II Ho 7 - Sơ̆p Hlabơar Nơ̆r 'Bok Kei-Dei

Lu tơmam soi pơyơ̆r Pơih Hnam Akŭm

¹ Đang kơ Sôlômôn krao khan Kơplah noh đei ŭnh đơ̆ng plĕnh jruh soh sa tơmam soi 'buh păng lu tơmam soi pơyơ̆r; tơdrong ư-ang rang mơnhal Kră Yang jur mơ̆t 'bĕnh kơ hnam akŭm.

² Lu 'bok soi ưh kơ gơh kơ mơ̆t tơ lăm hnam akŭm Kră Yang, yua kơ tơdrong ư-ang mơsêh mơyang rang mơnhal mơ̆t 'bĕnh jơ̆p-jang kơ hnam akŭm Kră Yang hloi.

³ Lăp đĭ-đăng kon pơlei Isơrael 'bôh ŭnh păng mơsêh mơyang rang mơnhal Kră Yang jur tơ hnam; na lu Sư drap bon tơ teh kơkuh kơ Kră Yang khan: “Tơpă Sư 'lơ̆ng, tơdrong Sư 'mêm mơnat oei oei ling-lang!

⁴ Na pơtao păng đĭ đang kon pơlei pơyơ̆r tơmam soi 'bơ̆t anăp Kră Yang.

⁵ Pơtao Sôlômôn pơyơ̆r tơmam soi 'bar-jĭt 'bar-rơbâu tŏ rơmo păng minh-hrĕng 'bar-jĭt rơbâu tŏ triu păng bơbe, thoi noh pơtao Sôlômôn păng đĭ-đăng kon pơlei pơyơ̆r pơih hloi hnam akŭm 'Bok Kei-Dei.

⁶ Lu 'bok soi dơ̆ng kơtă 'bơ̆t anih kơdih; lu bơngai Lêwi chĕp brŏ hơri bơnê kơ Kră Yang, mă đơ̆ng Đawit pơm sơ̆ wă kơkuh bơnê kơ Kră Yang păng hơri ư-ang kơ Sư: “Tơpă tơdrong Sư 'mêm mơnat oei oei ling-lang.” Lu 'bok soi hlôm keng dơ̆ng 'bơ̆t anăp bơngai Lêwi păng đĭ-đăng kon pơlei bơngai Isơrael iung dang dơ̆ng.

⁷ Sôlômôn 'măn lê̆ minh anih tŏk-bŏk cham 'bơ̆t anăp hnam akŭm Kră Yang; tơ noh boih mă sư pơyơ̆r tơmam soi 'buh păng rơmă pơm tơmam soi kơ tơdrong hiôk-hian, yua kơ lu chơnang soi păng kong mă đêl Sôlômôn pơm noh ưh kơ mah wă dan đĭ lu tơmam soi 'buh, tơmam soi phe 'ba păng rơmă.

⁸ Kơplah noh Sôlômôn păng đĭ-đăng kon pơlei Isơrael, lu sư minh tơpôl lơ tơpă năm đơ̆ng tơring Lêbô Hamat truh tơ thong Êyiptơ, pơm giĕng lăm tơpơh năr.

⁹ Truh năr mă tơhngam, lu sư akŭm tih dêh, yua kơ lu sư pơm giĕng pơyơ̆r chơnang soi lăm tơpơh năr păng pơm giĕng hmă kư̆m tơpơh năr.

¹⁰ Năr 'bar-jĭt pêng khei tơpơh, sư ăn kơ kon pơlei wih brŏk tơ anih kơdih, jơhngơ̆m lu sư chơt hiôk păng 'nă hal, yua kơ Kră Yang đei ăn boih tơdrong 'lơ̆ng kơ Đawit, kơ Sôlômôn păng ăn kơ kon pơlei pơla Isơrael Sư.

Kră Yang pơdah Sư kơ Sôlômôn

¹¹ Lăp Sôlômôn pơm keh hnam Kră Yang păng hnam pơtao; mă tôm tơdrong jang kiơ Sôlômôn hơmet wă pơm lăm hnam Kră Yang păng lăm hnam pơtao sư, sư pơm keh đang đĭ boih.

¹² Lăm măng noh Kră Yang pơdah Sư kơ Sôlômôn păng khan: “Inh kơtơ̆ng boih nơ̆r ih krao khan păng Inh kư̆m rơih boih anih 'nâu wă pơm hnam pơyơ̆r tơmam soi kơ Inh.

¹³ Mưh Inh tang đĭ plĕnh ti, ưh kơ ăn 'mi jur, dah ăn kơ lep 'ba truh kăp sa lu hơnik hơnan păng dah ăn tơdrong lôch hơbuh truh tơ kon pơlei Inh,

¹⁴ Tơdah kon pơlei pơla Inh, đe krao lu sư kon Inh, drap bon kơkuh, krao khan, chơchă Inh păng tơbral achăng lê̆ trong kơnê̆ lei Inh oei kơpal plĕnh ti gô mơ̆ng, mơnat ăn huay pă jô̆ yoch lu sư păng ăn teh lu sư thoi đêl.

¹⁵ Măt Inh gô lăng păng đon Inh gô pơgling mơ̆ng nơ̆r krao khan đơ̆ng anih 'nâu.

¹⁶ Inh rơih iŏk boih păng ăn kơ hnam âu jing rơgoh ăn kơ anăn Inh oei ling-lang; măt păng jơhngơ̆m đon Inh kư̆m gô oei mơ̆ng lăng tơ noh khŏm khŏm.

¹⁷ Bĕ ih, tơdah ih yak năm 'bơ̆t anăp Inh rok thoi 'bă ih, Đawit đei pơm, pơm kiơ̆ dôm tơdrong Inh athei pơkă kơ sư, wei răk khôi juăt păng nơ̆r Inh tơtă,

¹⁸ na Inh gô ăn kơ dêh char pơtao Ih pran kơjăp thoi nơ̆r Inh pơkă pơgơ̆p hăm 'bă ih, Đawit thoi âu: Lăm adrĕch Isơrael ưh kơ'bah bơngai pơgơ̆r Isơrael.

¹⁹ “Mă-lei tơdah iĕm weh trong plơ̆ng, achăng lê̆ tơdrong juăt păng nơ̆r Inh tơtă mă đei ăn kơ lu iĕm, na jang păng kơkuh kơ yang kơnê̆,

²⁰ lei Inh gô buch hŭt lê̆ lu iĕm đơ̆ng lăm teh đak mă Inh đei ăn kơ lu iĕm; Inh gô achăng lê̆ hnam akŭm âu đơ̆ng anăp Inh, hnam mă Inh 'măn lê̆ 'lơ̆ng rơgoh kơ Anăn Inh boih, Inh gô ăn kơ sư jing nơ̆r đe pơđơ̆k pơjăm pơjuă lăm kon pơlei nai.

²¹ Hnam 'nâu mă khan kơjung rŏ dang yơ, dah đei bu yak rok noh 'bôh hlĭch na jet! “Yua kơ kiơ Kră Yang pơm kơ char 'nâu păng hnam 'nâu thoi noh?”

²² Na đe tơl thoi âu: ‘Yua kơ lu sư achăng lê̆ Kră Yang 'Bok Kei-Dei 'bok yă lu sư, Tơ'ngla mă chông tơlĕch lu sư đơ̆ng dêh char Êyiptơ păng yua kơ lu sư kiơ̆ yang nai, kơkuh păng jang ăn kơ lu yang noh, lei na Kră Yang ăn tơdrong truh răm 'nâu tơ lu sư.’ ”