II Ho 3 - Sơ̆p Hlabơar Nơ̆r 'Bok Kei-Dei

Sôlômôn pơm hnam Kră Yang

¹ Sôlômôn pơtơm pơm hnam akŭm kơ Kră Yang lăm pơlei Jêrusalem, kơpal kông Môria, anih mă Kră Yang đei jur tơ'bôh kơ Đawit, 'bă sư, tơ anih mă Đawit đei rơ̆ng hơmet, 'bơ̆t anih pơjuă 'ba Arauna, bơngai Jêbus.

² Sôlômôn pơtơm pơm hnam akŭm năr mă 'bar khei 'bar, sơnăm mă puăn lăm chăl sư pơgơ̆r.

³ 'Nâu hơnă mă Sôlômôn đei man wă pơm hnam Kră Yang 'Bok Kei-Dei: Să, kiơ̆ kơ hơgăt sơ̆, tor Sư tơdrâu-jĭt hơgăt; wơ̆l 'bar-jĭt hơgăt.

⁴ Kơdeng gah anăp, tor să 'bar-jĭt hơgăt, hơtŏ kơ wơ̆l hnam akŭm; kơjung 'bar-jĭt hơgăt. Sư lom klơ̆p hăm maih se tơ lăm.

⁵ Tơnăr hnam akŭm, đe pĕng păng tơ̆r 'long hơngo lom hăm maih se, chhơ̆ rup 'long gol păng chhơ̆ rup glang tơ noh.

⁶ Đe pơgong hăm tơmo rang gĭt wă pơhrôp sư; maih noh maih đơ̆ng char Parwai,

⁷ Hnam akŭm sư lom hăm maih, tơ̆r roh hơdrông, không 'măng, tơnăr păng 'măng hnam akŭm, 'bơ̆t tơnăr đe chhơ̆ rup chêrubim.

⁸ Sư kư̆m man anih Rơgoh 'lơ̆ng Hloh tor sư 'bar-jĭt hơgăt wơ̆l sư 'bar-jĭt hơgăt, pơtao lom klơ̆p anih noh hăm maih se; maih noh kŏng đei 21tân.

⁹ Lu kơđĭnh maih kŏng trăp đei 1kĭ 1gram 5; sư kư̆m lom maih tơ anih kơpal.

¹⁰ Tơ lăm anih 'lơ̆ng Rơgoh Hloh, sư 'bok pơm kơtă 'bar tŏ chêrubim, lom hăm maih.

¹¹ Pơnăr chêrubim să 'bar-jĭt hơgăt; minh hlak pơnăr kơ minh pôm chêrubim gah 'ma kơjung pơđăm hơgăt, hơtŭt kơ tơnăr hnam akŭm; pơnăr minh pah kư̆m kơjung pơđăm hơgăt păng hơtŭt kơ pơnăr gah 'ngiĕo chêrubim mă 'bar.

¹² Minh pah pơnăr chêrubim mă 'bar kư̆m pơđăm hơgăt kơjung, hơtŭt kơ tơnăr hnam akŭm gah to; pơnăr minh pah dơ̆ng kư̆m kơjung pơđăm hơgăt, tơ'bưh hơtŭt kơ pơnăr chêrubim mă mônh.

¹³ Pơnăr 'bar tŏ chêrubim bơyar ngăl kơjung sư đei 'bar-jĭt hơgăt; 'bar tŏ chêrubim dang dơ̆ng tơwih măt tơ gah tơnăr Anih 'lơ̆ng Rơgoh.

¹⁴ Sư kư̆m pơm che pĕng iŏk brai jơk 'brê hơhĭm, 'brê gôh, tơ kơpal che 'bui se noh sĭt dônh pơm rup chêrubim.

¹⁵ Gah anăp hnam akŭm, sư man 'bar tŏ jrăng, kơjung pêng-jĭt pơđăm hơgăt, kơ̆l jrăng pơđăm hơgăt minh pôm jrăng.

¹⁶ Sư kư̆m pơm glang thoi rơbưn, đăng tơ kơpal kơ̆l jrăng păng pơm minh-hrĕng tŏ plei gărnăt man klep tơ glang noh.

¹⁷ Sư pơdơ̆ng jrăng noh 'bơ̆t anăp Hnam akŭm, minh pôm jrăng gah gơal, minh pôm jrăng gah yă-nơ̆m; anăn jrăng gah gơal noh Jakin păng jrăng gah yă-nơ̆m noh krao anăn Bôas.