II Ho 25 - Sơ̆p Hlabơar Nơ̆r 'Bok Kei-Dei

Amasia pơm pơtao đe Juđa

¹ Amasia pơm pơtao sư 'nao lăp 'bar-jĭt pơđăm sơnăm, sư pơgơ̆r 'bar-jĭt tơsĭn sơnăm lăm pơlei Jêrusalem; mĕ sư anăn Jêhôadin, pơlei Jêrusalem.

² Sư bơngai pơm 'lơ̆ng 'bơ̆t anăp Kră Yang, mă-lei ưh kơ đĭ jơhngơ̆m.

³ Wă sư pơgơ̆r dêh char sư kơjăp, sư pơlôch đĭ lu bơngai yŏng mă đêl pơlôch 'bă sư.

⁴ Mă-lei sư ưh kơ pơlôch ôh kon drŏ-nglo đe noh, kiơ̆ thoi đei chih lăm sơ̆p hla bơar khôi juăt Môis. Lăm khôi juăt Kră Yang đei khan: “'Bă huay kơ lôch yua kơ kon, kon huay kơ lôch yua kơ đơ̆ng 'bă pơm yoch; mă-lei rim 'nu gô lôch yua kơ tơdrong yoch Sư kơdih.”

⁵ Amasia krao akŭm đĭ lu bơngai Juđa kiơ̆ kơ adrĕch adrung 'bok sư lăm Juđa păng Bênjamin, na pơjao ăn pơm yŏng pơgơ̆r kơ minh-rơbâu 'nu, minh-hrĕng 'nu; jô̆ iŏk đơ̆ng 'bar-jĭt sơnăm tơ kơpơ̆ng, đei pêng-hrĕng rơbâu 'nu lu bơngai mă gơh năm tơblah, chĕp khêl hơlă.

⁶ Sư kư̆m mưng minh-hrĕng rơbâu 'nu linh nuih kơtang dơ̆ng đơ̆ng lăm lu bơngai Isơrael, apah minh-hrĕng talâng jên hu.

⁷ Mă-lei bơngai Kră Yang 'Bok Kei-Dei yua năm khan kơ sư: “Ơ pơtao 'nĕ ăn kơ lu linh bơngai Isơrael năm hơdai ih, yua kơ Kră Yang ưh kơ oei hơdai hăm lu bơngai Isơrael ôh, kư̆m ưh kơ oei hơdai hăm lu kon sâu Êphraim mơ̆n.

⁸ Dah ih kiơ̆ trong 'nâu mă tơblah pran kơtang Kră Yang 'Bok Kei-Dei gô ăn kơ ih thuơ 'bơ̆t anăp lu ayăt kơ ih yua kơ Kră Yang 'Bok Kei-Dei gơh tơgŭm kĕ jei, kư̆m gơh ăn thuơ.”

⁹ Amasia jet bơngai Kră Yang 'Bok Kei-Dei: “Bĕ gah minh-hrĕng talâng jên inh apah linh Isơrael noh thoi yơ?” Bơngai Kră Yang 'Bok Kei-Dei tơl: “Kră Yang gơh ăn kơ ih đei lơ hloh kơ noh dơ̆ng.”

¹⁰ Thoi noh Amasia tơbrŏk lê̆ lu linh đơ̆ng khŭl Êphraim mă năm truh tơ sư boih, lu sư hil dêh kơ bơngai Juđa, na wih brŏk tơ hnam jơhngơ̆m blĕk kơŭl.

¹¹ Amasia iŏk tơiung pơm jơhngơ̆m nuih, chông ba lu kon pơlei năm truh tơ Thŭng 'Boh, tơblah păng pơlôch mơjĭt-rơbâu 'nu bơngai Sêir.

¹² Linh Juđa kư̆m đei rôp arih mơjĭt-rơbâu 'nu ba lu sư tŏk tơ kơpal kông tơmo, na tơlơ̆ lu sư đơ̆ng kơpal kông noh tơ ala, lu sư lôch akâu pơchah hĕch đĭ.

¹³ Gah lu linh mă Amasia tơbrŏk, ưh kơ ăn năm tơblah hơdai sư noh, mơ̆t blah lăm lu pơlei Juđa đơ̆ng pơlei Samari truh tơ pơlei Bêt Hôrôn, na pơlôch pêng-rơbâu 'nu kon pơlei tơ noh păng blah tơgar iŏk lơ mŭk tơmam.

¹⁴ Kơplah Amasia brŏk đơ̆ng tơblah bơngai Eđôm, sư chĕp ba rup yang lu bơngai Sêir pơm yang sư kơdih, kơkuh păng pơyơ̆r tơmam soi kơ rup yang noh.

