II Ho 31 - Sơ̆p Hlabơar Nơ̆r 'Bok Kei-Dei

¹ Wă đĭ-đăng tơdrong noh đang boih, lu bơngai Isơrael mă oei tơ noh lu sư năm tơ lu pơlei lăm char Juđa teh pơchah lê̆ lu jrăng gơ̆ng, teh pơhĕch lê̆ lu rup yang Asêria, pơrăm đĭ lu anih kơjung păng lu chơnang soi tơ lăm jơ̆p char Juđa, Bênjamin, Êphraim păng Manase dĭng pơrăm đi boih. Đơ̆ng noh đĭ-đăng lu kon pơlei Isơrael wih brŏk tơ pơlei lu sư kơdih tơ anih hnam lu sư.

Tơmam pơyơ̆r

² Hesekia klah asong lu 'bok soi păng lu bơngai Lêwi, kiơ̆ kơ khŭl tơdrong jang lu sư, wă pơyơ̆r tơmam soi 'buh păng tơmam soi pơyơ̆r kơ 'blŏk bơnê, wă kơkuh bơnê păng hơri ư-ang tơ anih lu 'măng jang cham Hnam Kră Yang.

³ Pơtao ăn tơmam soi sư kơdih wă pơyơ̆r pơm tơmam soi 'buh kiơ̆ pơgê kiơ̆ kơsơ̆, lăm năr giĕng Sa'bat, năr khei tơ'bang blŭng-a păng lăm lu năr giĕng tih kiơ̆ thoi đei chih răk lăm sơ̆p hla bơar khôi juăt Kră Yang.

⁴ Sư kư̆m athei lu kon pơlei mă oei lăm pơlei Jêrusalem asong ăn tơmam kơ lu 'bok soi păng bơngai Lêwi, wă kơ lu sư gơh jao lu sư kơdih awih awăn kiơ̆ khôi juăt Kră Yang.

⁵ Mưh đei nơ̆r pơtao tơtă truh boih kon pơlei Isơrael năm ba tơmam pơyơ̆r plei blŭng-a lăm bơyan thoi 'ba hơ'bo, Sik hơmu, rơmă ôliwơ, đak sut păng lu tơmam plei đơ̆ng mir chŭn; lu sư kư̆m năm ba pơyơ̆r minh lăm mơjĭt đơ̆ng dôm tơmam, lơ tơpă.

⁶ Bơngai Isơrael păng lu bơngai Juđa oei tơ lăm lu pơlei lăm char Juđa, kư̆m đei năm ba pơyơ̆r minh lăm mơjĭt lu sem dơrong rơmo, triu, bơbe pơyơ̆r minh lăm mơjĭt đơ̆ng dôm tơmam mă đei klah lê̆ pha 'lơ̆ng rơgoh ăn kơ Kră Yang 'Bok Kei-Dei lu sư; na dan hơdrom lê̆ minh 'bôt.

⁷ Khei mă pêng lu sư pơtơm pơyơ̆r tơmam akŭm pơpôi minh 'bôt, đơ̆ng khei pêng truh tơ khei tơpơh.

⁸ Wă Hesekia păng lu yŏng pơgơ̆r truh, 'bôh lu pôi noh na bơnê ư-ang kơ Kră Yang păng kon pơlei Isơrael.

⁹ Hesekia apinh lu 'bok soi păng lu bơngai Lêwi gah pôi đe hơdrom lê̆ tơmam soi noh.

¹⁰ Asaria 'bok soi tơm, đơ̆ng adrĕch Sadok, tơl sư khan: “Đơ̆ng lu kon pơlei pơtơm pơyơ̆r tơmam tơ Hnam Kră Yang lu nhôn đei sŏng sa mah păng kư̆m oei rơkah lơ, yua kơ Kră Yang ăn boih kơ kon pơlei sư đei pŭn hiôk; na mă đei rơkah lơ 'nâu.

