II Ho 30 - Sơ̆p Hlabơar Nơ̆r 'Bok Kei-Dei

Hesekia pơm giĕng Năm Brih

¹ Hesekia đei gơih nơ̆r sư kơ đĭ-đăng bơngai Isơrael păng lu bơngai Juđa, sư kư̆m chih hla bơar gơih ăn kơ bơngai Êphraim păng lu adrĕch Manase, wă kơ lu sư năm tơ Hnam Kră Yang tơ pơlei Jêrusalem, wă wang pơm giĕng Năm Brih 'blŏk hơdơ̆r kơ Kră Yang 'Bok Kei-Dei Isơrael.

² Pơtao păng lu yŏng pơgơ̆r hăm đĭ-đăng lu kon pơlei akŭm lăm pơlei Jêrusalem pơđâu băl, pơkă wă năm pơm giĕng Năm brih lăm khei mă 'bar;

³ Lu sư ưh kơ gơh năm pơm giĕng Năm Brih kơplah noh, yua kơ lu 'bok soi hơmet akâu kơdih rơgoh ưh tam mă tôm mah păng lu kon pơlei kư̆m tam tôm akŭm băl tơ pơlei Jêrusalem.

⁴ Pơtao păng đĭ-đăng lu kon pơlei lăng tơdă akŭm noh trŏ boih.

⁵ Lu sư tơtă pơkă wă chă roi tơbăt jơ̆p-jang kơ char Isơrael, iŏk đơ̆ng pơlei Bêrsêba truh tơ pơlei Đan, wă kơ kon pơlei năm pơm giĕng Năm Brih 'blŏk hơdơ̆r Kră Yang 'Bok Kei-Dei Isơrael tơ pơlei Jêrusalem; yua kơ lu sư ưh tam mă biơh năm pơm giĕng năm brih wă kơ 'blŏk hơdơ̆r kiơ̆ kơ tơdrong juăt đei pơkă sơ̆.

⁶ Thoi noh lu bơngai năm tơbăt tơ jơ̆p kơ dêh char Isơrael păng char Juđa năm ba hla bơar pơtao păng lu yŏng pơgơ̆r sư, kiơ̆ thoi pơtao đei pơkă khan: “Ơ kon sâu adrĕch Isơrael, wih brŏk bĕ tơ Kră Yang 'Bok Kei-Dei Abraham, Isăk păng Isơrael, wă kơ Sư kư̆m wih tơ lu iĕm bơngai mă oei hlot klaih đơ̆ng ti lu pơtao Asiri.

⁷ 'Nĕ pă pơm thoi 'bok păng 'nhŏng oh lu iĕm đei pơm yoch hăm Kră Yang 'Bok Kei-Dei 'bok lu sư, na Kră Yang pơrăm lu sư krưp tơpă thoi lu iĕm 'bôh.

⁸ 'Nĕ pă arăng kơ̆l thoi lu 'bok iĕm; chu bĕ Kră Yang, năm tơ anih rơgoh Sư mă 'măn lê̆ pha rơgoh ling-lang. Kơkuh ư-ang bĕ kơ Kră Yang 'Bok Kei-Dei lu iĕm, wă kơ Sư huay pă hil mĭl,

⁹ Tơdah lu iĕm wih brŏk tơ Kră Yang na 'nhŏng oh păng lu kon sâu iĕm gô đei mơnat 'bơ̆t anăp lu bơngai mă rôp lu sư pơm bơnă, lei na gô tơwih lu Sư brŏk tơ dêh char 'nâu, yua kơ Kră Yang 'Bok Kei-Dei lu iĕm Tơ'ngla găt băt 'mêm mơnat, huay pă tơwih rŏng kơ iĕm tơdah lu iĕm wih brŏk tơ Sư.”

¹⁰ Lu bơngai mă năm ba hla bơar năm tơ jơ̆p-jang đơ̆ng pơlei âu truh tơ pơlei nai lăm teh đak Êphraim, Manase păng truh tơ teh đak Sabulôn, đei bơngai hiĕk ăr che bơle kơ lu sư.

¹¹ Mă-lei đei lu mơ'nah đơ̆ng lăm teh đak Aser, Manase, hăm teh đak Sabulôn chu tơjur akâu păng năm truh tơ pơlei Jêrusalem.

¹² Kră Yang 'Bok Kei-Dei kư̆m tơgŭm lu bơngai Juđa pơm ăn kơ lu sư lăp đon 'maih wă pơm kiơ̆ nơ̆r pơtao păng yŏng pơgơ̆r đei tơtă, kiơ̆ thoi nơ̆r Kră Yang.

¹³ Lăm khei 'bar đei lơ bơngai năm akŭm tơ pơlei Jêrusalem, đei minh khŭl akŭm tih tơpă đei lơlang lơlap kon bơngai wă pơm giĕng 'Bĕng ưh kơ đei 'Buih Pông.