¹⁵ Kră Yang hil kơ Amasia na wơh minh 'nu bơngai khan lê̆ adrol năm khan kơ sư: “Yua kơ kiơ ih kơkuh gơnang kơ rup yang mă ưh kơ gơh dŏng pơklaih đơ̆ng ti kon pơlei mă kơkuh gơnang kơ sư?”

¹⁶ Mă-lei kơplah 'bok khan lê̆ adrol oei pơma, pơtao khan plơ̆: “Nhôn hăm đei pôk ih chă đon kơ inh? Weh bĕ, ih 'maih lôch hă?” 'Bok khan lê̆ adrol noh ngăn na khan: “Inh băt Kră Yang wă pơlôch pơrăm ih, yua kơ ih đei pơm boih tơdrong noh păng ưh kơ wă mơ̆ng nơ̆r inh.”

¹⁷ Đơ̆ng rŏng kơ Amasia pơtao đe Juđa chă đon, na athei đe năm truh tơ Jêhôasa kon drŏ-nglo Jêhôahas sâu Jêhu, pơtao đe Isơrael khan: “Năm bĕ tơ âu wă kơ bơ̆n tơ'bơ̆p 'bôh băl muh măt.”

¹⁸ Jêhôas, pơtao đe Isơrael tơl Amasia pơtao đe Juđa: “'Long jơla oei tơ char Liban đei pơtruh nơ̆r ăn kơ 'long hơngo tơ char Liban khan: ‘Ăn bĕ kơ kon adruh ih oei pơm akăn kơ kon tơdăm inh.’ Na đei sem bri đơ̆ng char Liban rok noh, na pơjuă lê̆ đĭ 'long jơla noh.

¹⁹ Ih khan: Lăm to inh blah iŏk boih char Eđôm na jơhngơ̆m ih pơrŏ pơang pơư kơdih akâu. Dang ei oei bĕ hnam, liơ wă pơrăm kơdih akâu păng dêh char Juđa kư̆m răm kiơ̆?”

²⁰ Mă-lei Amasia ưh kơ wă mơ̆ng, yua kơ tơdrong âu đơ̆ng Kră Yang 'Bok Kei-Dei wă pơjao lu sư lăm ti Jêhôas, yua kơ đơ̆ng lu sư chơchă kơkuh kơ yang bơngai Eđôm.

²¹ Jêhôas pơtao Isơrael tŏk blah sư păng Amasia pơtao Juđa tơblah băl tơ pơlei Bêt Sêmes lăm dêh char Juđa.

²² Khŭl linh Isơrael druh blah khŭl linh Juđa, khŭl linh Juđa kơdâu brŏk tơ anih lu sư kơdih kơdih.

²³ Tơ Bêt Sêmes Jêhôas pơtao Isơrael rôp Amasia pơtao đe Juđa kon drŏ-nglo Jôas, sâu Ahasia, chông ba sư tơ pơlei Jêrusalem; lu sư teh tơlơ̆ pơrăm lê̆ dur pơlei Jêrusalem iŏk đơ̆ng 'Măng Jang Êphraim dĭng truh tơ 'Măng Jang Mum, minh chăl să kơjung 'bar-hrĕng hlok.

²⁴ Sư iŏk đĭ hu, maih păng lu tơmam yua lăm hnam Kră Yang 'Bok Kei-Dei, mă Ôbêt Eđôm bơngai wei tơmam noh; kư̆m iŏk dôm lu tơmam gĭt đơ̆ng lăm hnam pơtao hai; kư̆m đei rôp ba wă pơkơ̆ng lu bơngai nai, na lu sư wih brŏk tơ pơlei Samari.

²⁵ Amasia, kon drŏ-nglo Jôas, pơtao đe Juđa, oei arih mơjĭt-pơđăm sơnăm dơ̆ng đơ̆ng rŏng kơ Jêhôas kon drŏ-nglo Jêhôahas pơtao Isơrael lôch.

²⁶ Lu tơdrong jang nai Amasia đei pơm iŏk đơ̆ng blŭng-a truh tơ tôch đe đei chih lăm sơ̆p hla bơar lu pơtao Juđa păng Isơrael?

²⁷ Đơ̆ng chăl Amasia achăng lê̆ Kră Yang, đơ̆ng noh na đei đe pơđâu wă pơm kơnê̆ kơ sư tơ pơlei Jêrusalem, sư kơdâu ôn tơ pơlei Lakis; đe druh sư păng pơlôch hloi sư tơ noh.

²⁸ Đe chơ ba akâu sư hăm aseh, 'bŭ sư lăm Pơlei Đawit lăm char Juđa hơdai lu 'bok sư.