II Ho 29 - Sơ̆p Hlabơar Nơ̆r 'Bok Kei-DeiHesekia pơm rơgoh hnam akŭm 1 Hesekia 'nao lăp 'bar-jĭt pơđăm sơnăm kơplah sư pơm pơtao; sư pơgơ̆r oei lăm pơlei Jêrusalem 'bar-jĭt tơsĭn sơnăm; mĕ sư anăn Abija kon drŏ-kăn Sachari. 2 Sư pơm tơdrong 'lơ̆ng tơpăt 'bơ̆t anăp Kră Yang thoi Đawit 'bok sư đei pơm boih. 3 Khei mônh sơnăm blŭng-a sư pơgơ̆r sư pơih 'măng hnam akŭm Kră Yang păng hơmet ming. 4 Sư krao lu 'bok soi păng bơngai Lêwi, akŭm lu sư tơ anih cham gah hơlĕch. 5 Sư khan: “Ơ bơngai Lêwi, mơ̆ng inh bĕ! Hơmet bĕ akâu iĕm kơdih rơgoh păng năm hơmet hnam Kră Yang 'Bok Kei-Dei 'bok lu iĕm mă rơgoh păng hơmet hŭt lê̆ bĕ đĭ dôm tơmam kơnê̆ 'mê̆ brư̆ đơ̆ng hnam 'lơ̆ng rơgoh. 6 Lu 'bok bơ̆n sơ̆ pơm glăi, pơm tơdrong kơnê̆ 'bơ̆t anăp Kră Yang 'Bok Kei-Dei lu bơ̆n; lu sư achăng hŭt lê̆ Kră Yang boih, đê̆ ưh pă 'maih lăng boih Anih Kră Yang oei păng tơwih rŏng kơ Sư. 7 Lu sư kư̆m chĭt lê̆ 'măng kơdeng, tơpăt lê̆ ŭnh kơđeng, ưh pă soh tơmam 'bâu phu păng ưh pă pơyơ̆r tơmam soi 'buh tơ anih rơgoh Kră Yang Isơrael. 8 Thoi ei na Kră Yang hil mĭl kơ lu bơngai Juđa păng kon pơlei Jêrusalem, Sư pơm ăn kơ đe hli tơrơ păng ăn kơ đe hiĕk ăr, thoi lu iĕm đei 'bôh tơm măt boih. 9 Yua kơ thoi noh na 'bă 'bok bơ̆n lôch răm kơ đao gưm, lu kon drŏ-nglo drŏ-kăn akăn bơ̆n đe rôp ba pơm bơnă. 10 Dang ei jơhngơ̆m inh wă pơm tơdrong pơgơ̆p hăm Kră Yang 'Bok Kei-Dei Isơrael, wă kơ tơdrong hil mĭl Sư ngach. 11 Ơ lu đe kon inh 'nĕ pă pơhiơ̆, yua kơ Kră Yang đei rơih iŏk boih lu iĕm jing đĭch đam Sư, wă kơ dơ̆ng 'bơ̆t anăp Sư, bơ̆jang kơ Sư soh tơmam 'bâu phu kơ Sư.” 12 'Nâu lu bơngai Lêwi iung jang: Đơ̆ng adrĕch Kôhat, đei Mahat kon drŏ-nglo Amasai, Jôel kon drŏ-nglo Asaria; đơ̆ng adrĕch Mêrari, đei Kis kon drŏ-nglo Apđi; Asaria kon drŏ-nglo Jêhalêlel; đơ̆ng adrĕch Gersôn, đei Jôa kon drŏ-nglo Simma, Êđen kon drŏ-nglo Jôa, 13 đơ̆ng adrĕch Êlisaphan đei: Simri păng Jêuel, đơ̆ng adrĕch Asap đei: Sachari păng Matania. 14 Đơ̆ng adrĕch Hêman đei: Jêhiel păng Simei; đơ̆ng adrĕch Jêđuthun đei: Sêmaia păng Usiel. 