II Ho 4 - Sơ̆p Hlabơar Nơ̆r 'Bok Kei-Dei

Tơmam yua lăm Hnam Akŭm

¹ Sư pơm chơnang soi hăm kong, tor kơjung 'bar-jĭt hơgăt, wơ̆l 'bar-jĭt hơgăt, kơjung mơjĭt hơgăt.

² Sư hling minh pôm Bơng hăm kong, wĭl hơpôm dang ăi đơ̆ng âu truh tơ to mơjĭt hơgăt, jrŭ sư pơđăm hơgăt; sư pơtŏ tăp dăr pêng-jĭt hơgăt.

³ Ala gơnăp bơng đei rup rơmo tơno, rim kơ minh hơgăt đei rup rơmo mơjĭt tŏ hling 'bar trong, hling kơtă hơdai bơng,

⁴ Bơng dan kơpal mơjĭt-'bar tŏ rup rơmo, pêng tŏ tơwih muh măt tơ gah yă-nơ̆m, pêng tŏ tơwih muh măt tơ gah bơmơ̆t, pêng tŏ tơwih muh măt tơ gah gơal păng pêng tŏ rup rơmo noh tơwih muh măt tơ gah hơlĕch rŏng tơwih tơ lăm.

⁵ Hơ'bơ̆l sư tŏ pah, 'bơ̆r sư thoi 'bơ̆r kơchŏk, thoi pơkao tŏng-mŏng 'nao tơlang; bơng mong đak dang tơdrâu-jĭt tơdrâu-rơbâu lit.

⁶ Sư kư̆m đei pơm mơjĭt tŏ bơng iĕ, wă ôp hơrao dan pơđăm tŏ gah gơal, pơđăm tŏ gah yă-nơ̆m, wă ôp dôm lu tơmam soi 'buh; bơng tih wă lê̆ kơ lu 'bok soi ôp hơrao tơ noh,

⁷ Sư pơm mơjĭt tŏ jơ̆ng kơđeng hăm maih kiơ̆ kơ đei pơkă; na tah sư tơ lăm hnam akŭm, pơđăm tŏ gah gơal, pơđăm tŏ gah yă-nơ̆m.

⁸ Sư kư̆m pơm mơjĭt tŏ gơ'bang, tah lăm hnam akŭm, pơđăm tŏ gah gơal, pơđăm tŏ gah yă-nơ̆m, kư̆m đei pơm minh-hrĕng tŏ kơlăm păng maih wă mong pham.

⁹ Sư kư̆m đei man cham ăn kơ 'bok soi păng cham să, lu 'măng kơ cham să na lôm hăm kong rim kơ 'măng noh.

¹⁰ Sư lê̆ bơng tih gah gơal 'bơ̆t mum gah tơklă hơlĕch gơal.

¹¹ Huram kư̆m man gŏ tah ngar, gơ'bênh păng pơnhan tô. Huram pơm keh tôm dôm tơdrong mă đơ̆ng pơtao Sôlômôn jao ăn kơ sư lăm hnam Kră Yang 'Bok Kei-Dei;

¹² Đei 'bar tŏ jrăng păng đei 'bar tŏ pơnhan pơkao tŏng-mŏng kơpal kơ 'bar tŏ kơ̆l jrăng, đei lu hơdrao klơ̆p lê̆ kơpal kơ̆l jrăng;

¹³ đei puăn-hrĕng tŏ plei gărnăt pơklep tơ 'bar tŏ glang dăng tăp kơ pơnhan pơkao, đei 'bar trong plei gărnăt wăn dăr kơpal kơ̆l jrăng;

¹⁴ sư kư̆m pơm jơ̆ng tơjră păng dan bơng iĕ kơpal jơ̆ng tơjră noh;

¹⁵ bơng tih dan kơpal rup mơjĭt-'bar tŏ rơmo;

¹⁶ pơm gŏ mong ngar, gơ'bênh, pơnai hrêu păng đĭ-đăng tơmam yua lăm noh: Huram Abi pơm ăn kơ pơtao Sôlômôn hling hăm kong iel rang wă yua lăm hnam Kră Yang.

¹⁷ Pơtao athei pơm không hăm teh man hling lu tơmam noh tơ tơmăn glă đak Krong Jôrđăn, sơlam pơlei Sukôt hăm pơlei Sêrêda.

¹⁸ Pơtao Sôlômôn man pơm đĭ-đăng lu tơmam noh lơ tơpă yua kong pơm pă kĕ jô̆ dôm yơ.

¹⁹ Sôlômôn pơm đĭ-đăng lu tơmam yua lăm hnam Kră Yang 'Bok Kei-Dei; chơnang soi maih, lu gơ'bang yua wă dan 'bĕng rơgoh;

²⁰ jơ̆ng kơđeng, akâu kơđeng păng maih se rơgoh wă soh tơ̆k ŭnh 'bơ̆t anăp Anih 'lơ̆ng Rơgoh hloh, kiơ̆ thoi đei pơkă;

²¹ lu pơkao ŭnh kơđeng păng, chơkep tơpăt pơm ham maih se rơgoh;

²² Săng chơkep kăt brai kơlăm mong pham, pơnhan, bô̆i tah tơmam 'bâu phu, kư̆m pơm hăm maih se; lu măng hnam akŭm, lu tơnang 'măng lăm anih 'lơ̆ng Rơgoh Hloh păng lu 'măng hnam Kră Yang 'Bok Kei-Dei tă kơ pơm păng maih se ngăl.