II Ho 27 - Sơ̆p Hlabơar Nơ̆r 'Bok Kei-Dei

Jôtham pơm pơtao đe Juđa

¹ Jôtham 'nao 'bar-jĭt pơđăm sơnăm sư pơm pơtao, sư pơgơ̆r mơjĭt-tơdrâu sơnăm lăm pơlei Jêrusalem; mĕ sư anăn Jêrusa kon drŏ-kăn Sadok.

² Sư đei pơm lơ tơdrong 'lơ̆ng 'bơ̆t anăp Kră Yang thoi 'bă sư Usia đei pơm boih, mă-lei sư ưh kơ đei mơ̆t lăm hnam Kră Yang lu kon pơlei oei răm kiơ̆ trong kơnê̆.

³ Sư man ming 'Măng Jang Kơpal hnam Kră Yang păng kư̆m đei man pơdơ̆ng ming dur tơ groi Ôphel.

⁴ Sư kư̆m đei man pơjing lu pơlei lăm tơring groi kông char Juđa păng pơm pơjing lu kơđông linh lu hnam thôt tơ lăm 'long kơdrơ̆ng.

⁵ Sư tơblah hăm pơtao bơngai Ammôn jei sư. Lăm sơnăm noh kon pơlei Ammôn ra ăn kơ sư pêng tơ̆n puăn-hrĕng ki jên hu, mơjĭt-rơbâu kora 'ba tơ'bâu păng mơjĭt-rơbâu kor 'ba mi. Lăm sơnăm mă 'bar mă pêng, kon pơlei Ammôn kư̆m ra ăn kơ sư lei-lăi dôm noh.

⁶ Thoi noh Jôtham jing pran kơtang, yua kơ sư năm kiơ̆ trong tơpăt 'bơ̆t anăp Kră Yang 'Bok Kei-Dei sư.

⁷ Dôm tơdrong jang nai mă Jôtham đei pơm, dôm tơdrong tơblah wang păng trong mă sư yak, chih răk pơđĭ tơ lăm sơ̆p hla bơar lu pơtao Isơrael păng pơtao Juđa.

⁸ Sư 'nao lăp 'bar-jĭt pơđăm sơnăm 'bơ̆t sư pơm pơtao păng sư pơgơ̆r đei mơjĭt-tơdrâu sơnăm lăm Jêrusalem.

⁹ Sư lôch pơdơh hơdai lu 'bok sư, đe 'bŭ sư lăm pơlei Đawit; đơ̆ng noh Ahas kon drŏ-nglo sư iung pơgơ̆r pơm pơtao pơtrơp sư.