15 Lu sư akŭm lu 'nhŏng oh lu sư păng hơmet kơdih akâu rơgoh, na pơm kiơ̆ thoi pơtao đei bơtho khan kiơ̆ kơ nơ̆r Kră Yang hơmet rơgoh hnam Kră Yang. 16 Lu 'bok soi mơ̆t lăm hnam Kră Yang wă hơmet rơgoh; dôm tơmam kơnê̆ 'mê̆-'mach 'bôh lăm hnam Kră Yang, lu sư iŏk tơlĕch lê̆ tơ đaih 'bơ̆t cham hnam Kră Yang; đơ̆ng noh lu bơngai Lêwi dônh iŏk, na năm tung klơ̆m hŭt lê̆ tơ thong Kidrôn. 17 Năr mônh lăm khei mônh, lu sư pơtơm hơmet hnam Kră Yang rơgoh, truh năr tơhngam lăm khei noh lu sư hơmet rơgoh cham truh tơ kơđeng hnam Kră Yang. Lăm tơhngam năr dơ̆ng lu sư hơmet rơgoh hnam Kră Yang; truh tơ năr mơjĭt-tơdrâu khei mônh dôm tơdrong jang pơm keh đĭ. 18 Lu sư mơ̆t lăm hnam pơtao Hesekia păng khan: “Lu nhôn đei hơmet rơgoh đĭ boih hnam Kră Yang, chơnang soi pơyơ̆r tơmam soi 'buh păng đĭ tơmam yua, gô 'bang dan 'bĕng păng đĭ tơmam yua sư. 19 Đĭ-đăng lu tơmam mă đơ̆ng pơtao Ahas iŏk lê̆ 'bơ̆t Sư ưh kơchu Kră Yang lăm chăl sư pơgơ̆r, na lu nhôn dan hơmet păng pơm rơgoh; to, đĭ-đăng lu tơmam noh dan 'bơ̆t anăp chơnang soi Kră Yang.” 20 Pơtao Hesekia iung đơ̆ng hrôih krao akŭm lu yŏng pơgơ̆r lăm pơlei, năm tŏk tơ hnam Kră Yang; 21 lu Sư chĕp ba tơpơh tŏ rơmo tơno, tơpơh tŏ triu tơno, tơpơh tŏ triu kon păng tơpơh tŏ bơbe tơno wă pơm tơmam soi pơyơ̆r huai đơ̆ng yoch kơ char sư, kơ hnam rơgoh păng kơ kon pơlei Juđa. Pơtao athei lu 'bok soi kon sâu Arôn, soi pơyơ̆r lu kon sem noh tơ kơpal chơnang soi Kră Yang. 22 Lu sư 'bet rơmo tơno, 'bok soi mong iŏk pham sư na tơtreh tơ chơnang soi, 'bet triu tơno, mong pham tơtreh tơ kơpal chơnang; lu sư kư̆m pơlôch lu triu kon, kư̆m tơtreh pham tơ kơpal chơnang soi. 23 Lu sư kư̆m rôp iŏk bơbe tơno wă pơm tơmam soi huai đơ̆ng yoch năm tơ anăp pơtao păng lu kon pơlei akŭm, dan ti lu sư kơpal lu kon sem soi pơyơ̆r noh, 24 na 'bok soi pơlôch lu bơbe tơno noh păng mong pham tơtreh tơ kơpal chơnang soi noh wă pơm tơmam soi huai đơ̆ng yoch kơ đĭ-đăng kơ lu kon pơlei Isơrael, yua kơ pơtao đei athei khan pơyơ̆r tơmam soi 'buh wă huai đơ̆ng yoch kơ đĭ kon pơlei Isơrael. 