II Ho 6 - Sơ̆p Hlabơar Nơ̆r 'Bok Kei-Dei

Sôlômôn krao khan wă pơih hnam Akŭm

¹ Pơtao Sôlômôn khan: “Kră Yang khan Ih khan gô oei lăm hơmơ̆l găm hơ'bơ̆l

² Dang ei inh đei pơm boih minh pôm hnam ăn kơ Ih oei, anih mă Ih gô oei ling-lang.”

³ Đơ̆ng noh pơtao hue tơ rŏng sơkat pŭn hiôk ăn kơ đĭ-đăng kon pơlei Isơrael akŭm oei dơ̆ng tơ noh.

⁴ Sư khan: “Kơkuh bơnê tơpă kơ Kră Yang, 'Bok Kei-Dei Isơrael, tơ'ngla mă pơkă pơ'ngam hăm Đawit, 'bă inh iŏk ti Sư gô pơm keh dôm nơ̆r đêl Sư pơkă noh. Sư khan:

⁵ ‘Đơ̆ng năr Inh chông tơlĕch kon pơlei pơla inh đơ̆ng dêh char Êyiptơ, Inh ưh tam mă đei rơih iŏk ôh pơlei ayơ đơ̆ng lăm lu adrĕch Isơrael wă pơm hnam kơ Anăn Inh tơ noh păng Inh kư̆m tam mă đei rơih bu pơm pơtao pơgơ̆r lu bơngai Isơrael Inh;

⁶ Mă-lei Inh đei rơih boih Jêrusalem, wă kơ Anăn Inh tơ noh păng rơih Đawit wă pơgơ̆r kon pơlei pơla Inh Isơrael.’ ”

⁷ Lăm jơhngơ̆m 'bă inh Đawit đei boih đon tơchĕng wă pơm hnam ăn kơ Kră Yang 'Bok Kei-Dei bơngai Isơrael.

⁸ Mă-lei Kră Yang khan kơ 'bă inh Đawit: “Yua kơ lăm jơhngơ̆m Ih đei boih khan wă 'maih pơm hnam ăn kơ Anăn Inh, ih tơchĕng 'lơ̆ng tơpă boih.

⁹ Lei ră ih ưh kơ pơm hnam ăn kơ Anăn Inh ôh, mă-lei kon drŏ-nglo ih gô pơm hnam noh ăn kơ Anăn Inh,”

¹⁰ “Kră Yang pơsĭt pơkeh boih đêl nơ̆r Sư pơkă, ăn kơ inh wă pơtrơp ioi Đawit, 'bă inh, pơm pơtao pơgơ̆r bơngai Isơrael, thoi nơ̆r Kră Yang đei pơkă, na inh tơiung pơdơ̆ng pơm boih hnam ăn kơ Anăn Kră Yang 'Bok Kei-Dei bơngai Isơrael,

¹¹ Tơ hnam noh inh đei tah boih Hom Pơgơ̆p đơ̆ng Kră Yang mă đei pơgơ̆p hăm bơngai Isơrael.”

¹² Sôlômôn oei dơ̆ng 'bơ̆t anăp chơnang soi Kră Yang, anăp kon pơlei oei akŭm, sư yơ̆r ti.

¹³ Sư pơm boih minh pôm hơdrơ̆l hăm kong, tor sư pơđăm hơgăt, wơ̆l pơđăm hơgăt, kơjung pêng hơgăt, dan 'bơ̆t tŏk-bŏk cham; sư dơ̆ng tơ noh sơtơ̆p kŭl-tăng 'bơ̆t anăp lu bơngai Isơrael akŭm, yơ̆r ti tơ plĕnh.

¹⁴ Sư khan: “Bơnê kơkuh kơ Ih Kră Yang 'Bok Kei-Dei Isơrael kơpal plĕnh păng ala teh ưh kơ đei yang kiơ nai mă thoi Ih wei răk dôm nơ̆r đêl pơkă wă 'mêm mơnat kơ đĭch đam Ih, mưh lu sư đĭ jơhngơ̆m năm kiơ̆ Ih.

¹⁵ Hăm đĭch đam Ih Đawit, 'bă inh, Ih oei răk dôm nơ̆r mă Ih đei pơkăm hăm sư sĭt tơpă đơ̆ng nơ̆r Ih đei pơkă hăm ti Ih pơm pơkeh hloi thoi mă đei boih dang ei.