¹¹ Hesekia athei đe hơmet lu anih mong tơ Hnam Kră Yang; na lu đe hơmet lu hnam noh.

¹² Đei jơhngơ̆m tơpăt ba pơyơ̆r lu tơmam noh, gah tơmam minh lăm mơjĭt păng tơmam rơgoh tah tơmơ̆t. Kônania bơngai wei-lăng tơm hnam anih tah tơmam noh; oh sư Simei pơm kơiĕng sư, bre sư bơngai Lêwi.

¹³ Pơtao Hesekia păng Asaria, 'bok soi wei-lăng tơm lăm Hnam Kră Yang jao ăn kơ đe Jêhiêl, Asaria, Nahat, Asahel, Jêrimôt, Jôsabat, Êliel, Ismakia, Mahat păng Bênaia lu sư kư̆m bơngai tơgŭm wei-lăng đơ̆ng rŏng kơ Kônania păng Simei oh sư,

¹⁴ Kôrê kon drŏ-nglo Imna, bơngai Lêwi bơngai wei 'Măng Jang Hơlĕch, sư yŏng wei-lăng tơmam đe pơyơ̆r kơ Kră Yang 'Bok Kei-Dei hăm jơhngơ̆m hiôk păng lu tơmam 'lơ̆ng rơgoh.

¹⁵ Đơ̆ng rŏng kơ sư đei Êđen, Miniamin, Jêsua, Sêmaia, Amaria păng Sêkania, lu sư asong ăn tơmam noh kơ lăm lu pơlei 'bok soi lu 'bok soi asong kơ lu 'nhŏng oh sư, hơtŏ hơnơ̆ng mă 'lơ̆p mă 'lŏ, kiơ̆ kơ khŭl lu sư.

¹⁶ Kŭm asong kơ lu drŏ-nglo đei chih tơmơ̆t boih anăn lu sư lăm sơ̆p hla bơar jô̆ kiơ̆ adrĕch 'bok lu sư iŏk đơ̆ng pêng sơnăm tơ kơpal, kiơ̆ kơ khŭl lu sư gô mơ̆t bơ̆jang rim năr lăm hnam Kră Yang kiơ̆ kơ khŭl đei asong.

¹⁷ Lu sư kư̆m asong ăn kơ lu 'bok soi kiơ̆ kơ hnam dơnŏ 'bă lu sư păng lu bơngai Lêwi iŏk đơ̆ng 'bar-jĭt sơnăm tơ kơpal, asong kiơ̆ kơ tơdrong jang păng kiơ̆ kơ khŭl lu sư;

¹⁸ Lu 'bok soi đe kư̆m chih anăn lu sư hơdai hăm đĭ-đăng lu kon drŏ-nglo kon drŏ-kăn akăn lu sư, yua kơ lu sư tơpăt pơyơ̆r akâu kơdih.

¹⁹ Gah lu 'bok soi kon sâu Arôn, mă oei tơ mir na, tơ jê̆ kơ pơlei lu sư, dah oei tơ lăm rim pơlei nai, lu sư jang asong tơmam kơ đĭ-đăng kon drŏ-nglo lăm lu 'bok soi păng lăm lu bơngai Lêwi chih jô̆ boih lăm adrĕch 'bok lu sư.

²⁰ Tơ jơ̆p lăm char Juđa, Hesekia pơm thoi noh, sư pơm tơdrong 'lơ̆ng tơpăt 'bơ̆t anăp Kră Yang 'Bok Kei-Dei lu sư.

²¹ Dôm tơdrong jang sư pơm, gah Hnam Kră Yang 'Bok Kei-Dei gah tơdrong wei răk khôi juăt păng nơ̆r tơtă, gah tơdrong chă Kră Yang 'Bok Kei-Dei sư jang đĭ jơhngơ̆m, na tơdrong jang sư rai tŏk keh 'lơ̆ng.