¹⁴ Lu sư iung iŏk hŭt lê̆ chơnang đe soi kơ yang nai lăm pơlei Jêrusalem păng chơnang soh 'long 'bâu phu, klơ̆m hŭt lê̆ đĭ tơ lăm thŭng Kidrôn.

¹⁵ Lăm năr mơjĭt-puăn khei 'bar, đe 'bet triu pơm giĕng Năm Brih; gah lu 'bok soi păng bơngai Lêwi 'bôh mơlâu, na hơmet akâu kơdih rơgoh păng chĕp lu kon sem pơm tơmam soi 'buh tơ Hnam Kră Yang.

¹⁶ Lu sư oei đơ̆ng 'bơ̆t anih lu sư kơdih, kiơ̆ thoi khôi juăt Môis bơngai Kră Yang 'Bok Kei-Dei tơtă 'bok soi iŏk pham đơ̆ng bơngai Lêwi na tơtreh.

¹⁷ Lăm khŭl akŭm đei lu mơ'nah tam mă hơmet akâu kơdih rơgoh, na bơngai Lêwi athei 'bet kon sem tơmam soi pơm giĕng Năm Brih ăn kơ lu sư, wă kơ lu Sư pơyơ̆r rơgoh ăn kơ Kră Yang.

¹⁸ Mă khan đei lơ mơ'nah đơ̆ng adrĕch Êphraim, Manase, Isakar păng Sabulôn tam mă hơmet akâu rơgoh kư̆m sa 'nhĕm giĕng Năm brih, ưh kơ kiơ̆ tơdrong juăt mă đei chih răk; mă-lei Hesekia krao khan ăn kơ lu sư:

¹⁹ “Hơpơi apinh Kră Yang Tơ'ngla dim, 'nĕ kơ jô̆ yo kơ lu bơngai mă đĭ jơhngơ̆m chă Kră Yang 'Bok Kei-Dei lu 'bok sư, mă khan lu sư tam kiơ̆ hơmet akâu kơdih rơgoh kiơ̆ thoi tơdrong juăt hnam akŭm rơgoh.”

²⁰ Kră Yang kơtơ̆ng bơih nơ̆r Hesekia krao khan, na pơklaih kon pơlei.

²¹ Lu bơngai Isơrael oei tơ lăm pơlei Jêrusalem chơt hiôk pơm giĕng sa 'bĕng ưh kơ đei 'Buih Pông lăm tơpơh năr. Lu bơngai Lêwi păng lu 'bok soi rim năr reh brŏ hat hơri bơnê ư-ang kơ Kră Yang.

²² Hesekia pơma pơhiôk jơhngơ̆m lu bơngai Lêwi đei đon hlôh wao bơ̆jang kơ Kră Yang. Lu sư sŏng sa lăm tơpơh năr păng pơyơ̆r tơmam soi 'blŏk bơnê kơ Kră Yang 'Bok Kei-Dei lu 'bok lu sư.

²³ Đĭ-đăng lu tơpôl akŭm pơkă lăm đon wă pơm giĕng Năm Brih 'nâu pă tơpơh năr dơ̆ng; lei na lu sư ngôi chơt hiôk thim pă tơpơh năr dơ̆ng.

²⁴ Hesekia pơtao Juđa, đei asong ăn kơ tơpôl akŭm noh minh-rơbâu tŏ rơmo tơno păng tơpơh-rơbâu tŏ triu bơbe; lu yŏng pơgơ̆r kư̆m asong ăn kơ tơpôl akŭm minh-rơbâu tŏ rơmo tơno păng mơjĭt-rơbâu tŏ triu, bơbe. Đei lơ lu 'bok soi hơmet akâu lu sư rơgoh.

²⁵ Đĭ-đăng lu bơngai tơpôl akŭm bơngai Juđa, lu 'bok soi, bơngai Lêwi păng lu tơpôl bơngai Isơrael kư̆m đei lu bơngai tơmoi năm đơ̆ng Isơrael, Juđa wang chơt hiôk.

²⁶ Lăm pơlei Jêrusalem đei tơdrong chơt hiôk tih; đơ̆ng chăl Sôlômôn kon drŏ-nglo Đawit pơtao Isơrael, lăm pơlei Jêrusalem ưh tam biơh đei tơdrong chơt hiôk thoi noh.

²⁷ Lu 'bok soi păng lu bơngai Lêwi iung sơkat pŭn hiôk ăn kơ kon pơlei; nơ̆r sơkat nơ̆r lu sư krao khan kơtơ̆ng truh tơ anih rơgoh Kră Yang, truh tơ plĕnh na Kră Yang tơl tơwih ăn pŭn hiôk.