¹⁶ Dang ei, ơ Kră Yang 'Bok Kei-Dei Isơrael răk bĕ nơ̆r Ih đei pơkă boih hăm 'bă inh, Đawit đĭch đam Ih, thoi âu: “'Bơ̆t anăp Inh ưh kơ đei khăi ôh kơ bơngai pơtrơp pơm pơtao pơgơ̆r lu bơngai Isơrael tơdah kon sâu ih mă pơ'lơ̆ng trong lu sư yak, wei răk khôi juăt Inh, thoi ih đei pơm boih 'bơ̆t anăp Inh.”

¹⁷ Ơ Kră Yang 'Bok Kei-Dei Isơrael ăn tơdrong mă Ih đei pơkă hăm Đawit đĭch đam Ih gơh jing.

¹⁸ Hăm tơpă Kră Yang 'Bok Kei-Dei oei hơdai hăm kon bơngai tơ ala teh âu? Tơ plĕnh mă đĭ hơtăl plĕnh, kư̆m ưh kơmah kơ Ih, pơma kiơ hnam mă inh pơm boih 'nâu!

¹⁹ Mă khan lei ră, ơ Kră Yang 'Bok Kei-Dei inh apinh Ih mơ̆ng nơ̆r krao khan apinh đơ̆ng inh đĭch đam ih, mơ̆ng nơ̆r apinh hơdrĭ đơ̆ng đĭch đam Ih hơpơi apinh 'bơ̆t anăp Ih.

²⁰ Apinh măt Ih lăng păng wei hnam âu măng păng năr, hnam âu Ih đei khan boih ih gô 'măn Anăn Ih tơ noh. Apinh Ih mơ̆ng lu đĭch đam Ih krao apinh Ih tơ gah anih âu.

²¹ Apinh Ih mơ̆ng lu đĭch đam Ih păng kon pơlei Ih Isơrael krao apinh Ih tơ gah anih 'nâu, apinh Ih mơ̆ng đơ̆ng plĕnh anih mă Ih oei tơl tơwih nơ̆r apinh păng mơnat ăn.

²² Tơdah đei bơngai pơm yoch hăm lu rông 'bôt sư păng đe athei Sư khŏm pơkă, bơngai noh năm dơ̆ng pơkă 'bơ̆t anăp chơnang soi Ih lăm hnam âu,

²³ apinh Kră Yang đơ̆ng kơpal plĕnh ti mơ̆ng nơ̆r sư păng pơm. Sek tơlang kơ lu đĭch đam Ih, pơm tơwih bĕ kơ bơngai pơm kơnê̆, kiơ̆ thoi tơdrong kơnê̆ sư đei pơm, ăn kơ tơdrong yoch sư pơm noh tuh tơ kơpal kơ̆l sư kơdih. Pơm mă hơdah kơ bơngai tơpăt kiơ̆ kơ tơdrong tơpăt sư pơm.

²⁴ Tơdah adrĕch Isơrael Ih pơm yoch hăm Ih, lu ayăt blah lu sư thuơ, na sư wih brŏk tơ Ih, băt kơ tơbral krao chă anăn Ih păng krao apinh Ih tơ hnam akŭm 'nâu,

²⁵ lei apinh Ih đơ̆ng kơpal plĕnh ti mơ̆ng păng mơnat ăn kơ tơdrong yoch lu adrĕch Isơrael kon pơlei Ih păng ăn kơ lu sư wih brŏk tơ teh đak mă Ih đei ăn boih kơ lu sư păng yă 'bok lu sư sơ̆.

²⁶ Mưh plĕnh tang đĭ ưh kơ đei 'mi, yua kơ đơ̆ng kon pơlei Isơrael pơm yoch hăm Ih na lu sư tơkan tơ hnam âu krao pôk anăn Ih tơbral yoch kơdih yua kơ Ih phak lu sư pơmat-tat boih.

²⁷ Lei apinh Ih Kră Yang oei kơpal plĕnh mơ̆ng bĕ păng mơnat ăn kơ tơdrong yoch lu đĭch đam Ih bơngai Isơrael Ih. Tơpă Ih đei bơtho tơ'bôh ăn boih trong 'lơ̆ng wă kơ lu sư yak kiơ̆, ăn 'mi jur tơ teh mă Ih đei ăn kơ kon pơlei Ih jang sa.

²⁸ Tơdah lăm char đei tơdrong pơngot rơwĕt lôch hơbuh, phang-ang hơ'bo 'ba ôm phơ̆k, lep 'ba lep tung-nut; kăp pơrăm dah đei lu ayăt wang dăr lu pơlei tih dah đei tơdrong gleh, jĭ jăn truh.

