II Ho 28 - Sơ̆p Hlabơar Nơ̆r 'Bok Kei-Dei

Ahas pơm pơtao Juđa

¹ Ahas sư 'nao 'bar-jĭt sơnăm 'bơ̆t sư pơm pơtao; sư pơgơ̆r mơjĭt-tơdrâu sơnăm lăm pơlei Jêrusalem, sư ưh kơ đei pơm 'lơ̆ng 'bơ̆t anăp Kră Yang thoi 'bok sư Đawit đei pơm;

² Sư kiơ̆ lu pơtao Isơrael, na kư̆m pơm tuh man rup yang Baal.

³ Sư soh pơyơ̆r tơmam 'bâu phu lăm Thŭng Ben Hinôm păng 'buh pơyơ̆r lu kon drŏ-nglo sư kơdih lăm ŭnh pơm tơmam soi, kiơ̆ kơ tơdrong kơnê̆ krưp dêh tơpă lu kon pơlei mă Kră Yang puh tơweh lê̆ lu sư đơ̆ng anăp lu bơngai Isơrael.

⁴ Lu sư pơyơ̆r tơmam soi păng soh 'long 'bâu phu tơ lu anih kơjung, tơ kơpal groi păng tơ ala tơnơm 'long đei yơ̆p Să.

⁵ Yua kơ thoi noh Kră Yang 'Bok Kei-Dei Sư jao sư tơ lăm ti pơtao char Siri; khŭl linh Siri blah rôp lu sư lơ pơm bơnă păng chông ba tơ pơlei Đamas. Kră Yang kư̆m jao sư tơ lăm ti pơtao Isơrael, lu sư thuơ tih tơpă,

⁶ lăm minh năr Pêka kon drŏ-nglo Rêmalia, đei pơlôch minh-hrĕng 'bar-jĭt rơbâu 'nu linh bơngai Juđa, tă kơ lu linh mă nuih kơtang ngăl, yua kơ lu sư achăng lê̆ Kră Yang 'Bok Kei-Dei 'bok lu sư.

⁷ Sikri minh 'nu bơngai nuih kơtang đơ̆ng char Êphraim pơlôch Maaseia, kon drŏ-nglo pơtao, Asrikam Yŏng wei hnam pơtao păng Êlkana, kơiĕng pơtao.

⁸ Khŭl linh Isơrael rôp 'bar-hrĕng rơbâu 'nu lu 'nhŏng oh lu sư pơm bơnă, drŏ-kăn, kon hơ'lơ̆p drŏ-nglo, drŏ-kăn păng kư̆m đei blah iŏk lu mŭk tơmam chĕp ba tơ pơlei Samari.

⁹ Tơ noh, đei minh 'nu 'bok khan lê̆ adrol Kră Yang anăn sư Ôdet, năm sơng lu linh brŏk tơ pơlei Samari păng khan: “'Nâu yua kơ Kră Yang 'Bok Kei-Dei 'bok lu iĕm hil kơ lu bơngai Juđa, na Sư đei pơjao đe Juđa lăm ti iĕm; mă-lei lu iĕm pơlôch lu sư lăm năr iĕm hil blĕk dêh mah truh tơ plĕnh.

¹⁰ Dang ei iĕm wă 'maih rôp lu bơngai Juđa păng lu bơngai lăm pơlei Jêrusalem pơm đĭch drŏ-nglo pơm đam drŏ-kăn kơ lu iĕm hă? Bĕ lu iĕm ưh kơ pơm yoch hăm Kră Yang 'Bok Kei-Dei lu iĕm hă?

¹¹ Na dang ei mơ̆ng bĕ inh, tơbrŏk đĭ-đăng lu bơnă mă đêl lu iĕm rôp noh lu 'nhŏng oh iĕm kơdih 'mơ̆i. Kră Yang oei hil mĭl kơ lu iĕm.”

¹² Kơplah noh đei lu bơngai yŏng pơgơ̆r đơ̆ng lăm lu bơngai Êphraim, Asaria kon drŏ-nglo Jôhanan, Bêrekia kon drŏ-nglo Mêsilemôt, Jêhiskia kon drŏ-nglo Sallum păng Amasa kon drŏ-nglo Hatlai, iung găn lu bơngai mă 'nao brŏk đơ̆ng tơblah:

¹³ Na lu sư khan: “Iĕm 'nĕ kơ tơmơ̆t lu bơnă tơ âu; Kơnh lu bơ̆n gô pơm yoch hăm Kră Yang, lu iĕm wă pơklăm thim tơdrong yoch lu bơ̆n rai dêh, yua kơ tơdrong yoch bơ̆n tih dêh boih na Kră Yang hil mĭl tơtŏ dêh truh kơ bơngai Isơrael.”

