơngai juăt kơ wơ̆r duk lăm đak dơsĭ; lu sư năm hơdai bơngai jang Sôlômôn năm tơ Ôphir, đơ̆ng noh lu sư chĕp ba ăn kơ Sôlômôn mơjĭt-tơdrâu tâna maih.