²⁹ Dah đei bơngai bu dah đĭ-đăng kon pơlei bơngai Isơrael Ih rim 'nu băt hlôh kơ tơdrong gleh pơmat păng jĭ jăn kơdih, na yơ̆r ti tơ gah hnam 'nâu, krao apinh,

³⁰ apinh Kră Yang đơ̆ng kơpal plĕnh anih Ih oei, mơ̆ng, mơnat ăn păng pơdrâu tơwih kơ lu sư rim 'nu kiơ̆ thoi lu sư đei tơbral Ih băt nhen kơ jơhngơ̆m klơm klak lu sư; tơpă lăp minh 'nu Ih đĕch băt hơđăl kơ jơhngơ̆m klơm klak kon bơngai

³¹ Wă kơ lu sư hli yom kơ Ih, kiơ̆ trong Ih đĭ chăl arih oei lăm ala teh mă Ih đei ăn boih kơ lu 'bok yă lu nhôn.

³² Kŭm thoi noh mơ̆n gah lu bơngai tơmoi, ưh kơ trŏ kơ adrĕch bơngai Isơrael Ih ôh, mă-lei yua kơ anăn Ih kơkŏng ti mơsêh mơyang Ih, mưh lu sư krao khan tơ gah hnam âu,

³³ apinh Ih Kră Yang đơ̆ng kơpal plĕnh, anih Ih oei, mơ̆ng bĕ păng pơm ăn bĕ kiơ̆ kơ tơdrong lu Sư hơpơi apinh Ih wă kơ đĭ-đăng kon bơngai oei kơpal teh âu băt ư-ang kơ Ih băt hli yom kơ Ih kư̆m thoi lu bơngai Isơrael Ih păng băt kơ hnam âu mă inh đei pơm krao anăn Ih.

³⁴ Mưh kon pơlei Ih năm tơblah hăm lu bơngai ayăt mă tơ yơ yơ Ih wơh, tơdah lu sư krao apinh 'blŏk kơ pơlei tih mă Ih đei rơih iŏk păng gah hnam mă inh đei pơm hăm anăn Ih 'nâu.

³⁵ Lei apinh Ih đơ̆ng kơpal plĕnh mơ̆ng bĕ nơ̆r lu sư krao Ih tơgŭm bĕ tơdrong lu sư apinh.

³⁶ Mưh lu sư pơm yoch hăm Ih yua kơ ưh kơ đei bu mă huay kơ pơm yoch păng Ih hil mĭl jao lu sư tơ lu ayăt kơ lu sư, lu bơngai ayăt rôp lu sư pơm bơnă chông tơ dêh char nai ataih dah jê̆;

³⁷ tơdah lăm char mă lu sư pơm bơnă, na tơbral păng krao khan apinh Ih thoi âu: ‘Lu nhôn pơm yoch, pơm tơdrong kơnê̆ păng kư̆ kă,’

³⁸ tơdah lăm char mă lu sư pơm bơnă, lu sư đĭ jơhngơ̆m đĭ đon wih brŏk tơ Ih, krao khan apinh Ih păng 'blŏk kơ dêh char mă Ih đei ăn boih kơ 'bok yă lu sư, pơlei tih mă Ih đei rơih, păng hnam mă inh đei pơm hăm anăn Ih 'nâu,

³⁹ lei na apinh ih đơ̆ng kơpal plĕnh ti anih mă Ih oei, mơ̆ng bĕ nơ̆r lu sư krao apinh, dŏng tơgŭm lu sư păng mơnat ăn lê̆ pă jô̆ yo kơ tơdrong yoch mă kon pơlei pơla đei pơm hăm Ih.

⁴⁰ Kră Yang 'Bok Kei-Dei inh! Inh krao apinh Ih lăng păng mơ̆ng nơ̆r krao apinh Ih đơ̆ng anih 'nâu.

⁴¹ Dang ei, ơ Kră Yang 'Bok Kei-Dei, apinh Ih păng Hom Pơgơ̆p mơsêh mơyang Ih mơ̆t lăm anih pơdơh âu, Apinh Ih ơ Kră Yang 'Bok Kei-Dei! Hơpơi kơ lu 'bok soi đei hrŭk iŏk tơdrong dŏng pơklaih. Ăn kơ lu bơngai 'lơ̆ng rơgoh Ih chơt hiôk lăm tơdrong Ih 'mêm mơnat!

⁴² Ơ Kră Yang 'Bok Kei-Dei, apinh Ih 'nĕ achăng lê̆ bơngai mă Ih rơih đe tuh đak rơmă; 'blŏk bĕ tơdrong Ih pơkă 'mêm mơnat kơ pơtao Đawit, đĭch đam Ih.”