25 Pơtao sư dan 'măn lê̆ lu bơngai Lêwi lăm Hnam Kră Yang chĕp chhar, brŏ dung, tĭng-nĭng kiơ̆ kơ Đawit, Gat 'bok 'bôh adrol, jang kơ pơtao păng Nathan 'bok khan lê̆ adrol, pơkă noh đơ̆ng Kră Yang ăn kơ lu 'bok khan lê̆ adrol tơbăt. 26 Lu bơngai Lêwi chĕp brŏ đơ̆ng Đawit, lu 'bok soi chĕp keng, 27 Hesekia athei đe pơyơ̆r tơmam soi 'buh, kơplah đe oei pơyơ̆r tơmam soi 'buh; kư̆m đei hơri bơnê kơ Kră Yang, hlôm keng reh brŏ đơ̆ng Đawit pơtao đe Isơrael, hơdai. 28 Đĭ-đăng kon pơlei drap kơkuh kơplah lu bơngai oei hơri, oei hlôm keng truh tơ pơyơ̆r tơmam soi keh đang. 29 Wă đang kơ pơyơ̆r tơmam soi boih, pơtao păng đĭ-đăng lu bơngai oei hơdai pơtao kŭp kơ̆l drap kơkuh bơnê. 30 Pơtao Hesekia păng lu yŏng pơgơ̆r athei bơngai Lêwi hat hơri bơnê kơ Kră Yang hăm nơ̆r hơri đơ̆ng Đawit păng Asap pơm, Asap, 'bok mă juăt kơ 'bôh adrol; lu sư hat hơri chơt hiôk kŭp kơ̆l kơkuh. 31 Hesekia khan: “Dang ei lu iĕm đei hơmet akâu kơdih rơgoh ăn kơ Kră Yang boih; lei na năm tơ âu, chĕp ba tơmam soi pơyơ̆r bơnê mơ̆t tơ lăm Hnam Kră Yang. Kon pơlei khŭl akŭm chĕp ba tơmam soi 'buh păng tơmam soi pơyơ̆r bơnê; lu bơngai đei jơhngơ̆m hiôk na chĕp ba năm pơyơ̆r lu tơmam soi 'buh noh. 32 Dôm lu sem tơmam soi 'buh pơyơ̆r đơ̆ng lu bơngai tơpôl akŭm pơyơ̆r chĕp ba đei tơpơh-jĭt tŏ rơmo tơno, minh-hrĕng tŏ triu tơno păng đei 'bar-hrĕng tŏ triu kon; lu sư yua sem dơrong noh pơyơ̆r wă pơm tơmam soi 'buh ăn kơ Kră Yang. 33 Jô̆ tơmam soi rơgoh tơdrâu-hrĕng tŏ rơmo tơno păng pêng-rơbâu tŏ triu hăm bơbe. 34 Mă-lei lu 'bok soi lu sư tŏ sĕt dêh ưh kơ kĕ kơ tam lŏng đĭ akar kon sem tơmam soi 'buh ôh; na đei lu 'nhŏng oh sư bơngai Lêwi hơmet akâu lu sư rơgoh kư̆m wang tơgŭm tơdrong jang noh dĭng truh keh, yua kơ lu bơngai Lêwi đĭ jơhngơ̆m pơyơ̆r akâu lu Sư hloh kơ lu 'bok soi. 35 Kŭm đei lơ tơmam soi 'buh hăm rơmă đơ̆ng tơmam soi 'blŏk bơnê păng tơmam soi huch hơdai hăm tơmam soi 'buh. Thoi ei, tơdrong soi pơyơ̆r 'buh ăn kơ Kră Yang đei pơm hơmet ming dơ̆ng lăm hnam Kră Yang. 36 Hesekia păng đĭ-đăng kon pơlei lu sư chơt hiôk kơ Kră Yang 'Bok Kei-Dei đei asong ăn kơ lu kon pơlei Sư na tơdrong jang âu tĕnh jah keh đang. |
©Bahnar Bible Association. All rights reserved.