II Ho 22 - Sơ̆p Hlabơar Nơ̆r 'Bok Kei-Dei

Ahasia pơm pơtao đe Juđa

¹ Lu kon pơlei oei lăm Jêrusalem pôk Ahasia kon adruch Jêhôram, pơm pơtao đe Juđa pơtrơp 'bă sư yua kơ khŭl linh hơdai hăm linh Arâp mơ̆t blah lăm kơđông linh sư, na pơlôch đĭ lu kon drŏ-nglo 'nhŏng kơ sư, thoi noh Ahasia kon drŏ-nglo hơdruch Jêhôram iung pơm pơtao đe Juđa.

² Ahasia 'nao lăp 'bar-jĭt 'bar sơnăm năr sư iung pơm pơtao; sư pơgơ̆r minh sơnăm lăm pơlei tih Jêrusalem; mĕ sư anăn Athalia, Sâu drŏ-kăn Ômri.

³ Sư kư̆m pơm kiơ̆ trong Ahap; yua kơ mĕ sư pơhlŭ sư pơm tơdrong kơnê̆.

⁴ Sư pơm lơ tơdrong kơnê̆ 'bơ̆t anăp Kră Yang, kư̆m thoi adrĕch Ahap đei pơm boih yua kơ đơ̆ng rŏng kơ 'bă sư lôch, Kon Sâu Ahap chă đon hơlĕnh pơhlŭ sư, wă pơm kơ sư răm.

⁵ Sư kư̆m hlŭ kiơ̆ kơ đe noh na yak kiơ̆ Jôram kon drŏ-nglo Ahap, pơtao Isơrael, năm blah tơ pơlei Ramôt Gileat, wă tơblah hăm Hasael pơtao Siri; kon pơlei Siri blah Jôram rơka.

⁶ Na sư wih brŏk tơ pơlei Jesreel, wă ming rơka sư đơ̆ng tơblah 'bơ̆t pơlei Rama, tơblah hăm Hasael, pơtao Siri, Ahasia kon drŏ-nglo Jêhôram pơtao Juđa jur tơ Jêsreel wă năm lăng Jôram kon drŏ-nglo Ahap.

⁷ Tơdrong Ahasia năm lăng Jôram jĭ rơka noh đơ̆ng Kră Yang 'Bok Kei-Dei ăn wă phak sư; wă sư năm truh tơ noh, kiơ̆ Jôram năm tơ'bơ̆p Jêhu kon drŏ-nglo Nimsi, bơngai mă Kră Yang rơih, wă kơ sư năm blah pơrăm adrĕch Ahap.

⁸ Kơplah Jêhu năm blah adrĕch Ahap, tơ'bơ̆p lu yŏng bơngai Juđa, păng lu kon drŏ-nglo lu 'nhŏng oh Ahasia, lu bơngai mă tơgŭm Ahasia, na sư pơlôch đĭ lu sư hloi.

⁹ Sư kư̆m chă Ahasia oei kơdâu ôn lăm pơlei Samari; đe rôp, chông ba sư tơ Jêhu, đơ̆ng noh pơlôch sư. Đe 'bŭ sư; “Yua kơ đe khan, sư kon drŏ-nglo Jêhôsaphat, bơngai mă chă Kră Yang hăm đĭ jơhngơ̆m. “Lăm adrĕch Ahasia ưh pă đei bu dơ̆ng pơgơ̆r pơtrơp pơm pơtao lăm char sư.

Athalia păng Jôas

¹⁰ Wă Athalia, mĕ Ahasia 'bôh kon drŏ-nglo sư đe pơlôch, na sư iung blah pơrăm adrĕch pơm pơtao Juđa.

¹¹ Mă-lei Jêhôseba, kon adruh pơtao Jêhôram, rôp ôn lê̆ Jôas, kon drŏ-nglo Ahasia đơ̆ng tŏk-bŏk lu kon drŏ-nglo pơtao mă đe wă pơlôch đĭ na ôn lê̆ sư lăm anih tep hơdai hăm drŏ-kăn rong sư. Thoi noh Jêhôseba, kon drŏ-kăn pơtao Jêhôram, akăn 'bok soi Jêhôiada yua kơ sư oh drŏ-kăn Ahasia, ôn lê̆ Jôas đơ̆ng Athalia, lei na Athalia ưh kơ gơh pơlôch;

¹² Jôas đe ôn lê̆ sư lăm tơdrâu sơnăm tơ lăm hnam akŭm Kră Yang 'Bok Kei-Dei kơplah yă Athalia pơgơ̆r char noh.