II Ho 2 - Sơ̆p Hlabơar Nơ̆r 'Bok Kei-Dei

Hơmet wă Pơm Hnam akŭm

¹ Sôlômôn krao wơh pơm Hnam akŭm kơ Anăn Kră Yang păng pơm minh pôm hnam pơtao kơ sư.

² Sôlômôn krao pơtơm đei tơpơh hơngan 'nu bơngai wă kơ tung tơ'mơn, tơhngam hơngan thơ̆ teh blah tơmo kơpal kông păng pêng-rơbâu tơdrâu-hrĕng 'nu bơngai lăng wơh đe jang.

³ Sôlômôn gơih nơ̆r kơ Hiram pơtao dêh Tirơ khan: “Ih đei tơgŭm bơih 'bă inh, Đawit, ăn boih, 'long hơngo wă pơm hnam pơtao sư; apinh ih kư̆m tơgŭm inh thoi noh.

⁴ Dang ei inh wă pơm hnam kơ Anăn Kră Yang 'Bok Kei-Dei inh, wă 'măn lê̆ Hnam noh kơ Sư, wă soh 'long 'bâu phu 'bơ̆t anăp Sư, dan 'bĕng rơgoh ling-lang, pơyơ̆r tơmam soi 'buh kiơ̆ pơgê păng gah kơsơ̆, păng lăm năr Sa'bat, năr Khei Tơ'bang blŭng-a Khei Tơ'bang, păng lăm lu năr giĕng Kră Yang 'Bok Kei-Dei nhôn; noh bơih minh tơdrong pơkă kơ lu bơngai Isơrael athei kiơ̆ ling-lang hloi.

⁵ Hnam mă inh wă pơm tih dêh tơpă. Yua kơ Kră Yang 'Bok Kei-Dei lu nhôn tih dêh hloh kơ lu yang nai.

⁶ Lei na bu kĕ pơm ăn hnam kơ Kră Yang? Mă lu plĕnh, plĕnh kơ lu tăl plĕnh kư̆m ưh kơ gơh 'măn kơ Sư mơ̆n! Lei inh âu bu, mă gơh pơm hnam ăn kơ Kră Yang? Pơm hnam lăp wă soh 'long 'bâu phu 'bơ̆t anăp Sư.

⁷ Na dang ei pơtao athei chă gơih ăn kơ inh lu bơngai hơgei gơh hling maih, hu, kong, mam, bơngai tanh brai che 'brê hơhĭm, jơk 'brê gôh, kư̆m gơh chrek chhơ̆, wă kơ bơ̆jang hăm lu bơngai thơ̆ hơgei inh, tơ dêh Juđa păng pơlei Jêrusalem, mă 'bă inh Đawit đei ăn boih sơ̆.

⁸ Kŭm athei gơih ăn kơ inh 'long hơngo, 'long hơngo hla iĕ, 'long kơte đơ̆ng char Liban, yua kơ inh băt lu bơngai jang kơ ih juăt kơ kăl 'long đơ̆ng char Liban, lu bơngai jang kơ inh gô jang hơdai lu bơngai bơ̆jang đơ̆ng ih.

⁹ Wă kơ lu sư kăl 'long mă lơ; yua kơ Hnam akŭm inh wă pơm gô tih păng rŏ tơpă.

¹⁰ Inh gô ăn lu bơngai jang, kăl 'long đơ̆ng ih, 'bar-jĭt rơbâu kôr (dang 'bar-hrĕng puăn-jĭt kĭ) 'ba tơ'bâu, 'bar-jĭt rơbâu kôr 'ba mi, 'bar-jĭt rơbâu lit sik hơmu păng 'bar-jĭt rơbâu lit đak rơmă ôliwơ.”

¹¹ Hiram, pơtao Tirơ, chih hla bơar tơl Sôlômôn: Yua kơ Kră Yang 'mêm mơnat kơ kon pơlei Sư, lei na pôk ih pơm pơtao lu sư.

¹² Hiram khan dơ̆ng: “Bơnê kơ Kră Yang 'Bok Kei-Dei Isơrael, Kră Yang Tơ'ngla pơjing kơ plĕnh teh, Sư đei ăn boih kơ pơtao Đawit minh 'nu kon drŏ-nglo gơh hơgei, hlôh wao wă pơm hnam kơ Kră Yang păng wă pơm minh pôm hnam pơtao kơ sư.

¹³ Dang ei, inh gơih ăn kơ ih Huram Abi, sư bơngai hơgei dêh gơh pơm tôm.

¹⁴ Mĕ sư đơ̆ng adrĕch Đan, 'bă sư bơngai đơ̆ng Pơlei Tirơ. Sư bơngai hơgei gơh hơjơ̆m hling hu, maih, kong, mam blah tơmo, traih 'long, gơh tanh brai 'brê hơhĭm, jơk 'brê gôh hăm che kok se, chhơ̆ chrek păng hơgei gơh pơm tôm, kiơ̆ kơ đe chă wơh athei sư pơm. Sư gô jang hơdai lu bơngai hơgei ih kư̆m thoi mă jang kơ 'bă ih 'bok Đawit yŏng inh.

¹⁵ Thoi ei na apinh ih gơih ăn kơ lu đĭch đam ih 'ba tơ'bâu, 'ba mi, đak rơmă păng sik đak hơmu, thoi ih yŏng inh đei khan boih.

¹⁶ Na lu nhôn gô năm kăl 'long đơ̆ng char Liban kiơ̆ dôm yơ ih kăl wă, chô̆ pơm hơkĭ pơđông rok đak trong dơsĭ truh tơ Pơlei Jôpa, đơ̆ng noh ih gô iŏk hơtŏk ba tơ Pơlei Jêrusalem.”

¹⁷ Sôlômôn chih jô̆ đĭ-đăng lu bơngai tơmoi oei lăm char Isơrael ki thoi kơ Đawit, 'bă sư đei chih jô̆ boih, đei minh-hrĕng pơđăm-jĭt pêng-rơbâu tơdrâu-hrĕng 'nu,

¹⁸ Lăm noh đei jao ăn kơ tơpơh-jĭt rơbâu 'nu bơngai tung tôi 'long, tơhngam-jĭt rơbâu 'nu blah teh tơmo tơ kơpal kông păng đei pêng-rơbâu tơdrâu-hrĕng 'nu bơngai wei wơh kon pơlei jang.