¹⁴ Thoi noh lu linh achăng lê̆ lu bơnă păng lu tơmam đêl lu sư blah iŏk 'bơ̆t anăp lu yŏng pơgơ̆r păng lu tơpôl kon pơlei oei akŭm.

¹⁵ Lu bơngai drŏ-nglo mă đei anăn lu sư adrol hei iung chông lu bơnă lĕch păng iŏk hơbĕn ao đơ̆ng blah iŏk noh pơhrŭk ăn kơ lu bơnă yua kơ đei lu mơ'nah akâu hoh păng tơ'bot ăn kơ lu sư chơkhŏ, ăn sŏng sa păng pik ăn pơgang păng chơ ba lu bơngai rơmơ̆n pă kĕ yak hăm aseh iĕ, đơ̆ng noh ba lu sư wih brŏk tơ 'nhŏng oh lu sư tơ pơlei Jêrikô, pơlei 'long gol; đơ̆ng noh lu sư wih brŏk tơ pơlei Samari.

¹⁶ Kơplah noh pơtao Ahas wơh bơngai năm apinh pơtao Asiri dŏng tơgŭm

¹⁷ yua kơ kon pơlei Eđôm iung blah kon pơlei Juđa dơ̆ng, đei rôp ba lơ bơngai pơm bơnă.

¹⁸ Kon pơlei Philistin kư̆m iung blah lu pơlei lăm tơring kông groi păng tơring tơ gah gơal lăm char Juđa. Kŭm blah iŏk pơlei Bêt Sêmes, Aijalôn, Gêđêrôt, Sôkô hăm lu pơlei jê̆ noh, Timna păng lu pơlei jê̆ sư, Gimsô păng lu pơlei kiơ̆ jê̆ sư, na lu bơngai Philistin oei hloi tơ noh.

¹⁹ Yua kơ đơ̆ng Ahas, pơtao đe Isơrael,a na Kră Yang tơhuŏng lu bơngai Juđa, yua kơ Ahas pơm kơnê̆ lăm Juđa, ưh kơ chu Kră Yang.

²⁰ Tiglat Philêser pơtao Asiri năm pơgŏ pơđep Ahas, tơplih kơ tơgŭm sư.

²¹ Ahas iŏk tơmam đơ̆ng lăm hnam akŭm Kră Yang, đơ̆ng lăm hnam pơtao păng kư̆m iŏk đơ̆ng lu yŏng pơgơ̆r ra ăn kơ pơtao Asiri; mă-lei kư̆m ưh kơ đei tơgŭm sư kiơ.

²² Lăm kơplah đei tơdrong truh pơmat-tat, Ahas rai pơm yoch hăm Kră Yang

²³ Sư kơkuh pơyơ̆r tơmam soi ăn kơ lu yang pơlei Đamas, kon pơlei mă blah sư; sư tơchĕng khan: “Yua kơ lu yang pơtao Asiri dŏng tơgŭm lu sư boih, na inh gô soi sơmah kơ lu yang noh, wă kơ lu yang noh kư̆m dŏng tơgŭm inh.” Mă tơpă lu yang noh rai pơrăm sư păng lu bơngai Isơrael.

²⁴ Ahas iŏk lu tơmam yua lăm hnam Kră Yang, na teh pơchah lê̆ păng tang chĭt lê̆ 'măng hnam Kră Yang; na sư pơdơ̆ng chơnang soi tơ rim mum trong lăm pơlei Jêrusalem.

²⁵ Tơ rim pơlei lăm char Juđa, sư pơjing pơdơ̆ng lu anih kơjung wă soh tơmam 'bâu phu ăn kơ lu yang nai, wă tơblĕk Kră Yang 'Bok Kei-Dei 'bok sư.

²⁶ Dôm tơdrong jang sư pơm păng dôm trong sư yak lăm chăl arih sư, iŏk đơ̆ng blŭng-a truh tơ tôch, đe đei chih lăm sơ̆p hla bơar lu pơtao Juđa păng Isơrael.

²⁷ Ahas lôch oei hơdai pơdơh hăm lu 'bok sư păng đe 'bŭ sư lăm pơlei Jêrusalem; mă-lei ưh kơ đei 'bŭ tah hơdai hăm bơsat lu pơtao Isơrael. Hesekia kon drŏ-nglo sư pơm pơtao pơgơ̆r pơtrơp sư.